ខេត្តព្រៃវែង ៖ ឈ្មួញខ្មែរដែលទិញស្រូវពីកសិករទៅលក់នៅវៀតណាមតាមច្រកទ្វារអន្តរជាតិកោះរកា បានសម្ដែងការមិនពេញចិត្តចំពោះសកម្មភាពឈ្មួញវៀតណាមដែលចូលមកទិញស្រូវប្រណាំងប្រជែង
ខេត្តព្រៃវែង ៖ ឈ្មួញខ្មែរដែលទិញស្រូវពីកសិករទៅលក់នៅវៀតណាមតាមច្រកទ្វារអន្តរជាតិកោះរកា បានសម្ដែងការមិនពេញចិត្តចំពោះសកម្មភាពឈ្មួញវៀតណាមដែលចូលមកទិញស្រូវប្រណាំងប្រជែងជាមួយពួកគាត់នៅក្នុងស្រុកពាមជ័រយ៉ាងអនាធិបតេយ្យ ថែមទាំងយករថយន្ដបើកចូលទឹកដីខ្មែរ ដោយគ្មានច្បាប់ទម្លាប់ធ្វើឲ្យពួកគាត់ពិបាករកស៊ី ។
ឈ្មួញខ្មែរម្នាក់លើកឡើងថា ជារៀងរាល់ឆ្នាំ លោកតែងតែដើរទិញស្រូវពីកសិករនៅស្រុកពាមជ័រ ទៅលក់ឲ្យវៀតណាមតាមច្រកអន្តរជាតិកោះរកា គ្រាន់បានចំណេញបន្តិចបន្តួច ដើម្បីដោះស្រាយជីវភាពគ្រួសារ ប៉ុន្ដែឆ្នាំនេះពួកគាត់កំពុងតែជួបការលំបាកខ្លាំង ដោយសារតែមន្ត្រីប្រចាំច្រកទ្វារអន្តរជាតិកោះរកា បើកដៃឲ្យឈ្មួញវៀតណាមចូលមកទិញស្រូវដោយសេរីនៅក្នុងភូមិសាស្ត្រនេះ ធ្វើឱ្យការប្រមូលទិញរបស់ពួកគាត់មានការប្រកួតប្រជែងច្រើន។ មិនតែប៉ុណ្ណោះ ព្រមទាំងអនុញ្ញាតឲ្យឈ្មួញវៀតណាមទាំងនោះយករថយន្តបើកចូលមកទិញស្រូវក្នុងដីខ្មែរទៀតផង ។
ឈ្មួញទិញស្រូវរូបនេះបន្តថា ៖ « ឈ្មួញវៀតណាមគួរតែនៅឈរជើងចាំទិញស្រូវពីឈ្មួញខ្មែរតាមព្រំដែន មិនគួរមកដើរទិញស្រូវយ៉ាងអនាធិបតេយ្យបែបនេះទេ » ។
ឈ្មួញខ្មែរម្នាក់ទៀតឲ្យដឹងថា សព្វថ្ងៃនេះ គាត់ទិញស្រូវពីកសិករក្នុង១គីឡូក្រាមតម្លៃ៧៧០រៀល ហើយយកទៅលក់នៅវៀតណាមបានតម្លៃ៨០០រៀលក្នុង១គីឡូក្រាម ។ លោកនិយាយថា ៖ « ការដឹកស្រូវក្នុង១រថយន្តខ្នាតតូច គឺត្រូវបង់លុយឲ្យមន្ត្រីខ្មែរប្រចាំការនៅច្រកទ្វារអន្តរជាតិកោះរកា ចំនួន២ម៉ឺន៣ពាន់រៀល និងបង់ឲ្យខាងវៀតណាមអស់២៣ម៉ឺនដុង ស្មើនឹង៣ម៉ឺន៥ពាន់រៀល បើសរុបទាំងអស់ចំនួន៥ម៉ឺន៨ពាន់រៀល ហើយបើទូទាត់សោហ៊ុយ ថ្លៃប្រេង និងកម្មករលើកដាក់ក្នុងមួយជើង គាត់ចំណេញបានពី១០ទៅ១៥ម៉ឺនរៀលប៉ុណ្ណោះ » ។
លោកបន្ដថា ៖ « ក្នុងមួយថ្ងៃដឹកបានតែ១ជើងឬ២ជើងទេ ហើយជួនកាល២ទៅ៣ថ្ងៃដឹកបាន១ជើងក៏មានដែរ ព្រោះថាទិញស្រូវមិនបាន ខណៈឈ្មួញវៀតណាមមកដេញថ្លៃ » ។
ពាក់ព័ន្ធនឹងឈ្មួញវៀតណាមចូលទិញស្រូវដោយគ្មានលិខិតស្នាមនេះ នាយរងអន្តោប្រវេសន៍ច្រកទ្វារអន្តរជាតិកោះរកា លោក ហ៊ុន សុវណ្ណ បកស្រាយថា ៖ « រឿងលុយកាក់ដែលក្រុមអ្នកដឹកស្រូវឲ្យមកមន្ត្រីនោះ គឺបន្តិចបន្តួចទេ ដោយខាងយើងមិនបានបង្គាប់ឡើយ គឺគ្រាន់នឹងដោះស្រាយថ្លៃបាយទឹក កាហ្វេ ។ ឯរឿងឈ្មួញវៀតណាមចូលមកទិញស្រូវនោះ យើងទទួលស្គាល់ដែរថា ពិតជាមានមែន តែក្រុមឈ្មួញទាំងនោះមានគ្នាត្រឹមតែ៥ទៅ៦នាក់ទេ ហើយធ្វើដូចខ្មែរយើង គឺព្រឹកចូល ល្ងាចចេញ ។ បើយើងមិនឲ្យចូល គេថាយើងតឹងពេក » ៕
ចែករំលែកព័តមាននេះ