ទីក្រុងវ៉ាស៊ីនតោន៖ អគ្គលេខាធិការអង្គការណាតូ លោកម៉ាករូតថឺ (Mark Rutte) ត្រៀមជួបលោកដូណាល់ត្រាំនៅសេតវិមាននារាត្រីនេះដើម្បីរកវិធីបន្ធូរបន្ថយភាពតានតឹងពាក់ព័ន្ធនឹងបញ្ហាអ៊ីរ៉ង់ និងបញ្ហាដែលលោកត្រាំគំរាមដកកងទ័ពអាមេរិកចេញពីទ្វីបអឺរ៉ុប។ គម្រោងជួបគ្នានេះធ្វើឡើងមុនកិច្ចប្រជុំកំពូលអង្គការណាតូនៅទីក្រុងអង់ការ៉ា ប្រទេសតួកគី នាខែកក្កដា។ លោកត្រាំដែលជាអ្នករិះគន់អង្គការណាតូតាំងពីយូរមកហើយនោះ លោកមានកំហឹងជាមួយអង្គការណាតូមិនតិចទេព្រោះអង្គការនេះមិនព្រមចូលរួមជាមួយអាមេរិកដើម្បីវាយប្រហារអ៊ីរ៉ង់។ លោកចាត់ទុកថាណាតូជាខ្លាក្រដាស។
រដ្ឋមន្ត្រីការពារជាតិអាមេរិក លោកភីតហេកសិត (Pete Hegseth) កាលពីសប្ដាហ៍មុនបាននិយាយរិះគន់សម្ព័ន្ធមិត្តនៅក្នុងអង្គការណាតូដែលមិនចេះជួយគ្នា។ លោកប្រកាសថាអាមេរិកនឹងពិនិត្យមើលឡើងវិញនូវការដាក់ពង្រាយកងទ័ពនៅទ្វីបអឺរ៉ុប ហើយអាចនឹងកាត់បន្ថយកងទ័ពរបស់ខ្លួននៅទីនោះ។ តួនាទីសំខាន់មួយរបស់លោកម៉ាករូតថឺចាប់តាំងពីលោកត្រាំជាប់ឆ្នោតអាណត្តិថ្មីគឺខិតខំសម្រុះសម្រួលមិនឱ្យមានអរិភាពរវាងលោកត្រាំ និងអង្គការណាតូ និងខិតខំទប់ស្កាត់មិនឱ្យមានភាពតានតឹងនឹងគ្នា។
អ្នកវិភាគយល់ថាលោកម៉ាករូតថឺនឹងឈរនៅខាងលោកដូណាល់ត្រាំដើម្បីធានាថាកិច្ចប្រជុំកំពូលណាតូនឹងប្រព្រឹត្តទៅដោយជោគជ័យ ឬមិនមានបញ្ហារកាំរកូសនឹងគ្នា។ កិច្ចប្រជុំណាតូស្រួលមិនស្រួលអាចនឹងមានបញ្ហាព្រោះលោកដូណាល់ត្រាំកំពុងខឹងសម្បារ។ សូម្បីតែលោកម៉ាករូតថឺចូលមកស្អំចិត្តយ៉ាងណាក្ដី នៅក្នុងរយៈពេល២សប្ដាហ៍មុនកិច្ចប្រជុំ គ្មានអ្នកណាទស្សន៍ដឹងថានឹងមានហេតុការណ៍អ្វីកើតឡើងនោះទេ។ ភាពតានតឹងកើតមានឡើងកាន់តែខ្លាំងនារយៈពេលប៉ុន្មានខែចុងក្រោយនេះ។
អង្គការណាតូមិនព្រមធ្វើតាមការស្នើសុំរបស់លោកដូណាល់ត្រាំដែលចង់ឱ្យបញ្ជូននាវាចម្បាំងទៅបើកច្រកហ័រម៉ូសឡើងវិញឡើយ។ ប្រទេសសម្ព័ន្ធមិត្តខ្លះបោះពាក្យបោះសម្ដីថា «នេះមិនមែនជាសង្គ្រាមរបស់យើងទេ»។ ហេតុនេះ លោកដូណាល់ត្រាំដាក់ជាសំណួរថាតើអាមេរិកគួរតែបន្តអនុវត្តតាមកិច្ចព្រមព្រៀងការពារគ្នាទៅវិញទៅមកឬយ៉ាងណា។ លោកថាលោកកំពុងពិចារណាដកខ្លួនចេញពីអង្គការនេះ៕
ចែករំលែកព័តមាននេះ