ADផ្ទាំងផ្សព្វផ្សាយពាណិជ្ជកម្ម

Picture

«ឡូ​រី​»នៅ​​អូរ​ដំបង​នៅ​តែ​ជា​គោលដៅ​ទេស​ចរណ៍​​​មិន​អាច​ខ្វះ​បាន​ ​ខណៈ​ក្រសួង​​ឱ្យ​​បិទ

1 ឆ្នាំ មុន
  • បាត់ដំបង

ខេត្តបាត់ដំបង ​៖ បើ​ទោះជា​ក្រសួង​អយ​ស្ម័​យាន្ត​កម្ពុជា បាន​ប្រកាស​បិទ​ឈប់​មិន​ឲ្យ​មានការ​ប្រើ​ប្រាស់ «​ឡូ​រី ឬ រទេះ​ប្ញ​ស្សី​» ដឹក​ភ្ញៀវ​ទេសចរ​ជាតិ និង​អន្តរជាតិ​កម្សាន្ត​លើ​ផ្លូវដែក​ដ៏​ពេញ​និយម​នៅ​ស្ថានីយ​រថភ្លើង​«​អូរ​ដំបង​» ក្នុងស្រុក​សង្កែ…

ខេត្តបាត់ដំបង ​៖ បើ​ទោះជា​ក្រសួង​អយ​ស្ម័​យាន្ត​កម្ពុជា បាន​ប្រកាស​បិទ​ឈប់​មិន​ឲ្យ​មានការ​ប្រើ​ប្រាស់ «​ឡូ​រី ឬ រទេះ​ប្ញ​ស្សី​» ដឹក​ភ្ញៀវ​ទេសចរ​ជាតិ និង​អន្តរជាតិ​កម្សាន្ត​លើ​ផ្លូវដែក​ដ៏​ពេញ​និយម​នៅ​ស្ថានីយ​រថភ្លើង​«​អូរ​ដំបង​» ក្នុងស្រុក​សង្កែ អស់​រយៈពេល​ច្រើន​ឆ្នាំ​កន្លង​ទៅ​នេះ​ក្ដី ។ ប៉ុន្តែ​ស្ថានីយ​រថភ្លើង​ដ៏​តូច​និង​មាន​វ័យ​ចំណាស់​មួយ​នេះ នៅ​តែ​ជា​គោលដៅ​ទេសចរ​ដ៏​សំខាន់ និង​មិន​អាច​ខ្វះ​បាន​សម្រាប់​ភ្ញៀវ​ទេសចរ​អន្តរជាតិ ខណៈ​ភ្ញៀវ​ទេសចរ​ជាតិ សម្រុក​ខ្លាំង​ទៅ​ជិះ​«​ឡូ​រី​»​កម្សាន្ត​លើ​ផ្លូវដែក​សិប្បនិម្មិត ដែល​ក្រុមហ៊ុន​ឯកជន​មួយ​បាន​រៀបចំ ធ្វើ​នៅ​រម​នី​យ​ដ្ឋា​ន​ក្បែរ​ជើងភ្នំ​បាណ​ន់ ។

យ៉ាង​ហោច​ណាស់ ក៏​មាន​ភ្ញៀវ​ទេសចរ​បរទេស​ចន្លោះ​ពី​១៥ ទៅ​២០​នាក់​ដែរ​ក្នុង​មួយ​ថ្ងៃ ដែល​បាន​ធ្វើ​ដំណើ​ទៅ​រក​«​ឡូ​រី ឬ​រទេះ​ប្ញ​ស្សី​» ជិះ​កម្សា្ត​លើ​ផ្លូវដែក​នៅ​ស្ថានីយ​រថភ្លើង​«​អូរ​ដំបង​» ក្នុង​ទឹកដី​ស្រុក​សង្កែ​។ នេះ​បើ​តាម​ការ​អះអាង​របស់​អ្នក​ដឹក​ភ្ញៀវ​កំសាន្ត​តាម​«​ឡូ​រី​»​ដែល​សេសសល់​ប៉ុន្មាន​នាក់​ប្រចាំ​នៅ​«​រ៉ា​អូរ​ដំបង​»​នោះ ។ ពួក​គេ​បាន​រៀបរាប់​ប្រាប់​កោះសន្តិភាព​ថា ស្ថានីយ​រថភ្លើង​នៅ​«​អូរ​ដំបង​»​នេះ ត្រូវ​បាន​អ្នកគ្រប់គ្រង​ផ្លូវដែក​បិទ​មិន​ឲ្យ«​ឡូ​រី​»​ដឹក​ភ្ញៀវ​ច្រើន​ឆ្នាំ​កន្លង​មក​ហើយ ព្រោះ​គេ​ត្រូវការ​សាងសង​ឬ​ជួសជុល ដើម្បី​ដំណើ​ការ​រថភ្លើង​ឡើង​វិញ​។ ប៉ុន្តែ​ក៏​នៅ​មាន​អ្នក​ភូមិ​ប៉ុន្មាន​នាក់​ដែល​មាន​«​ឡូ​រី​»​គ្មាន​ការងារ​ធ្វើ ចេះ​តែ​ឆ្លៀត​លួច​ដឹក​ភ្លៀវ​កម្សាន្ត​គ្រាន់​បាន​ចំណូល​បន្តិច​ប​ន្ទូ​ច​ចិញ្ចឹម​គ្រួសារ​។

ពួក​គេ​បាន​បញ្ជាក់​ថា សព្វថ្ងៃ​មាន​តែ​ភ្ញៀវ​បរទេស​ទេ ដែល​នាំ​គ្នា​ទៅ​រក​ជិះ​«​ឡូ​រី ឬ​រទេះ​ប្ញ​ស្សី​» នៅ «​រ៉ា​អូរ​ដំបង​» នេះ រីឯ​ភ្ញៀវ​ក្នុងស្រុក​វិញ ស្ទើរ​ទាំងស្រុង​បាន​នាំ​គ្នា​ទៅ​ជិះ​«​ឡូ​រី​»​នៅ​ស្រុក​បាណ​ន់ ដែល​ជា​របស់​ក្រុមហ៊ុនឯកជន ។ ប្រភព​ដដែល​នេះ​បាន​ប្រាប់​ថា បើ​និយាយ​ពី​ភ្ញៀវ​បរទេស ពួក​គេ​មិន​ព្រមទៅ​ជិះ​«​ឡូ​រី​»​នៅ​ជើងភ្នំ​បាណ​ន់​ទេ​។ ព្រោះ​ពួក​គេ​ចាត់​ទុក «​ឡូ​រី​» ដែល​ជិះ​កម្សាន្ត​នៅ​លើ​ផ្លូវ​ដែក​​ជើងភ្នំ​បាណ​ន់​ជា​«​ផ្លូវដែក​សិប្បនិម្មិត ពួក​គេ​មិន​ចូល​ចិត្ត​» ។ ដូច្នេះ​ហើយ ទើប​ភ្ញៀវ​ទេសចរ​បរទេស​ទាំងអស់​តែង​នាំ​គ្នា​មក​រក​«​ឡូ​រី​»​នៅ​«​រ៉ា​អូរ​ដំបង​» ជិះ​កំសាន្ត​នៅ​ពេល​ពួក​គេ​មក​ជាន់ទឹក​ខេត្តបាត់ដំបង​ម្ដង​ៗ ។

អ្នក​ដឹក​ភ្ញៀវ​ទេសចរ​បរទេស​ដ៏​មមា​រញឹក​ម្នាក់ លោក លាភ ធា​រី បាន​ប្រាប់​កោះសន្តិភាព នៅ​ក្នុង​ស្ថានីយ​រថភ្លើង«​អូរ​ដំបង​» ថា លោក​តែង​ដឹក​ភ្ញៀវ​បរទេស​ជា​ញឹកញាប់​ពី​ភ្នំពេញ មក​កាន់​ខេត្តបាត់​ដំបង ឬ ទៅ​តាម​បណ្ដា​ខេត្ត​ដទៃ​ទៀត​ក្នុង​ប្រទេស​កម្ពុជា ។ នៅ​ពេល​សួរ​ថា ភ្ញៀវ​បរទេស​ដែល​លោក​ដឹក​មក​កាន់​ខេត្តបាត់ដំបង តើ​ពួក​គេ​ចូល​ចិត្ត​ទៅ​ទស្សនា​តំបន់​ណា​ជាងគេ ? អ្នក​ដឹក​ភ្ញៀវ​ទេសចរ​បរទេស​រូប​នេះ ហាក់​គ្មាន​ការ​ស្ទាក់ស្ទើរ​ទេ ក្នុង​ការ​ផ្ដល់​ចម្លើយ ដែល​គាត់​ហាក់ដូចជា​បា​នដឹង​ចិត្ត​ភ្ញៀវ​អស់​ទៅ​ហើយ ។ លោក​បាន​ប្រាប់​ថា ពេល​ជាន់​ទឹកដី​បាត់ដំបង​ភ្លាម ពួក​គេ​ប្រាកដ​ជា​ប្រាប់​ឲ្យ​លោក​ដឹក​ទៅ​ជិះ​«​ឡូ​រី​»​កំសាន្ត​នៅ​ស្ថានីយ​«​អូរ​ដំបង​»​នេះ​មុនគេ ។

លោក លាភ ធា​រី បាន​និយាយ​ថា បើ​តាម​ការ​កត់សម្គាល់​របស់​លោក ភ្ញៀវ​បរទេស​ដែល​មក​លេង​ខេត្តបាត់ដំបង ភាគច្រើន​ពួក​គេ​បាន​កំណត់​គោលដៅ​ទេសចរ​ជា​មុន​រួច​ស្រេច​ទៅ​ហើយ មុន​ពេល​ចេញដំណើរ ។ លោក​បាន​បញ្ជាក់​ថា គោលដៅ​ដែល​ភ្ញៀវ​ទេសចរ​បរទេស​ទាំងនោះ​បាន​កំណត់ មាន​៤​គោលដៅ ដែល​សំខាន់​បំផុត​នៅ​ក្នុង​ខេត្តបាត់ដំបង គឺ ទី​១-​ទៅ​ជិះ​«​ឡូ​រី ឬ រទេះ​ឬ​ស្សី​» នៅ​ស្ថានីយ​រថភ្លើង​អូរ​ដំបង ទី​២-​ទៅ​ទស្សនា​ល្អាង​ប្រជៀវ​ភ្នំ​សំពៅ ទី​៣-​ទៅ​មើល​ការ​ផលិត​សំបក​ណែម​របស់​អ្នក​ភូមិ​ដូនទាវ នៅ​ស្រុក​ឯក​ភ្នំ និង​ទី​៤-​ពួក​គេ​ទៅ​ទស្សនាការ​ធ្វើ​កសិកម្ម​ដំណាំ​ស្រូវ​ឬ​ដំណាំ​បន្ទាប់បន្សំ​ផ្សេង​ៗ​ទៀត (​បើ​មក​ចំ​ពេល​រដូវវស្សា​) ។ តើ​ហេតុ​អ្វី​បាន​លោក​មិន​ដឹក​ភ្ញៀវ​បរ​ទេស​ទាំងនោះ​ទៅ​ជិះ «​ឡូ​រី​» នៅ​ជើងភ្នំ​បាណ​ន់​ដែល​គេ​ទើប​បង្កើត​ថ្មី ?

លោក លាភ ធា​រី គ្រវីក្បាល​ជាមួយនឹង​បន្លឺ​សំណើច​តិច​ៗ រួច​និយាយ​ថា « តាម​ពិត​ពួក​ភ្ញៀវ​បរទេស វា​ដឹង​ជាង​យើង​ឆ្ងាយ​ណាស់ ពាក់ព័ន្ធ​នឹង​រឿង​ជិះ​ឡូ​រី​កម្សាត្ត​នេះ ។ បើ​តាម​ខ្ញុំ​ធ្លាប់​ដឹក​ភ្ញៀវ​បរទេស ខ្ញុំ​បានដឹង​ច្បាស់​ណាស់​ពី​គោលដៅ​ពួក​គេ គឺ​ពួក​គេ​ចូល​ចិត្ត​ដើរ​ទស្សនា​ស្វែង​យល់ ស្រាវជ្រាវ​នូវ​តំបន់​ណា​ដែល​ពាក់ព័ន្ធ​នឹង​ប្រវត្តិសាស្ត្រ​។ ដូច្នេះ ចំពោះ​ការ​ជិះ​ឡូ​រី​នៅ​ជើងភ្នំ​បាណ​ន់ ភ្ញៀវ​បរទេស​ភាគច្រើន​មិន​ចង់ទៅ​ទេ ។

ពួក​គេ​យល់​ថា ទីនោះ​ជា​កន្លែង​សិប្បនិម្មិត​ខុស​ពី​ផ្លូវដែក​នៅ​ស្ថានីយ​អូរ​ដំបង ដែល​មាន​ប្រវត្តិ​រាប់រយ​ឆ្នាំ​កន្លង​មកនេះ​»​។ ដោយឡែក អ្នក​ដឹក​ភ្ញៀវ​ទេសចរ​បរទេស​មួយ​រូប​ទៀត គឺ លោក ឃួ​ន វឹង ក៏​បាន​ទាញហេតុផល​មិន​ខុស​ពី​លោក លាភ ធា​រី ជា​អ្នក​ដឹក​ភ្ញៀវ​បរទេស​ដូច​គ្នា​ដែរ​។ លោក ឃួ​ន វឹង បាន​និយាយ​ដូច្នេះ​ថា «​ថ្ងៃនេះ ខ្ញុំ​ដឹក​ភ្ញៀវ​ជនជាតិ​កូរ៉េ​ចំនួន​០៤​នាក់ ចេញពី​ភ្នំពេញ​ឆ្ពោះទៅ​ខេត្តសៀមរាប ។ ប៉ុន្តែ​ភ្ញៀវ​បាន​ប្រាប់​ឲ្យ​ខ្ញុំ​ដឹក​ឆ្ពោះ​មក​កាន់​បាត់ដំបង​សិន មុន​ចេញ​ទៅ​សៀមរាប​»​។ នៅ​ពេល​សួរ​ថា តើ​មូលហេតុ​អ្វី បាន​ភ្ញៀវ​ឲ្យ​លោក​ដឹក​ពួក​គាត់​មក​បាត់ដំបង មុន​ទៅ​សៀមរាប ?

លោក វឹង បាន​ផ្ដល់​ចម្លើយ​ថា ពួក​ភ្ញៀវ​កូរ៉េ​ទាំង​០៤​នាក់​នេះ គាត់​ចង់ទៅ​ជិះ​«​ឡូ​រី​» នៅ​ស្ថានីយ​រថភ្លើង​អូរ​ដំបង និង ចង់ទៅ​ទស្សនា​សត្វ​ប្រជៀវ​ហោះ​ចេញពី​ល្អាង​ភ្នំ​សំពៅ​ពេល​ល្ងាច រួច​ទើប​បន្តដំណើ​ទៅ​កាន់​ខេត្តសៀមរាប​។ អ្នក​ដឹក​ភ្ញៀវ​រូប​នេះ​បាន​បញ្ជាក់​ដែរ​ថា ភាគច្រើន​ភ្ញៀវ​បរទេស ដែល​លោក​បាន​ដឹក​មក​កាន់​ខេត្តបាត់ដំបង ស្ទើរ​គ្រប់​ជាតិ​សាស​ន៏ គឺ តែង​ទៅ​ជិះ​ឡូ​រី​កំសាន្ត​នៅ​ស្ថានីយ​រថភ្លើង​អូរ​ដំបង រួច​ទើប​បន្តដំណើរ​ទៅ​ទស្សនា​ល្អាង​ប្រជៀវ​ភ្នំ​សំពៅ ដែល​ជា​គោលដៅ​ទស្សនា​សំខាន់​របស់​ពួក​គេ​។ ស្ថានីយ​រថភ្លើង​«​អូរ​ដំបង​» មា​នទី​តាំងនៅ​ភូមិ​អូរ​ដំបង​២ ឃុំ​អូរ​ដំបង​២ ស្រុក​សង្កែ ។

គោលដៅ​នៃ​ការ​ធ្វើ​ដំណើ​តាម​«​ឡូ​រី ឬ រទេះ​ឬ​ស្សី​» កំសាន្ត​នៅ​លើ​ផ្លូវដែក​នេះ​មាន​ចម្ងាយ​ប្រហែល​០៧​គីឡូម៉ែត្រ ចាប់ពី​ចំណុច​ស្ថានីយ​អូរ​ដំបង រហូត​ទៅ​ដល់​ចំណុច​ស្ថានីយ អូរ​ស្រឡៅ ស្ថិត​ក្នុង​ឃុំ​អូរ​ស្រឡៅ ស្រុក​សង្កែ រួច​ដឹក​ភ្ញៀវ​ត្រឡប់​មក​កាន់ ស្ថានីយ​អូរ​ដំបង​វិញ​។ តម្លៃ​នៃ​ការ​ធ្វើ​ដំណើ​កម្សាន្ត​បើ​តាម​ម្ចាស់​ឡូ​រី បាន​ប្រាប់​ថា សម្រាប់​ភ្ញៀវ​បរទេស​ម្នាក់​តំលៃ​៥​ដុល្លា (​ទៅ​មក​) រីឯ​ភ្ញៀវ​ខ្មែរ​ម្នាក់​តំលៃ​២.៥​ដុល្លា (​ទៅ​មក​)​។

ប៉ុន្តែ​បច្ចុប្បន្ន​ពុំ​មាន​«​ឡូ​រី ឬ រទេះ​ប្ញ​ស្សី​»​នេះ បំរើ​សេ​វ៉ា​ដឹក​ភ្ញៀវ​កំសាន្ត​ជា​ផ្លូវការ​នៅ​លើ​ផ្លូវដែក​របស់​រដ្ឋ នៅ​ក្នុង​ស្ថានីយ​រថភ្លើង​ខាងលើ​នេះ​ដូច​ប៉ុន្មាន​ឆ្នាំ​មុន​នោះ​ទេ ។ ក្រុមហ៊ុន​អយ​ស្ម័​យាន្ត​កម្ពុជា បាន​​រៀបចំ​សាងសង់ ឬ ជួសជុល​ផ្លូវដែក​នេះ ដើម្បី​ដំណើ​ការ​រថភ្លើង​ដឹក​ទំនិញ ឬ ដឹក​អ្នកដំណើ​ឡើង​វិញ ទើបត្រូវ​បិត​ឈប់​មិន​ឲ្យ​អ្នក​ភូមិ​ប្រើប្រាស​«​ឡូ​រី​»​បំរើ​សេវា​ដឹក​ភ្ញៀវ​កម្សាន្ត​រហូត​មក​ដល់​សព្វ​ថ្ងៃនេះ​។

ដំណាលគ្នា​នៃ​ការ​បិទ​បញ្ឈប់​មិន​ឲ្យ​មាន​ឡូ​រី រត់​លើ​ផ្លូវដែក​របស់​រដ្ឋ​ខាងលើ​នេះ ក៏​ស្រប​ពេល​ដែល​ផ្លូវដែក​សិប្បនិម្មិត​ថ្មី សម្រាប់​ឲ្យ​«​ឡូ​រី​»​ដឹក​ភ្ញៀវ​កម្សាន្ត​ត្រូវ​បាន​បង្កើត​ឡើង​រួចរាល់ ដោយ​ក្រុមហ៊ុន​ឯកជន​មួយ នៅ​តំបន់​ជើងភ្នំ​បាណ​ន់​ផង​ដែរ ។ គេ​បាន​ប្រកាស​បិទ​ទាំងស្រុង​មិន​ឲ្យ​មាន «​ឡូ​រី​» រត់​ដឹក​ភ្ញៀវ​លើ​ផ្លូវដែក នៅ​ស្ថានីយ​អូរ​ដំបង តែ​អាជ្ញាធរ បាន​ជម្រុញ​ឲ្យ​ភ្ញៀវ​ទេសចរ​ជាតិ និង​អន្តរជាតិ ដែល​មក​កម្សាន្ត​ទឹកដី​ខេត្តបាត់ដំបង ទៅ​ជិះ​«​ឡូ​រី​»​កំសាន្ត​នៅ​លើ​ផ្លូវដែក​សិប្បនិម្មិត​ថ្មី នៅ​ក្បែរ​ជើងភ្នំ​បាណ​ន់ វិញ​ដែល​ជា​តំបន់​រមណីយដ្ឋាន​ប្រវត្តិសាស្ត្រ​ផង និង បែប​ធម្មជាតិ​ផង​។

យ៉ាងណា​ក្ដី ដោយសារ​ពុំ​មានការ​ងារ​ធ្វើ និង​ធ្លាប់​ប្រកប​មុខរបរ​ដឹក​ភ្ញៀវ​កំសាន្ត​នៅ​ក្នុង​មូលដ្ឋាន​ខ្លួន ទើប​អ្នក​ភូមិ​ដែល​មាន​«​ឡូ​រី​» សេសសល់​ប៉ុន្មាន​គ្រឿង​ក៏​នាំ​គ្នា​ឆក់​ឱកាស លួច​ដឹក​ភ្ញៀវ​ទាំង​ភ្នែក​លើ​ថ្ងាស់ បំពាន​បំរាម​អ្នកគ្រប់គ្រង​ផ្លូវដែក​របស់​រដ្ឋ រហូត​ពេល​ខ្លះ​ត្រូវ​បាន​គេ​ចាប់​រឹបអូស​យក​«​ឡូ​រី​»​របស់​ពួក​គាត់​ទៀត​ផង​ក៏​មាន​ដែរ​។

រហូត​ដល់​សព្វថ្ងៃ​អ្នក​ភូមិ​អូរ​ដំបង ដែល​មាន​សេសសល់​«​ឡូ​រី ឬ រទេះ​ឬ​ស្សី​» នេះ​ប៉ុន្មាន​គ្រឿង
មិន​ដឹង​យក​ទៅ​ណា ក៏​នៅ​តែ​នាំ​គ្នា​ឆ្លៀត​ដឹក​ភ្ញៀវ​បរទេស​កម្សាន្ត យ៉ាង​កញ្ឆក់​កណ្ដៀត​គ្រាន់​បាន​ចំណូល​​បន្តិច​ប​ន្ទូ​ច​ចែក​រំ​លែ​គ្នា​ទិញ​ស្បៀងអាហារ​សម្រាប់​គ្រួសារ​រស់​ប្រចាំ​ថ្ងៃ ខណៈ​ភ្ញៀវ​បរទេស​ចេះ​តែ​ទៅ​រក «​ឡូ​រី​»​ជិះ​ជា​ហូ​ហែរ​មិន​ដាច់ បើ​ទោះជា​ត្រូវ​អ្នកគ្រប់គ្រង​ផ្លូវ​រថភ្លើង​នេះ ហាមឃាត់ ឬ​ត្រូវ​ចាប់​រឹបអូស​«​ឡូ​រី ឬ​រទេះ​ប្ញ​ស្សី​» នេះ​យ៉ាងណា​ក្ដី​៕

៦៥

អត្ថបទសរសេរ ដោយ