ទីក្រុងវ៉ាស៊ីនតោន៖ រដ្ឋាភិបាលរបស់លោកត្រាំបានចេញបទបញ្ជាថ្មីមួយកាលពីយប់មិញដើម្បីលុបចោលនូវទណ្ឌកម្មដែលខ្លួនធ្លាប់បានដាក់លើប្រទេសស៊ីរីតាំងពីជំនាន់លោកអាល់អាសាតនៅដឹកនាំប្រទេស។ ការសម្រេចបែបនេះធ្វើឡើងបន្ទាប់ពីលោកត្រាំទើបតែចាប់ដៃស្វាគមន៍គ្នាជាមួយប្រធានាធិបតីស៊ីរីថ្មីនៅប្រទេសអារ៉ាប៊ីសាអូឌីត។ នៅក្នុងឱកាសនោះ លោកត្រាំសន្យាថានឹងលុបចោលទណ្ឌកម្មដើម្បីឱ្យស៊ីរីមានឱកាសកសាងជាតិរបស់ខ្លួនឡើងវិញបន្ទាប់ពីរងគ្រោះដោយសារសង្គ្រាម។
ក្រសួងរតនាគារជាតិអាមេរិកបានចេញប្រកាសនីយប័ត្រមួយសន្លឹកដើម្បីផ្ដល់សិទ្ធិឱ្យវិស័យនានាអាចធ្វើប្រតិបត្តិការហិរញ្ញវត្ថុជាមួយរដ្ឋាភិបាលស៊ីរីក្រោមការដឹកនាំរបស់លោកសារ៉ា (al-Sharaa) ក៏ដូចជាជាមួយធនាគារជាតិស៊ីរី និងសហគ្រាសដែលស្ថិតនៅក្រោមការគ្រប់គ្រងរបស់រដ្ឋ។ ប្រកាសនីយប័ត្រដែលមានឈ្មោះថាជីអឹលម្ភៃប្រាំ (GL25) អនុញ្ញាតឱ្យធ្វើប្រតិបត្តិការហិរញ្ញវត្ថុឡើងវិញនូវអ្វីដែលធ្លាប់ហាមឃាត់ក្រោមការដាក់ទណ្ឌកម្មកាលពីពេលកន្លងមក។ ដូច្នេះមានន័យថាជាការលុបចោលទណ្ឌកម្មនោះ។ នេះបើយោងតាមសេចក្ដីប្រកាសរបស់ក្រសួងរតនាគារជាតិ។
រដ្ឋមន្ត្រីការបរទេសអាមេរិក លោករូប៊ីយ៉ូ (Rubio) ក៏បានចេញសេចក្ដីអនុញ្ញាតសិទ្ធិពិសេសរយៈពេល១៨០ថ្ងៃដើម្បីឱ្យវិស័យឯកជនអាចទៅវិនិយោគនៅប្រទេសស៊ីរី និងជួយសម្រួលការផ្គត់ផ្គង់ភ្លើងអគ្គិសនី, ថាមពល, ទឹកស្អាត, អនាម័យ និងជំនួយមនុស្សធម៌។ លោកយល់ថាវិធានការរបស់អាមេរិកថ្មីនេះជាការអនុវត្តតាមទស្សនៈវិស័យរបស់លោកត្រាំដែលចង់បង្កើតសករាជថ្មីនៃទំនាក់ទំនងអាមេរិក-ស៊ីរី។ លោកត្រាំសង្ឃឹមថាក្រោយការលុបចោលទណ្ឌកម្មនេះ រដ្ឋាភិបាលស៊ីរីនឹងកែសម្រួលរបៀបដឹកនាំរបស់ខ្លួន។
សូមរំលឹកថាក្រោយការជួបគ្នារវាងលោកត្រាំ និងប្រធានាធិបតីស៊ីរីនោះ, សេតវិមានប្រកាសថាលោកត្រាំបានស្នើសុំឱ្យស៊ីរីកែសម្រួលលក្ខខណ្ឌ១ចំនួនដើម្បីជាថ្នូរនឹងការដកចេញវិញនូវទណ្ឌកម្មសេដ្ឋកិច្ចជាបណ្ដើរៗ។ ក្នុងនោះ លោកស្នើសុំឱ្យស៊ីរីលែងអនុញ្ញាតឱ្យមានកងទ័ពបរទេសបោះមូលដ្ឋាននៅលើទឹកដីរបស់ខ្លួនតទៅទៀត, និរទេសចេញពីទឹកដីស៊ីរីនូវក្រុមអ្នកដែលលោកហៅថាជាក្រុមភេរវករប៉ាឡេស្ទីន និងចូលរួមជាមួយអាមេរិកដើម្បីទប់ស្កាត់មិនឱ្យក្រុមអាយស៊ីសវិលមកវិញ។
លោករូប៊ីយ៉ូថ្លែងបន្ថែមថាលោកត្រាំផ្ដល់ឱកាសឱ្យស៊ីរីលើកកម្ពស់សន្តិភាព និងស្ថិរភាពនៅក្នុងប្រទេសរបស់ខ្លួនផ្ទាល់ និងជាមួយប្រទេសជិតខាង។ បន្ទាប់ពីទទួលដំណឹងនេះ រដ្ឋាភិបាលបណ្ដោះអាសន្នរបស់ស៊ីរីប្រកាសស្វាគមន៍យ៉ាងកងរំពង។ ក្រសួងការបរទេសស៊ីរីចាត់ទុកថានេះជាការធ្វើដំណើរនៅលើមាគ៌ាដ៏ត្រឹមត្រូវឆ្ពោះទៅរកការលុបបំបាប់វិបត្តិមនុស្សធម៌ និងវិបត្តិសេដ្ឋកិច្ចនៅប្រទេសស៊ីរី។
ស៊ីរីថាខ្លួនកំពុងស្វះស្វែងរកកិច្ចសហការល្អជាមួយបណ្ដាប្រទេសទាំងអស់នៅលើពិភពលោកដោយផ្អែកទៅលើគោលការណ៍គោរពគ្នា និងមិនជ្រៀតជ្រែកកិច្ចការផ្ទៃក្នុងគ្នាទៅវិញទៅមក។ ក្រសួងការបរទេសស៊ីរីមានជំនឿយ៉ាងមុតមាំថានយោបាយការទូត និងការសន្ទនាគ្នាជាកត្តាដ៏សំខាន់ និងដ៏ល្អប្រសើរបំផុតក្នុងការកសាងទំនាក់ទំនងដោយស្មើមុខស្មើមាត់ជាមួយគ្នា៕
ចែករំលែកព័តមាននេះ