ខេត្តកណ្តាល ៖ នៅបន្ទប់សវនាការលេខ០៥នៃសាលាដំបូងខេត្តកណ្តាល នៅព្រឹកថ្ងៃទី០៦ តុលា នេះ បានប្រកាសសាលក្រមលេខសំណុំរឿង១៨៤៤ ក្រុមចោរឆក់រហស្សនាម អាម៉ាប់ សាមកុក…
ខេត្តកណ្តាល ៖ នៅបន្ទប់សវនាការលេខ០៥នៃសាលាដំបូងខេត្តកណ្តាល នៅព្រឹកថ្ងៃទី០៦ តុលា នេះ បានប្រកាសសាលក្រមលេខសំណុំរឿង១៨៤៤ ក្រុមចោរឆក់រហស្សនាម អាម៉ាប់ សាមកុក តំណាងរូបត្រី ។ ក្នុងសវនាការត្រឹមរយៈពេល១៥នាទីប៉ុណ្ណោះ ដោយលោក ថោង ផល្លាររង្សី ជាចៅក្រមជំនុំជំរះ និងមានការចូលរួមពីលោក ឯក ស៊ុនរស្មី ព្រះរាជអាជ្ញាររងអមសាលាដំបូងខេត្តកណ្តាលជាតំណាងអយ្យការ ។
លោក សូ សារិន ប្រធានលេខាធិការដ្ឋាន និងជាអ្នកនាំពាក្យរបស់សាលាដំបូងខេត្តកណ្តាល បានប្រាប់តាមទូរសព្ទអោយដឹងថា ក្នុងការប្រកាសសាលក្រមនេះ លោក ថោង ផល្លាររង្សី ជាចៅក្រមជំនុំជំរះ បានសម្រេចប្រកាសសាលក្រមមេខ្លោង២នាក់ផ្តន្ទាទោស៣ឆ្នាំ និង២ឆ្នាំ ដោយឡែក បក្សពួក១២នាក់ទៀត ផ្តន្ទាទោស១ឆ្នាំកន្លះ ។
គួររំលឹកដែរថា ក្រុមរហស្សនាម អាម៉ាប់ សាមកុក តំណាងអោយរូបត្រី ជាក្រុមឆក់យ៉ាងសកម្មប្រចាំខណ្ឌច្បារអំពៅ និងស្រុកកៀនស្វាយ ត្រូវបានលោក ប្លុង វិសាល ចៅក្រមស៊ើបសួរសាលាដំបូងខេត្តកណ្តាល នៅល្ងាចថ្ងៃទី៣ ខែវិច្ឆិកា ឆ្នាំ២០២១ បានសម្រេចចេញដីកាឃុំខ្លួនដាក់ពន្ធនាគារបណ្តោះអាសន្នពីបទ «អំពើលួចមានស្ថានទម្ងន់ទោស ដោយសារការប្រព្រឹត្តអំពើហិង្សា និងប្រើប្រាស់ដោយខុសច្បាប់នូវសារធាតុញៀន» តាមមាត្រា៣៥៣ ,៣៥៧នៃក្រមព្រហ្មទណ្ឌ ។
ជនរងគ្រោះក្នុងករណីនេះ មានឈ្មោះ ទី១-ឈ្មោះ ច្រឹក ជីវីន ភេទស្រី អាយុ២៦ឆ្នាំ ជនជាតិខ្មែរ មុខរបរកសិករ មានទីលំនៅភូមិខ្សុំ ឃុំបន្ទាយដែក ស្រុកកៀនស្វាយ ខេត្តកណ្ដាល។ ទី២-ឈ្មោះ សួន បូលីន ភេទប្រុស អាយុ២៨ឆ្នាំ ជនជាតិខ្មែរ និងទី៣-ឈ្មោះ ជា ស្រីមុំ ភេទស្រី អាយុ៤១ឆ្នាំ ជនជាតិខ្មែរ មុខរបរកសិករ មានទីលំនៅភូមិអង្គរជ័យ ឃុំបន្ទាយដែក ស្រុកកៀនស្វាយ ខេត្តកណ្តាល ។
ជនជាប់ចោទទី១-ឈ្មោះ អឿន សីហា ភេទប្រុស អាយុ១៧ឆ្នាំ មុខរបរមិនពិតប្រាកដ មានទីលំនៅភូមិយកបាត្រ សង្កាត់ក្បាលកោះ ខណ្ឌច្បាលអំពៅ រាជធានីភ្នំពេញ។ ទី២-ឈ្មោះ ប៊ុណ្ណា រដ្ឋា ហោថា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិបាយ៉ាប សង្កាត់ឃ្មួញ ខណ្ឌសែនសុខ រាជធានីភ្នំពេញ ។ ទី៣-ឈ្មោះ ហ៊ុន វិសាល ភេទប្រុស អាយុ១៦ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិស្វាយរលំ សង្កាត់ស្វាយរំលំ ក្រុងតាខ្មៅ ខេត្តកណ្ដាល ។ ទី៤-ឈ្មោះសេក រ៉ូនី ហៅចន ភេទប្រុស អាយុ១៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅសង្កាត់ក្រាំងធ្នុង ខណ្ឌសែនសុខ រាជធានីភ្នំពេញ ។
ទី៥-ឈ្មោះរ៉េត រដ្ឋា ហៅរដ្ឋា ភេទប្រុស អាយុ១៦ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅភូមិរបោះអង្កាញ់ សង្កាត់ព្រែកឯង ខណ្ឌច្បារអំពៅ រាជធានីភ្នំពេញ ។ ទី៦-ឈ្មោះម៉ុន សុបញ្ញា ហៅញ៉ា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅដើមចាន់ សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។ ទី៧-ឈ្មោះឈាង ឈៀវ ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ភូមិទួល សង្កាត់ពន្សាំង ខណ្ឌព្រែកព្នៅ រាជធានីភ្នំពេញ ។ ទី៨-ឈ្មោះកឺម ម៉ាណែត ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅក្ដីតាកុយ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ ។ ទី៩-ឈ្មោះឡាច ស្រីកុល ភេទស្រី អាយុ១៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅសថ្កាត់បឹងកក់ ខណ្ឌទួលគោក រាជធានីភ្នំពេញ ។
ទី១០-ឈ្មោះចាន់ ស្រីពីន ភេទស្រី អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅចង់ព្តែក សង្កាត់ព្តែកឯង ខណ្ឌច្បារអំពៅ រាជធានីភ្នំពេញ ។ទី១១-ឈ្មោះឃឹម សុវិជ្ជា ភេទប្រុស អាយុ១៨ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិអណ្ដូងមួយ សង្កាត់កោះរកា ខណ្ឌព្រែកព្នៅ រាជធានីភ្នំពេញ ។ ទី១២-ឈ្មោះវ៉ែនហេង រដ្ឋា ហៅម៉ាប់ ភេទប្រុសអាយុ១៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។ និងទី១៣-ឈ្មោះសុខ ពៅ ភេទប្រុស អាយុ១៥ឆ្នាំ ជនជាតិខ្មែរ មុខរបរ មិនពិតប្រាកដ មានទីលំនៅសង្កាត់ឃ្មួញ ខណ្ឌសែនសុខ រាជធានីភ្នំពេញ។
ទី១៤-ឈ្មោះ មាស វឌ្ឍនា ហៅ នាថ ភេទប្រុស អាយុ១៧ឆ្នាំ និងទី១៥ ឈ្មោះ ធី ម៉ា ហៅឡា ភេទប្រុស អាយុ១៧ឆ្នាំ ។ នគរបាលស្រុកកៀន ស្វាយ បានអោយដឹងថា ការឃាត់ខ្លួនក្រុមឆក់នោះធ្វើឡើងនៅថ្ងៃទី១ ខែវិច្ឆិកា ឆ្នាំ២០២១ នៅស្រុកកៀនស្វាយ និងក្នុងផ្ទះសំណាក់ សីហៈ ស្ថិតនៅខណ្ឌច្បារអំពៅ រាជធានីភ្នំពេញ ។
តាមចម្លើយសារភាពរបស់ជនសង្ស័យបានឆ្លើយសារភាពនៅចំពោះមុខសមត្ថកិច្ច ពួកខ្លួនរួមជាមួយបក្ខពួកចំនួន១៣នាក់ទៀត បានធ្វើសកម្មភាពឆក់កាបូប និងទូរស័ព្ទដៃពីអ្នកធ្វើដំណើរតាមបណ្តោយផ្លូវជាតិលេខ១ ចំនួនពីរលើក។ លើកទី១នៅស្រុកកៀនស្វាយ ខេត្តកណ្ដាលបានទូរស័ព្ទដៃមួយគ្រឿងម៉ាក់IPHONE 7PLUS ពណ៌ ប្រាក់រៀលចំនួន១៣០០០រៀល(មួយម៉ឺនបីពាន់រៀល)។ លើកទី២ ក្នុងឃុំដីឥដ្ឋ ស្រុកកៀនស្វាយ ខេត្តកណ្ដាល បានទូរស័ព្ទដៃ ០១គ្រឿង ម៉ាកVIVO ពណ៌ខៀវ និងកន្លងមកក្រុមបក្ខពួករបស់ខ្លួនបានធ្វើសកម្មភាពឆក់យ៉ាងសកម្ម ក្នុងភូមិសាស្ត្រខណ្ឌច្បារអំពៅ រាជធានីភ្នំពេញ រហូតដល់ស្ពានអ្នកលឿង និងបណ្តោយផ្លូវ១១៦អា ផ្លូវ១១០ ជាច្រើនលើកតែមិនចាំថ្ងៃ ក្នុងខែកញ្ញា ខែតុលា ខែវិច្ឆិការ ឆ្នាំ២០២១។
បន្ទាប់ពីទទួលបានចម្លើយសារភាពរបស់ជនសង្ស័យខាងលើរួចនៅវេលាម៉ោង១៤និង០០នាទី ថ្ងៃទី១ ខែវិច្ឆិការ ឆ្នាំ២០២១ នគរបាលស្រុកកៀនស្វាយ សហការជាមួយនគរបាលខណ្ឌច្បារអំពៅ បន្តធ្វើការឃាត់ខ្លួនជនសង្ស័យបានចំនួន១៣នាក់ ស្រី០២នាក់ បន្ថែមទៀតនៅផ្ទះសំណាក់យីហោ សីហះ ស្ថិតនៅខណ្ឌច្បារអំពៅ រាជធានីភ្នំពេញ រួមទាំងវត្ថុតាង ។
ចែករំលែកព័តមាននេះ