ទិសដៅ៤ចំណុច ដែលនាយកដ្ឋាននគរបាលព្រហ្មទណ្ឌក្រសួងមហាផ្ទៃ ត្រូវប្រើកណ្តាប់ដៃដែក
រាជធានីភ្នំពេញ ៖ នាយកដ្ឋាននគរបាលព្រហ្មទណ្ឌ ក្រសួងមហាផ្ទៃ នៅថ្ងៃទី១៤ មីនា ២០១៧នេះ បានបើកកិច្ចប្រជុំមួយផ្សព្វផ្សាយខ្លឹមសារសន្និបាទបូកសរុបការងារ
រាជធានីភ្នំពេញ ៖ នាយកដ្ឋាននគរបាលព្រហ្មទណ្ឌ ក្រសួងមហាផ្ទៃ នៅថ្ងៃទី១៤ មីនា ២០១៧នេះ បានបើកកិច្ចប្រជុំមួយផ្សព្វផ្សាយខ្លឹមសារសន្និបាទបូកសរុបការងារ ប្រចាំឆ្នាំ២០១៦ និងទិសដៅការងារ ឆ្នាំ២០១៧ ដែលបានផ្សព្វផ្សាយផែនការណ៍ និងគោលការណ៍ នៃកិច្ចប្រជុំរបស់លោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ។ កិច្ចប្រជុំបានដាក់ចេញនូវផែនការ និងគោលការណ៍សំខាន់ៗ សម្រាប់អនុវត្តបន្តក្នុងឆ្នាំ២០១៧ រួមមាន៤ចំណុច ៖
១.ជម្រុញការងារបង្ការ បង្ក្រាប បទល្មើសព្រហ្មទណ្ឌគ្រប់ប្រភេទ។
២.ជម្រុញការស្វែងរកចាប់ខ្លួន មុខសញ្ញាសេសសល់ ក្នុងករណីបង្ក្រាបមិនទាន់អស់ (ពិសេសមុខសញ្ញា ប្លន់ប្រដាប់អាវុធ)។
៣.ស្វែងរកចាប់មុខសញ្ញា ដែលមានដីការបស់តុលាការឲ្យស្វែងរកចាប់ខ្លួន។
៤.ជម្រុញការងារស្រាវជ្រាវ ស៊ើបអង្កេត លើសំណុំរឿងដែលនៅសេសសល់។
កិច្ចប្រជុំក្រោមអធិបតីភាពលោកនាយឧត្តសេនីយ៍ កង សុខន អគ្គស្នងការរងនគរបាលជាតិ ទទួលការងារនាយកដ្ឋានកណ្តាលនគរបាលយុត្តិធម៌ ក្រសួងមហាផ្ទៃ ដោយមានការចូលរួមពីថ្នាក់ឧត្តមសេនីយ៍ឯក ឧត្តមសេនីយ៍ទោ ឧត្តមសេនីយ៍ត្រី វរៈសេនីយ៍ឯក វរៈសេនីយ៍ទោ និងវរៈសេនីយ៍ត្រី ដែលមានមុខងារជាប្រធាននាយកដ្ឋានកណ្តាលនគរបាលយុត្តិធម៌ ប្រធាននាយកដ្ឋាននគរបាលព្រហ្មទណ្ឌ និងប្រធានការិយាល័យ គ្រប់លំដាប់ថ្នាក់ ។ ហើយក្នុងនោះក៏មានការចូលរួមពីសំណាក់លោកស្នងការរង ទទួលផែននគរបាលព្រហ្មទណ្ឌ គ្រប់បណ្តារាជធានី.ខេត្ត ផងដែរ។
ពិធីបានប្រារពធ្វើឡើងនៅសាលប្រជុំ នៃនាយកដ្នាននគរបាលព្រហ្មទណ្ឌ ក្រសួងមហាផ្ទៃ ដែលប្រកបទៅដោយការក្រេបជញ្ជក់យកនូវផែនការ និងគោលការណ៍៤ចំណុចសំខាន់ៗ ដើម្បីយកទៅអនុវត្តតាមមាគ៌ាថ្នាក់ដឹកនាំ របស់អគ្គស្នងការនគរបាលជាតិ៕
ចែករំលែកព័តមាននេះ