ឈ្នះកាស៊ីណូ១០ម៉ឺនដុល្លាររួច ថៅកែចោទថា «លេងល្បិច»
ខេត្តព្រះសីហនុ ៖ មេមិននៅក្រោមពងទេ សូមជ្រាប ! នេះជាសម្តីមេល្បែង ។ បើនិយាយពីកាស៊ីណូវិញ គេមិនដែលល្បីថាអ្នកចូលលេងឈ្នះធ្វើសេដ្ឋីនោះទេ ក្រៅពីបោសគូទខោ ឬ
ខេត្តព្រះសីហនុ ៖ មេមិននៅក្រោមពងទេ សូមជ្រាប ! នេះជាសម្តីមេល្បែង ។ បើនិយាយពីកាស៊ីណូវិញ គេមិនដែលល្បីថាអ្នកចូលលេងឈ្នះធ្វើសេដ្ឋីនោះទេ ក្រៅពីបោសគូទខោ ឬលក់អស់ដីធ្លី ផ្ទះសម្បែង យកលុយស្រង់ដើម ទីបំផុតធ្លាក់ខ្លួនរហេមរហាម ។
សំណុំរឿងក្តៅៗមួយបានកើតឡើង ដោយសារតែអ្នកចូលលេងល្បែងក្នុងកាស៊ីណូយ៉ាឌូលី ក្រុងព្រះសីហនុ បានលេងឈ្នះប្រមាណជាង១០ម៉ឺនដុល្លារ ក៏ត្រូវថៅកែចោទថាលេងល្បិច ហើយចាប់បង្ខាំងដោយខុសច្បាប់ ខណៈពេលមនុស្សចំនួន១៣នាក់ក្នុងនោះស្ត្រី៣នាក់ មកពីខេត្តកំពត បាននាំគ្នាចូលលេងល្បែងក្នុងកាស៊ីណូខាងលើ ។ ពួកគេត្រូវបានកម្លាំងនគរបាលប្រតិបត្តិការគ្រប់គ្រងកាស៊ីណូរបស់ក្រសួងមហាផ្ទៃ ចាប់ខ្លូនកាលពីយប់ថ្ងៃទី១១ ខែមីនា ។
ការចាប់បង្ខាំងទុកនេះ ក៏បានបង្កឲ្យមានការភ្ញាក់ផ្អើលពេញក្រុងព្រះសីហនុផងដែរ ។
សាច់ញាតិក្រុមជនចំណាប់ខ្មាំងម្នាក់ គឺ យុវជន គឹម សាលវិសិដ្ឋ បាននិយាយរៀប រាប់ថា ពួកគេទាំងអស់គ្នារស់នៅឯខេត្តកំពត បាននាំគ្នាមកកាន់ខេត្តព្រះសីហនុ ហើយចូលលេងល្បែងក្នុងកាស៊ីណូយ៉ាឌួលី និងបានឈ្នះលុយជាង១០ម៉ឺនដុល្លារ ។ ក្រោយពីបានឈ្នះក៏មានបំណងឈប់លេង ហើយនាំគ្នាយកកាក់លុយកាស៊ីណូដែលឈ្នះនោះទៅប្តូរយកលុយសុទ្ធដើម្បីត្រឡប់ទៅវិញ ស្រាប់តែពួកគេទាំងអស់គ្នាត្រូវថៅកែកាស៊ីណូបញ្ជាឲ្យក្រុមសន្តិសុខ ហៅចូលបន្ទប់ម៉ាស៊ីនត្រជាក់ រួចហើយធ្វើការឃាត់ខ្លូនតែម្តង ដោយចោទថា លេងល្បិចក្នុងកាស៊ីណូ ។
បន្ទាប់មក បាននាំខ្លួនពួកគេចេញតាមទ្វារក្រោយយកទៅបង្ខាំងទុកនៅទីស្នាក់ការក្រុមប្រតិបត្តិការគ្រប់គ្រងកាស៊ីណូប្រចាំខេត្តព្រះសីហនុ ព្រមទាំងធ្វើការដកហូតលុយដែលមានជាប់នឹងខ្លូនពីពួកគេប្រមាណ១២៣.០០០ដុល្លារ រថយន្តចំនួន២គ្រឿង មួយគ្រឿងម៉ាកឡិចស៊ីស RX៣៣០ និងមួយគ្រឿងទៀតម៉ាកហាយឡែនឌ័រ ព្រមទាំងទូរស័ព្ទជាង២០គ្រឿង ។
ទាក់ទងនឹងបញ្ហានេះ លោក ដៀប ឆាយ ជាអ្នកមើលការខុសត្រូវក្នុងការស៊ីណូយ៉ាឌូលី បានធ្វើការបញ្ជាក់ថា រឿងចាប់ខ្លួននេះគឺជារឿងរបស់ថៅកែ ចំណែកគាត់មិនដឹងអ្វីទេ ហើយក៏មិនហ៊ានធ្វើអត្ថាធិប្បាយអ្វីដែរ ។
ដោយឡែក លោក ប៉ឹក សាលិន ប្រធានស្នាក់ការប្រតិបត្តិការគ្រប់គ្រងកាស៊ីណូប្រចាំខេត្តព្រះសីហនុ ពុំអាចសុំការបំភ្លឺបានទេ ដោយសារទូរស័ព្ទលោកពុំមានអ្នកទទួល បើទោះបីអ្នកយកព័ត៌មានព្យាយាមទូរស័ព្ទជាច្រើនលើកច្រើនសាយ៉ាងណាក្តី ។ ដោយសារមិនអាចស្វែងរកអ្នកបំភ្លឺបាន ធ្វើឱ្យព័ត៌មាននេះកំពុងតែក្លាយក្អែក១ជាក្អែក១០ទៅហើយ ។
មន្ត្រីអង្គការការពារសិទ្ធិមនុស្សប្រចាំខេត្តព្រះសីហនុនិយាយថា ចៅកែកាស៊ីណូធ្វើបែបនេះគឺជាការរំលោភបំពានទៅស្រុងទៅលើសិទ្ធិសេរីភាពរបស់មនុស្សពីព្រោះថា បើនិយាយពីនីតិវិធីនែច្បាប់ ការចាប់ខ្លួនជនណាម្នាក់បាន លុះត្រាតែមានដីកាចេញពីតុលាការ ឬការចុះបញ្ជាដោយផ្ទាល់ពីសំណាក់ព្រះរាជអាជ្ញា គឺចាប់ក្នុងបទល្មើសជាក់ស្តែង ទើបជារឿងត្រឹមត្រូវ ប៉ុន្តែនេះថៅកែកាស៊ីណូចាប់មនុស្សឆៅៗតែម្តង ។
អ្វីដែលគួរឲ្យកត់សម្គាល់ផងដែរនោះ គឺច្បាប់កាស៊ីណូដែលរាជរដ្ឋាភិបាលបានចេញអាជ្ញាប័ណ្ណឲ្យ បញ្ជាក់យ៉ាងច្បាស់ថា កាស៊ីណូ បើកសម្រាប់តែជនជាតិបរទេសចូលលេងតែប៉ុណ្ណោះ ហើយហាមដាច់ខាតមិនអនុញ្ញាតឲ្យជនជាតិខ្មែរចូលលេងទេ ។ ប៉ុន្តែកាស៊ីណូមួយនេះ បែរជាអនុញ្ញាតឲ្យជនជាតិខ្មែរចូលលេងយ៉ាងគគ្រឹកគគ្រេងហើយប្រើល្បិច បើសិនជាអ្នកលេងឈ្នះច្រើនពេក ទំនងគ្មានលុយសងចោទថាលេងប្រើល្បិច ក៏ចាប់ខ្លួនអ្នកឈ្នះទាំងនោះតែម្តង ដើម្បីបំភិតបំភ័យជនរងគ្រោះក្នុងគោលបំណងជំរិតយកប្រាក់វិញ ហើយករណីបែបនេះដូចជាមាន២ទៅ៣ដងមកហើយក្នុងពេលកន្លងមក ។
ទោះជាយ៉ាងណាក៏ដោយ មន្ត្រីអង្គការសង្គមស៊ីវិលដដែលនោះបញ្ជាក់ថា ជុំវិញបញ្ហានេះលោកនឹងធ្វើការស៊ើបអង្កេតស្វែងរកការពិតដើម្បីចាត់ការតាមនីតិវិធី ។
គួរបញ្ជាក់ថា នៅខេត្តព្រះសីហនុបច្ចុប្បន្នមានកាស៊ីណូចំនួន២៣ទីតាំង កំពុងធ្វើសកម្មភាពយ៉ាងរលូន បើកចំហឲ្យជនជាតិខ្មែរចូលលេងផ្គើនទៅនឹងប្រសាសន៍សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដែលកន្លងមក សម្តេចបានធ្វើការព្រមានត្រង់ៗចំពោះក្រុមហ៊ុនបើកល្បែងកាស៊ីណូទូទាំងប្រទេស គឺហាមផ្តាច់មិនអនុញ្ញាតឲ្យជនជាតិខ្មែរចូលលេងទេ។
ចំណែកនៅក្នុងអាជ្ញាប័ណ្ណអនុញ្ញាតច្បាប់ធ្វើអាជីវកម្មក៏បានបញ្ជាក់យ៉ាងច្បាស់លាស់ផងដែរ ដូចនេះបើសិនជាមានកាស៊ីណូណាមួយអនុវត្តផ្ទុយពីច្បាប់អនុញ្ញាត គឺប្រឈមនឹងការបិទអាជីវកម្មទាំងស្រុងតែម្តង ។
មិនតែប៉ុណ្ណោះ អគ្គស្នងការដ្ឋាននគរបាលជាតិ បានដាក់កម្លាំងនាយកដ្ឋានសន្តិសុខផ្ទៃក្នុងចុះមកតាមដាននិងហាមមិនឲ្យខ្មែរចូលលេង ប៉ុន្តែផ្ទុយទៅវិញខ្មែរអាចចូលលេងម៉ាសេរី ដល់ពេលខ្មែរឈ្នះទើបឃើញកងកម្លាំងនេះមកឃាត់ខ្លួនដោយចោទថា អ្នកលេងទាំងនោះប្រើល្បិចទៅវិញ ហើយថែមទាំងបានឃាត់ខ្លួនមនុស្សដោយពុំមានសុំដីកាពីព្រះរាជអាជ្ញាឡើយ ។
រហូតមកដល់ម៉ោង១០ព្រឹកថ្ងៃទី១៣ ខែមីនា ជនជាតិខ្មែរត្រូវបានឃាត់ខ្លួននោះ ត្រូវបានដោះលែងជាបណ្តើរៗវិញហើយ ដោយពុំមានខាងណាមួយធ្វើការបំភ្លឺច្បាស់លាស់ជុំវិញបាតុភាពនេះទេ ៕
ចែករំលែកព័តមាននេះ