ខេត្តកំពង់ឆ្នាំង ៖ គិតមកដល់ពេលនេះមានរយៈពេលជាង១០ថ្ងៃហើយ ដែលករណីមន្ត្រីយោធាម្នាក់យកកាំភ្លើងអាការ បាញ់ប្រហារទៅលើគូទំនាស់ បណ្តាលឲ្យម្នាក់ស្លាប់
ខេត្តកំពង់ឆ្នាំង ៖ គិតមកដល់ពេលនេះមានរយៈពេលជាង១០ថ្ងៃហើយ ដែលករណីមន្ត្រីយោធាម្នាក់យកកាំភ្លើងអាការ បាញ់ប្រហារទៅលើគូទំនាស់ បណ្តាលឲ្យម្នាក់ស្លាប់ និងម្នាក់រងរបួសធ្ងន់ធ្ងរ ត្រូវបានដឹក ទៅសង្គ្រោះនៅមន្ទីរពេទ្យក្រុងភ្នំ ពេញ។ ប៉ុន្តែជនដៃដល់នៅមិនទាន់ចាប់ខ្លួននៅឡើយ ធ្វើឲ្យក្រុមគ្រួសារជនរងគ្រោះ កំពុងព្រួយបារម្ភថា ជនដៃដល់នៅ តែអាចគេចពីសំណាញ់ច្បាប់ ចំណែកអ្នកស្លាប់នៅតែទទួលភាពអយុត្តិធម៌បំផុត។ នៅរសៀលថ្ងៃទី១៣ ខែមីនា ឆ្នាំ២០១៧ ភាគីនៃគូនំនាស់ម្ខាងបានរៀបរាប់ថា គាត់ឈ្មោះ ឃឹម ប៊ុនលី ហៅប៊ុន អាយុ៦០ឆ្នាំ គាត់ជាម្តាយជនរងគ្រោះ ឈ្មោះ សោម វណ្ណា អាយុ១៨ឆ្នាំ។
គាត់មានទីលំនៅភូមិអន្លុងត្នោត ឃុំលង្វែក ស្រុកកំពង់ត្រឡាច។ នៅថ្ងៃកើតហេតុ ក្រោយពីបាញ់ត្រូវ ស្ត្រីម្នាក់ដែលជាម្តាយធំរបស់មិត្តភក្ដិកូនគាត់ បណ្តាលឲ្យរងរបួសមក កូនប្រុសគាត់បានទៅជួយលើក ស្រាប់តែត្រូវទាហានរូបនោះបាញ់បន្ថែម មកលើកូនប្រុសគាត់បណ្តាលឲ្យរងរបួសធ្ងន់ និងស្លាប់តែម្តង។ ស្ត្រីដែលបាន អះអាងថា ជាម្តាយជនរងគ្រោះ បានយំខ្សឹកខ្សួលប្រាប់តាមទូរសព្ទ័ថា ប្តីគាត់បានដាក់ពាក្យប្តឹងទៅតុលាការហើយ តែមក ដល់ពេលនេះស្ងាត់ឈឹង មិនទាន់ឃើញមាននរណាហៅសួរនាំអ្វីនោះទេ។
សព្វថ្ងៃគាត់ក្រីក្រខ្លាំងណាស់ សព្វថ្ងៃគាត់នៅ ម្នាក់ឯងព្រោះប្តីគាត់បានបែកគ្នាតាំងពីកូនដែលស្លាប់នៅក្នុងពោះមកម្លេះ មកដល់ពេលនេះ១៨ឆ្នាំហើយ ។ តែពេលមានរឿង ប្តីគាត់បានមកជួយធ្វើបុណ្យសពកូន និងជួយធ្វើពាក្យបណ្តឹងដែរ តែមកដល់ថ្ងៃនេះមិនទាន់ឃើញខាង ណា ហៅសួរនាំអ្វីឡើយ។ ហេតុនេះ គាត់សូមអង្វរដល់តុលាការ អាជ្ញាធរខេត្ត និងសម្តេចតេជោ ហ៊ុន សែន សូមជួយរក យុត្តិធម៌ឲ្យកូនប្រុសគាត់ផង កុំឲ្យកូនប្រុសគាត់ស្លាប់ទៅយ៉ាងអយុត្តិធម៌បែបនេះ។
សូមរំឮកថា កាលពីរំលងអាធ្រាត្រ ឈានចូលថ្ងៃទី០២ ខែមីនា ឆ្នាំ២០១៧ នៅផ្ទះឈ្មោះ ប្រាក់ នឿន មានទីលំនៅភូមិស្ពានពោធិ ឃុំសេដ្ឋី ស្រុកសាមគ្គីមាន ជ័យ មានការផឹកស៊ីមួយរវាងក្មេងៗនៅផ្ទះក្បែគ្នា។ ការផឹកស៊ីបានជជែកគ្នារំខានដល់អ្នកជិតខាង ពេលនោះមានមន្ត្រី យោធាម្នាក់ឈ្មោះ ហែម សទ្ធា ឋានៈជំនួយការសុខាភិបាល នៅកងពលអន្តរាគមន៍ពិសេស លេខ១លង្វែក បានចេញ មកហាមឃាត់ ហើយក៏បានកើតជម្លោះ ពេលនោះមន្ត្រីយោធាឈ្មោះ ហែម សទ្ធា បានយកកាំភ្លើងអាការ មកបាញ់រះ ជាច្រើនគ្រាប់ បណ្តាលឲ្យត្រូវយុវជនឈ្មោះ សោម វណ្ណា អាយុ១៨ឆ្នាំធ្លាយពោះស្លាប់ ពេលដឹកទៅសង្គ្រោះនៅមន្ទីរពេទ្យ ចំណែកស្ត្រីម្នាក់ឈ្មោះ តុល យាន ត្រូវចំនួន២គ្រាប់រងរបួសធ្ងន់ត្រូវបានដឹកទៅសង្គ្រោះនៅមន្ទីរពេទ្យក្រុងភ្នំពេញ។
ក្រោយ ពេលកើតហេតុ ជនដៃដល់បានរត់គេចខ្លួនបាត់ ព្រឹកឡើងសមត្ថកិច្ចបានពិនិត្យកន្លែងកើតហេតុ រកឃើញនៅមុខផ្ទះជនដៃ ដល់ ឃើញមានសំបកគ្រាប់អាការ ចំនួន៤គ្រាប់ និងនៅផ្ទះជនរងគ្រោះឃើញមានក្បាលគ្រាប់១គ្រាប់។ ប្រភពក្រៅផ្លូវការ បានឲ្យដឹងថា បច្ចុប្បន្ន ជនដៃដល់ដែលកំពុងគេចខ្លួន បានចំណាយប្រាក់ជាង២ម៉ឺនដុល្លារ ឲ្យអ្នករត់ការបញ្ចប់រឿងក្តីនេះ ក្រៅប្រព័ន្ធតុលាការ ត្រង់ពិតឬយ៉ាងណានៅមិនទាន់ច្បាស់នោះទេ តែបើពិតជាដូចបែបនេះមែនច្បាប់ស្រុកខ្មែរ នឹងទៅជាយ៉ាងណា៕
ចែករំលែកព័តមាននេះ