ដុតខ្សែភ្លើងយកស្ពាន់លក់ឱ្យអេតចាយឆាបឆេះគំនរសំរាមផ្អើលទាំងថ្ងៃត្រង់
រាជធានីភ្នំពេញ ៖ អណ្តាតភ្លើងបានឆេះគំនរសំរាមមួយកន្លែងយ៉ាងសន្ធោសន្ធៅ និងមានផ្សែងហុយឡើងទៅលើអាកាស បង្កឲ្យមានការភ្ញាក់ផ្អើលទាំងថ្ងៃ
រាជធានីភ្នំពេញ ៖ អណ្តាតភ្លើងបានឆេះគំនរសំរាមមួយកន្លែងយ៉ាងសន្ធោសន្ធៅ និងមានផ្សែងហុយឡើងទៅលើអាកាស បង្កឲ្យមានការភ្ញាក់ផ្អើលទាំងថ្ងៃ ដែលការឆេះនោះបណ្ដាលមកពីការដុតខ្សែភ្លើងយកស្ពាន់ ។ ហេតុការណ៍នេះបានកើតឡើងកាលពីវេលាម៉ោង១១និង៣០នាទីថ្ងៃត្រង់ ថ្ងៃទី១២ ខែមីនា នៅក្នុងភូមិកប់អំបិល សង្កាត់កំបូល ខណ្ឌពោធិ៍សែនជ័យ ។
តាមប្រភពព័ត៌មានពីអ្នកភូមិខាងលើបាននិយាយថា សំរាមដែលត្រូវភ្លើងឆេះនេះមានចំនួនរាប់សិបតោន ក្នុងនោះមានកម្ទេចក្រណាត់គ្រប់ប្រភេទ៩០ភាគរយ និង១០ភាគរយទៀតគឺជាកម្ទេចជ័រ និងស្បែក ដែលប្រជាពលរដ្ឋមួយគ្រួសារជាអ្នកចំណូលថ្មីដឹកតាមរថយន្ត ចេញពីតាមរោងចក្រកាត់ដេរនានាយកទៅចាក់នៅក្បែរផ្ទះរបស់ខ្លួន ដើម្បីរើសយកចំនៀរណាដែលល្អៗលក់។ ប៉ុន្តែក្រោយពេលរើសចំនៀរល្អលក់ហើយ ក៏មិនបានដឹកកម្ទេចក្រណាត់ដែលប្រើការមិនកើតទៅចាក់ចោលទេ បែរជាចាក់គរនៅទីនោះតែម្ដង ហើយយូរទៅៗពំនូកកាន់តែធំឡើងៗមានរាប់សិបតោន ដែលអ្នកចាក់ចោល នោះមិនបានគិតពីផលប៉ះពាល់ដល់អ្នកជិតខាងឡើយ ។
ប្រភពដដែលបន្តថា ដោយឡែកនៅមុនពេលកើតហេតុខាងលើ ពលរដ្ឋមួយគ្រួសារនោះ បានយកខ្សែភ្លើងមួយចំនួនទៅដុតនៅក្បែរគំនរកម្ចេចក្រណាត់នោះដើម្បីយកស្ពាន់លក់ឲ្យអេតចាយ ។ ខណៈនោះក៏បណ្ដាលឲ្យមានការឆេះយ៉ាងសន្ធោសន្ធៅតែម្ដង ដែលជាហេតុបង្កឲ្យមានការភ្ញាក់ផ្អើល ហើយអ្នកដុតនិងគ្រួសារ ខាងលើមានការភ័យស្លន់ស្លោភ្នែកនៅកញ្ចឹងក នាំគ្នាដងទឹកជះពន្លត់ ប៉ុន្តែមិនបានរលត់ឡើយ រហូតដល់មានការជួយអន្តរាគមន៍ពីសំណាក់ រថយន្តពន្លត់អគ្គិភ័យមួយគ្រឿង និងរថយន្តដឹកទឹកលក់នៅក្នុងភូមិ២គ្រឿង ទើបរលត់ទៅវិញមិនបានឆេះរាលដាលដល់ផ្ទះដែលនៅជិតនោះទេ។ថ្ងៃក្រោយសុំកុំរាង !!
ចែករំលែកព័តមាននេះ