ទឹកស្ទឹងសែន អាចឡើងដល់កម្រិតប្រកាសអាសន្ន! សូមបង្កើនការប្រុងប្រយ័ត្នខ្ពស់!
- កំពង់ធំ
ខេត្តកំពង់ធំ៖ អាជ្ញាធរខេត្តកំពង់ធំ បានប្រកាសនៅថ្ងៃទី៦ ខែតុលា ឆ្នាំ២០២២ នេះ ជូនដំណឹងដល់សាធារណជន ជាពិសេសបងប្អូនប្រជាពលរដ្ឋ ដែលរស់នៅតាមដងស្ទឹង ក្នុងស្រុកសណ្តាន់…
ខេត្តកំពង់ធំ៖ អាជ្ញាធរខេត្តកំពង់ធំ បានប្រកាសនៅថ្ងៃទី៦ ខែតុលា ឆ្នាំ២០២២ នេះ ជូនដំណឹងដល់សាធារណជន ជាពិសេសបងប្អូនប្រជាពលរដ្ឋ ដែលរស់នៅតាមដងស្ទឹង ក្នុងស្រុកសណ្តាន់…
ខេត្តកំពង់ធំ៖ អាជ្ញាធរខេត្តកំពង់ធំ បានប្រកាសនៅថ្ងៃទី៦ ខែតុលា ឆ្នាំ២០២២ នេះ ជូនដំណឹងដល់សាធារណជន ជាពិសេសបងប្អូនប្រជាពលរដ្ឋ ដែលរស់នៅតាមដងស្ទឹង ក្នុងស្រុកសណ្តាន់ ស្រុកប្រាសាទសំបូរ ស្រុកកំពង់ស្វាយ ស្រុកសន្ទុក ក្រុងស្ទឹងសែន ស្រុកបារាយណ៍ និងស្រុកស្ទោង ឱ្យបានជ្រាបថា កាលពីថ្ងៃទី៤ ខែតុលា ឆ្នាំ២០២២ កន្លងទៅ នៅស្ថានីយ៍វាស់កម្ពស់ទឹកកំពង់ធំ ទឹកស្ទឹងសែន បានហក់ឡើងដល់កម្រិតកម្ពស់ ១៤ម៉ែត្រ ជាកម្ពស់ទឹកប្រកាសឱ្យមានការប្រុងប្រយ័ត្នកម្រិតខ្ពស់ ជាមួយគ្នានេះ ទឹកស្ទឹងសែនផ្នែកខាងលើ កំពុងកើនឡើងជាលំដាប់។
សេចក្តីជូនដំណឹង បន្តថា តាមការជូនដំណឹងរបស់ក្រសួងធនធានទឹក និងឧតុនិយម កាលពីថ្ងៃទី៤ ខែតុលា ឆ្នាំ២០២២ បានព្យាករណ៍ថា តំបន់ខ្ពង់រាបមានជាអាទិ៍ ខេត្តឧត្តរមានជ័យ ខេត្តព្រះវិហារ ( ផ្ទៃរងទឹកភ្លៀងអាងទឹកស្ទឹង) អាចមានភ្លៀងធ្លាក់ក្នុងកម្រិតពីតិចទៅច្រើន ដោយផ្អែកតាមស្ថានភាពនេះ ទឹកស្ទឹង នឹងហួរមកដល់ផ្នែកខាងក្រោមជាបន្តបន្ទាប់ក្នុងរយៈពេល ៣ ទៅ ៧ថ្ងៃខាងមុខ ដែលធ្វើឱ្យកម្ពស់ទឹកស្ទឹងសែន នៅស្ថានីយ៍វាស់កម្ពស់ទឹកកំពង់ធំ អាចឡើងដល់កម្រិតប្រកាសអាសន្ន ( ១៤,៣០ម៉ែត្រ )។
ក្រៅពីនេះ រដ្ឋបាលខេត្តកំពង់ធំ ក៏បានប្រកាសថា ដោយសារភ្លៀងបានបន្តធ្លាក់ជារៀងរាល់ថ្ងៃ ដូច្នេះបណ្តាស្រុកផ្សេងទៀត ក៏អាចប្រឈមនឹងជំនន់ទឹកភ្លៀងផងដែរ។
ក្នុងសេចក្តីជូនដំណឹងដដែល រដ្ឋបាលខេត្តកំពង់ធំ ក៏បានប្រកាសឱ្យបងប្អូនប្រជាពលរដ្ឋ បង្កើនការប្រុងប្រយ័ត្នខ្ពស់ ចំពោះទឹកជំនន់ទឹកភ្លៀង ដើម្បីជៀសវាងគ្រោះថ្នាក់ផ្សេងៗ ដែលនឹងអាចកើតមានឡើងជាយថាហេតុ។ ទន្ទឹមនឹងនេះ អាជ្ញាធរមូលដ្ឋានគ្រប់លំដាប់ថ្នាក់ និងសមត្ថកិច្ចពាក់ព័ន្ធ ត្រូវយកចិត្តទុកដាក់ត្រៀមអន្តរាគមន៍ សង្គ្រោះ និងក្នុងករណីចាំបាច់ ត្រូវជម្លៀសប្រជាពលរដ្ឋ ទៅទីទួលសុវត្ថិភាពឱ្យទាន់ពេលវេលា និងមានប្រសិទ្ធភាពខ្ពស់។
សូមរម្លឹកថា តំបន់មួយចំនួនក្នុងខេត្តកំពង់ធំ ពិសេសនៅតាមបណ្តោយស្ទឹងសែន ជំនន់ទឹកភ្លៀង បានជន់លិចយូរថ្ងៃមកហើយ។ ក្នុងនោះ ជំនន់ទឹកភ្លៀង អំឡុងពេលបុណ្យភ្ជុំបិណ្ឌ ទឹកភ្លៀងក៏បានជន់លិចកំណាត់ផ្លូវជាតិលេខ៦ ក្នុងខេត្តកំពង់ធំផងដែរ៕
ចែករំលែកព័តមាននេះ