ឃើញផ្សែងហុយចេញពីឡៅតឿមន្ត្រីអគ្គីភ័យចូលទៅដល់ហួសចិត្ត…
រាជធានីភ្នំពេញ ៖ ផ្ទះលក់គ្រឿងសំអាងមួយកន្លែងហុយផ្សែងទ្រលោមខ្មួលផ្អើលអ្នកជិតខាងនិងសមត្ថកិច្ច
រាជធានីភ្នំពេញ ៖ ផ្ទះលក់គ្រឿងសំអាងមួយកន្លែងហុយផ្សែងទ្រលោមខ្មួលផ្អើលអ្នកជិតខាងនិងសមត្ថកិច្ចហៅរថយន្តពន្លត់អគ្គីភ័យមកជួយពន្លត់ទាន់ពេលវេលា ដែលបង្កឲ្យមានការភ្ញាក់ផ្អើលកាលពីវេលាម៉ោង៣និង៣០នាទីទាបភ្លឺឈានចូលថ្ងៃទី១៤ មីនា នៅហាងលក់គ្រឿងសម្អាងយីហោ ស្សែង ព្រី ស្ថិតនៅតាមបណ្តោយផ្លូវ១៣៦ ក្នុងសង្កាត់ផ្សារកណ្តាល២ ខណ្ឌដូនពេញ ។
តាមប្រភពព័ត៌មានពីស្ត្រីជាម្ចាស់ផ្ទះមានឈ្មោះ ប៉ា សុគន្ធ អាយុ៣៦ឆ្នាំ ស្នាក់នៅសង្កាត់ផ្សារកណ្តាល២ ខណ្ឌដូនពេញ បានឱ្យដឹងថា មុនពេលកើតហេតុគាត់កំពុងតែសំរាកនៅក្នុងផ្ទះជាមួយកូនស្រីម្នាក់អាយុមួយខួបនៅក្នុងបន្ទប់ឡៅតឿយ៉ាងលង់លក់ ខណៈពេលកើតហេតុក៏ស្រាប់មានតែហុយផ្សែងយ៉ាងខ្លាំងចេញមកពីឡៅតឿ ភ្លាមៗនោះគាត់បានទូរស័ព្ទហៅប្តីឲ្យមកជួយតែគាត់មិនរវីរវល់នោះទេ ទើបគាត់ស្រែកហៅឱ្យអ្នកជិតខាងជួយយកបំពង់ពន្លត់អគ្គីភ័យមកជួយពន្លត់ដោយវាយជញ្ជាំងបន្ទប់ឡៅតឿដើម្បីបាញ់បំពង់ពន្លត់អគ្គីភ័យចូល ។
ប្រជាពលរដ្ឋដែលរស់នៅជិតខាងផ្ទះកើតហេតុបានឲ្យដឹងថា ប្តីប្រពន្ធម្ចាស់ផ្ទះខាងលើនេះ សង្ស័យឈ្លោះប្រកែកគ្នា ហើយប្រពន្ធខឹងប្តីមិនព្រមត្រឡប់មកផ្ទះវិញបានដុតក្រដាសក្នុង បន្ទប់ឲ្យហុយផ្សែងធ្វើឲ្យប្តីត្រឡប់មកផ្ទះវិញតែបុរសជាប្តីនៅតែមិនព្រមមកផ្ទះវិញដដែល ទោះបីជាមានសមត្ថកិច្ច និងរថយន្តពន្លត់អគ្គីភ័យមកជួយអន្តរាគមន៍ក៏ដោយ ។
ប្រភពព័ត៌មានបានឲ្យដឹងថា បន្ទាប់ពីមានផ្សែងហុយចេញពីក្នុងផ្ទះសំអាងការផ្អើលអ្នកជិត ខាង និងសមត្ថកិច្ចមកដល់បានហៅរថយន្តពន្លត់អគ្គីភ័យរបស់ស្នងការនគរបាលរាជធានី ភ្នំពេញចំនួន៣គ្រឿងមកដល់ទើបមន្ត្រីពន្លត់អគ្គីភ័យបានចូលទៅមើលកន្លែងដែលផ្សែង ហុយនោះឃើញមានឆេះតែក្រដាសបន្តិចបន្តួចប៉ុណ្ណោះ មិនមានឆេះខូចខាតរបស់របរនៅក្នុងផ្ទះទេ ។
សមត្ថកិច្ចបានឲ្យដឹងថា អគ្គីភ័យខាងលើនេះមិនមែនបណ្តាលមកពីទុស្សេខ្សែភ្លើងទេ នៅក្នុងផ្ទះមានតែម្តាយ និងកូនស្រីអាយុ១ខួបតែប៉ុណ្ណោះ ។ រថយន្តពន្លត់អគ្គីភ័យមកដល់៣គ្រឿងតែមិនបានបាញ់ទឹកពន្លត់ទេគ្រាន់តែមន្ត្រីពន្លត់អគ្គីភ័យមកដល់ចូលទៅពិនិត្យហើយបិទកង្ហា និងយកទឹកជះតែបន្តិចបានរលត់អស់ទៅវិញ ៕
ចែករំលែកព័តមាននេះ