រាជធានីភ្នំពេញ ៖ ដើម្បីដោះស្រាយបញ្ហាសន្តិសុខស្បៀង បណ្តាប្រទេសនៅលើពិភពលោកបានខិតខំជំរុញផលិតកម្មស្រូវ ដែលជាកត្តាធ្វើឲ្យផលស្រូវជន់ដូចជា ឥណ្ឌាសល់ស្រូវរាប់សិបលានតោន ថៃសល់
រាជធានីភ្នំពេញ ៖ ដើម្បីដោះស្រាយបញ្ហាសន្តិសុខស្បៀង បណ្តាប្រទេសនៅលើពិភពលោកបានខិតខំជំរុញផលិតកម្មស្រូវ ដែលជាកត្តាធ្វើឲ្យផលស្រូវជន់ដូចជា ឥណ្ឌាសល់ស្រូវរាប់សិបលានតោន ថៃសល់ស្រូវប្រមាណ១០លានតោន ខណៈកម្ពុជាសល់ស្រូវប្រមាណ៥លានតោនដែលធ្វើឲ្យប្រទេសត្រូវការស្រូវ អង្ករ មានឱកាសបន្ទាបថ្លៃ និងធ្វើឲ្យអ្នកនាំចេញ ពេលខ្លះលក់មិនរួចថ្លៃដើមផង ។ នេះគឺជាក្រឹត្យក្រមនៃតុល្យភាពរវាងការផ្គត់ផ្គង់ និងតម្រូវការ ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា បានលើកឡើងកាលពីថ្ងៃទី១២ មីនា ថា នៅពេលណាការផ្គត់ផ្គង់មានកម្រិត ហើយតម្រូវការច្រើននោះ ទំនិញនឹងឡើងថ្លៃខ្ពស់ ប៉ុន្តែបើការផ្គត់ផ្គង់មានបរិមាណច្រើន ហើយតម្រូវការមានកម្រិត ថ្លៃទំនិញនឹងចុះថោកជាមិនខាន ។
លោកបន្ដថា ក្នុងស្ថានភាពប្រែប្រួលនេះ បើសិនជាមានការរំលោភក្រឹត្យក្រមសត្យានុម័តនោះ នឹងនាំឲ្យបរាជ័យក្នុងមុខជំនួញមិនខាន ។ជាក់ស្តែង កាលពីប៉ុន្មានឆ្នាំមុននេះ ដើម្បីយកចិត្តកសិករ លោកស្រី យីង ទ្បាក់ អតីតនាយករដ្ឋមន្ត្រីថៃ បានដាក់ផែនការទិញស្រូវពីកសិករក្នុងតម្លៃខ្ពស់រាប់លានតោន ប៉ុន្តែដល់យកទៅលក់នៅទីផ្សារខាងក្រៅប្រទេស គឺលក់មិនចេញដោយថ្លៃខ្ពស់ជាង ធ្វើឲ្យខាតជាង១ម៉ឺន២ពាន់លានដុល្លារអាមេរិក ហើយសល់ស្តុកស្រូវរាប់លានតោនក្នុងឃ្លាំង ដែលលោកស្រីត្រូវបានតុលាការថៃកាត់ទោសរហូតដល់សព្វថ្ងៃនេះ ។
លោកថ្លែងថា ៖ « បញ្ហានេះវាកើតទ្បើងមិនមែនតែថ្លៃស្រូវអង្ករទេ នៅមានកសិផលផ្សេងៗទៀតដូចជា កៅស៊ូ ដំឡូងមី ស្វាយចន្ទី ម្រេច សណ្តែក និងល្ង ។ល។ ក៏មានបញ្ហាចោទដូចគ្នាដែរ នៅពេលផលជោរជន់នោះ តម្លៃនឹងចុះថោកជាមិនខាន ។ នេះជាស្ថានភាពប្រែប្រួលនៃតម្លៃ កសិផល ដែលតែងតែកើតមាននៅលើទីផ្សារអន្តរជាតិចៀសមិនរួច ហើយគ្មានសេដ្ឋកិច្ចណា ឬអ្នកនយោបាយណាថា ពូកែអាចដោះស្រាយបានទេ កុំជឿ គឺសុទ្ធតែជារឿងបោកប្រាស់ប៉ុណ្ណោះ ។ ជាពិសេស ប្រទេសកម្ពុជាយើងតូចមានសេដ្ឋកិច្ចនៅទន់ខ្សោយ នៅរណបប្រទេសធំ ហើយទីផ្សារខាងក្រៅប្រទេសអាចនឹងជួបហានិភ័យក្នុងការនាំចេញកសិផលនានាចៀសមិនរួច នៅពេលប្រែប្រួលថ្លៃលើទីផ្សារអន្តរជាតិ » ។
យោងតាមរបាយការណ៍អំពីស្ថានភាពនៃការនាំចេញអង្ករកម្ពុជារយៈពេល២ខែដើមឆ្នាំនេះ បង្ហាញថា បរិមាណអង្ករកម្ពុជាដែលបាននាំចេញក្នុងកំឡុងពេល២ខែឆ្នាំនេះ មានចំនួន១០៩.៥៥១តោន កើនឡើង១៤,២០% បើធៀបនឹងរយៈពេលដូចគ្នាក្នុងឆ្នាំ២០១៦ មានចំនួន៩៥.៩៤៥តោន ។
ចំណែកគោលដៅប្រទេសដែលបានទិញអង្ករកម្ពុជាច្រើនជាងគេក្នុងរយៈពេល២ខែនេះ បារាំងឈរលំដាប់លេខ១ មានចំនួន១៥.៣១៨តោន, ប៉ូឡូញលំដាប់លេខ២ មានចំនួន៩.១៣៦តោន និងអង់គ្លេស មានចំនួន៦.៣៨៥ ឈរលំដាប់លេខ៣ ៕
ចែករំលែកព័តមាននេះ