រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជាបានគូសបញ្ជាក់ថា មានតែកិច្ចសហប្រតិបត្តិការ និងសាមគ្គីអន្តរជាតិជាធ្លុងមួយប៉ុណ្ណោះទើបអាចដោះស្រាយបញ្ហាប្រឈមបរិស្ថានសកលដោយប្រសិទ្ធភាព។ ការលើកឡើងបែបនេះធ្វើឡើងក្នុងឱកាសសម្ដេចតេជោ…
រាជធានីភ្នំពេញ ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានគណបក្សប្រជាជនកម្ពុជាបានគូសបញ្ជាក់ថា មានតែកិច្ចសហប្រតិបត្តិការ និងសាមគ្គីអន្តរជាតិជាធ្លុងមួយប៉ុណ្ណោះទើបអាចដោះស្រាយបញ្ហាប្រឈមបរិស្ថានសកលដោយប្រសិទ្ធភាព។
ការលើកឡើងបែបនេះធ្វើឡើងក្នុងឱកាសសម្ដេចតេជោ អញ្ជើញចូលរួមក្នុងសន្និសីទតាមប្រព័ន្ធអនឡាញជាមួយបណ្តាបក្សនយោបាយនៃប្រទេសនានាក្រោមប្រធានបទ «គោលនយោបាយបរិស្ថាន និងការអភិវឌ្ឍប្រកបដោយចីរភាព» ដែលធ្វើឡើងនៅទីក្រុង Yuzhno-Sakhalinsk សហព័ន្ធរុស្ស៊ី នៅថ្ងៃទី៦ ខែតុលា ឆ្នាំ២០២២នេះ។
យោងតាមសុន្ទរកថា របស់សម្ដេចតេជោ ហ៊ុន សែន បានឱ្យដឹងថា ជាការរួមចំណែកដោះស្រាយបញ្ហាប្រែប្រួលអាកាសធាតុព្រះរាជាណាចក្រកម្ពុជា ថ្វីត្បិតតែជាប្រទេសតូច និងបញ្ចេញឧស្ម័នផ្ទះកញ្ចក់តិច កម្ពុជានៅតែប្តេជ្ញាចូលរួមដោះស្រាយបញ្ហាប្រែប្រួលអាកាសធាតុរបស់សកលដោយបានបង្កើនថវិកាជាតិចំនួន៣ដងសម្រាប់សកម្មភាពពាក់ព័ន្ធនឹងការទប់ទល់ការប្រែប្រួលអាកាសធាតុ និងបានកំណត់គោលដៅកាត់បន្ថយការបញ្ចេញឧស្ម័នប្រមាណ៤២% នៅត្រឹមឆ្នាំ២០៣០ ។
ជាមួយគ្នានេះ សម្តេចលើកឡើងថា កម្ពុជាក៏បានដាក់ចេញនូវយុទ្ធសាស្ត្រ អភិវឌ្ឍន៍សម្រាប់រយៈពេលវែងប្រកបដោយអព្យាក្រឹតកាបូន ដើម្បីជំរុញសេដ្ឋកិច្ចបៃតងដែលធន់នឹងអាកាសធាតុជាមួយនឹងការបញ្ចេញកាបូនតិចផងដែរ។កម្ពុជាក៏បានកំណត់ផងដែរ ការអភិវឌ្ឍបៃតង និងការទប់ទល់ការប្រែប្រួលអាកាសធាតុជាសមាសភាពដ៏សំខាន់នៃការកសាងភាពធន់របស់សេដ្ឋកិច្ចកម្ពុជានៅក្រោយវិបត្តិនៃជំងឺកូវីដ-១៩ និងបានកំណត់ក្នុងច្បាប់ស្ដីពីវិនិយោគនៃព្រះរាជាណាចក្រកម្ពុជាដែលជាច្បាប់វិនិយោគថ្មី នូវការលើកទឹកចិត្តដល់ការវិនិយោគថាមពលបៃតង, សេដ្ឋកិច្ចចក និងកិច្ចការពារបរិស្ថាន។
សម្ដេចតេជោ ហ៊ុន សែន បានគូសបញ្ជាក់ថា «ពិតណាស់! បញ្ហាបរិស្ថានមិនស្គាល់ព្រំដែនប្រទេសឡើយ ហេតុនេះមានតែកិច្ចសហប្រតិបត្តិការ និងសាមគ្គីអន្តរជាតិជាធ្លុងមួយប៉ុណ្ណោះទើបអាចដោះស្រាយបញ្ហាប្រឈមបរិស្ថានសកលដោយប្រសិទ្ធភាព និងជួយសង្គ្រោះភពផែនដីយើងពីគ្រោះមហន្តរាយទាំងឡាយ សម្រាប់ជនានុជន របស់យើងជារៀងដរាបតទៅ។
សម្ដេចមានជឿជាក់ថា យើងទាំងអស់ពិតជាអាចធ្វើបាន។ សម្ដេចបានលើកឡើង ជាឧទាហរណ៍ល្អៗជាច្រើននៃសាមគ្គីភាព និងកិច្ចសហការទាំងនេះដូចជា ការអនុវត្តពិធីសារម៉ុងរ៉េអាល់ដែលបានកាត់បន្ថយ និងឈានទៅលុបបំបាត់សារធាតុបំផ្លាញស្រទាប់អូហ្សូនបានធ្វើឱ្យសម្ដេចមានសង្ឃឹមយ៉ាងមុតមាំថា យើងពិតជាអាចជម្នះនូវរាល់បញ្ហាទាំងនេះ ជាមួយគ្នាបាន។ជាទិសដៅបន្ត សម្ដេចយល់ថា យើងត្រូវបន្តលើកកិច្ចសហប្រតិបត្តិការ និងសាមគ្គីអន្តរជាតិទាំងទ្វេភាគី និងពហុភាគីដោយទុកភាពខុសគ្នាផ្នែកប្រព័ន្ធដឹកនាំ, នយោបាយ, វប្បធម៌ និងជំនឿសាសនាដោយឡែក ។ការគាំទ្រហិរញ្ញវត្ថុ និងការផ្ទេរបច្ចេកវិទ្យាពីប្រទេសអភិវឌ្ឍដល់ ប្រទេសកំពុងអភិវឌ្ឍ គឺជាប្រការចាំបាច់ ដើម្បីចូលរួមដោះស្រាយបញ្ហាបរិស្ថានសកលឱ្យកាន់តែសកម្ម និងប្រកបដោយប្រសិទ្ធភាពខ្ពស់។
ជាមួយគ្នានេះ យើងក៏គួរផ្តោតជាសំខាន់ផងដែរលើការកសាង និងការធ្វើសមាហរណកម្មធនធានមនុស្សតាមរយៈការចែករំលែកចំណេះដឹងអំពីការដោះស្រាយបញ្ហាបរិស្ថាន និងកម្មវិធីទស្សនកិច្ចសិក្សាជាដើម ដើម្បីឆ្លើយតបទៅនឹងភាពបន្ទាន់នៃបញ្ហាបរិស្ថានសកល។សម្ដេចថា កម្ពុជាបានត្រៀមខ្លួនជាស្រេច ហើយយើងត្រូវការដៃគូ ទាំងសាធារណៈ និងឯកជន ដើម្បីជួយយើងសម្រេចបាននូវការប្តេជ្ញាចិត្តទាំងនេះ៕
ចែករំលែកព័តមាននេះ