ទីក្រុងកៀវ៖ កាលពីពេលរំលងអធ្រាត្រឆ្លងចូលព្រឹកថ្ងៃសៅរ៍ រុស្ស៊ីវាយប្រហាររដ្ឋធានីកៀវរបស់អ៊ុយក្រែនយ៉ាងចាស់ដៃដោយប្រើប្រាស់ដ្រូន និងមីស៊ីល និងធ្វើឱ្យមានភ្លើងឆេះយ៉ាងសន្ធោសន្ធៅនៅលើទីតាំងជាច្រើនកន្លែង។ សាក្សីនិយាយថាគេឃើញកម្ទេចកម្ទីហោះហើរនៅតាមទីតាំងវាយប្រហារទូទាំងទីក្រុងកៀវ។ អភិបាលក្រុងកៀវប្រាប់ថាមនុស្សយ៉ាងតិច៨នាក់រងរបួសដោយសារការវាយប្រហារនោះ។
អភិបាលក្រុងរូបនេះបញ្ជាក់បន្ថែមទៀតថាជនជាតិអ៊ុយក្រែន២នាក់របួសធ្ងន់ត្រូវបញ្ជូនទៅមន្ទីរពេទ្យជាបន្ទាន់។ លោកថាកងទ័ពអាកាសអ៊ុយក្រែននៅតែបន្តការងាររបស់ខ្លួនដើម្បីត្រៀមទប់ទល់ក្រែងលោរុស្ស៊ីវាយប្រហារបន្ថែមទៀត។ បំណែកយន្តហោះដ្រូនរបស់រុស្ស៊ីដែលត្រូវអ៊ុយក្រែនបាញ់ចំនោះបានធ្លាក់ទៅលើដំបូលអគារមួយកន្លែង។ អគារដែលមានមនុស្សរស់នៅមួយកន្លែងឆេះនៅក្នុងអណ្ដាតភ្លើងយ៉ាងសន្ធោសន្ធៅ។ ចំណែកអគារមួយទៀតដែលគ្មានមនុស្សរស់នៅក៏មានភ្លើងឆេះផងដែរ។
ប្រធានយោធាប្រចាំទីក្រុងកៀវថ្លែងថានៅសង្កាត់ឌីនីប្រូមានភ្លើងឆេះអគារ។ ចំណែកនៅតំបន់ជាយក្រុងកៀវ មន្ត្រីថ្នាក់មូលដ្ឋានរាយការណ៍ថាមានករណីឆេះនៅភាគខាងជើង។ បំណែកយន្តហោះដ្រូនរបស់រុស្ស៊ីដែលត្រូវអ៊ុយក្រែនបាញ់ឆេះបានធ្លាក់ទៅលើផ្សារទំនើបមួយកន្លែង។ នៅទីកន្លែងដទៃទៀតក៏មានបំណែកយន្តហោះដ្រូនធ្លាក់រាយប៉ាយពាសពេញដីផងដែរ។
គេស្ដាប់ឮសំឡេងស៊ីរ៉ែនប្រកាសអាសន្នរយៈពេល៧ម៉ោងទម្រាំស្ងប់ស្ងាត់ទៅវិញ។ ការវាយប្រហាររបស់រុស្ស៊ីលើកនេះកើតឡើងបន្ទាប់ពីអ៊ុយក្រែនបញ្ជូនយន្តហោះដ្រូនជាច្រើនរយគ្រឿងទៅវាយប្រហាររុស្ស៊ី។ គេគិតថាដ្រូនរបស់អ៊ុយក្រែនកាលនោះមានប្រហែល៨រយគ្រឿង។ ដ្រូនខ្លះត្រូវរុស្ស៊ីបាញ់ធ្លាក់នៅតាមផ្លូវធ្វើដំណើរ រីឯដ្រូនខ្លះទៀតក៏អាចហោះហើរទៅដល់គោលដៅចុងក្រោយដើម្បីវាយប្រហារផងដែរ។ ជាពិសេស វាយប្រហារនៅទីក្រុងម៉ូស្គូ និងទីតាំងដទៃទៀត។
កាលពីថ្ងៃសុក្រ រដ្ឋមន្ត្រីការបរទេសរុស្ស៊ីប្រកាសថានឹងចាត់វិធានការឆ្លើយតបទៅនឹងការវាយប្រហាររបស់អ៊ុយក្រែនលើកនេះ។ បន្ទាប់ពីសង្គ្រាមបន្តឆាបឆេះយ៉ាងដូច្នេះ ប្រជាជនអ៊ុយក្រែនរស់នៅទីក្រុងកៀវប្រាប់ថាពួកគេមិនចង់ឃើញទិដ្ឋភាពបែបនេះកើតឡើងតទៅទៀតទេ។ ពួកគេស្នើសុំយ៉ាងទទូចឱ្យរុស្ស៊ីទទួលយកបទឈប់បាញ់។ ប៉ុន្តែពួកគេយល់ថាលោកពូទីនមិនចង់ឈប់បាញ់ទេ។ គាត់ចង់ធ្វើសង្គ្រាមជាបន្តទៀត៕
ចែករំលែកព័តមាននេះ