ពលរដ្ឋសម្រុកទិញវិទ្យុរហូតអស់ពីហាង ក្រោយការណែនាំពីនាយករដ្ឋមន្ត្រីថៃ
ថៃ ៖ ប្រជាជនស្ថិតក្នុងខេត្តភាគឦសានប្រទេសថៃ បានប្រញាប់ប្រញាល់សម្រុកនាំគ្នាទៅទិញវិទ្យុ
ថៃ ៖ ប្រជាជនស្ថិតក្នុងខេត្តភាគឦសានប្រទេសថៃ បានប្រញាប់ប្រញាល់សម្រុកនាំគ្នាទៅទិញវិទ្យុ
ថៃ ៖ ប្រជាជនស្ថិតក្នុងខេត្តភាគឦសានប្រទេសថៃ បានប្រញាប់ប្រញាល់សម្រុកនាំគ្នាទៅទិញវិទ្យុ បន្ទាប់ពីនាយករដ្ឋមន្ត្រី Prayut Chan-o-cha បានណែនាំទៅកាន់អ្នកស្រុកក្នុងខេត្តដែលរងគ្រោះដោយទឹកជំនន់ថា វិទ្យុគឺជាបណ្តាញដែលអាចទុកចិត្តបានសម្រាប់ព័ត៌មានអំពីបញ្ហាទឹកជំនន់។
លោក Jin Seng អាយុ៥៥ឆ្នាំ ម្ចាស់ហាងលក់គ្រឿងអេឡិចត្រូនិច Tia Sae Huat ស្ថិតនៅផ្លូវ Mitraphap Highway ក្នុងសង្កាត់ Muang បាននិយាយថា ហាងរបស់គាត់គឺជាហាងលក់ដុំវិទ្យុក្នុងស្រុកម៉ាក Thanin អស់រយៈពេល៣ទសវត្សមកហើយ។ ហើយប្រភេទវិទ្យុប្រើថ្មធម្មតា ធ្លាប់មានការពេញនិយមខ្លាំងណាស់ ជាពិសេសស៊េរី TF-268 ដែលអាចទទួលបានទាំងការផ្សាយ FM និង AM។ ប៉ុន្តែវិទ្យុបានបាត់បង់ប្រជាប្រិយភាពកាលពី២០ឆ្នាំមុន ដោយសារមនុស្សងាកទៅតាមដានព័ត៌មាន និងស្តាប់តន្ត្រីតាមទូរស័ព្ទដៃជំនួសវិញ។ លើកលែងតែកសិករមកពីស្រុកផ្សេងទៀត ដែលតែងតែមកជាវយកទៅស្តាប់។
កាលពីថ្ងៃទី៣ ខែតុលា លោកនាយករដ្ឋមន្ត្រី Prayut Chan-o-cha បានប្រាប់ទៅកាន់អភិបាលខេត្តទាំងអស់ នៅក្នុងសន្និសីទទូរគមនាគមន៍តាមប្រព័ន្ធអ៊ីនធឺណិតថា ក្នុងករណីប្រព័ន្ធទំនាក់ទំនងផ្សេងទៀតជាប់គាំង ពួកគេអាចចេញការព្រមានអំពីបញ្ហាទឹកជំនន់តាមរយៈស្ថានីយ៍វិទ្យុ ដែលមនុស្សអាចស្តាប់តាមវិទ្យុត្រង់ស៊ីស្ទ័រ (Transistor Radio)។ លោកបន្តថា ជាបទពិសោធន៍វិទ្យុដំណើរការបានយ៉ាងល្អ អំឡុងពេលគ្រោះទឹកជំនន់កាលពីឆ្នាំ ២០១១ នៅពេលដែលមានការដាច់ចរន្តអគ្គីសនីយ៉ាងទូលំទូលាយ។
ការអត្ថាធិប្បាយរបស់នាយករដ្ឋមន្ត្រីថៃ ត្រូវបានចែកចាយ និងផ្ទុះឡើងលើបណ្តាញទំនាក់ទំនងសង្គម ដោយមានអ្នករិះគន់ចំអក ចំពោះការប្រើប្រាស់បច្ចេកវិទ្យាហួសសម័យបែបនេះ។ ទោះយ៉ាងណាក៏ដោយ អ្នកនាំពាក្យរដ្ឋាភិបាលបានទទូចថា មនុស្សជាច្រើននៅតែស្តាប់វិទ្យុបែបចាស់ ជាពិសេសនៅតាមជនបទ។
ជាក់ស្តែង កាលពីថ្ងៃទី៥ ខែតុលា អតិថិជនបានសម្រុកនាំគ្នាមកទិញវិទ្យុត្រង់ស៊ីស្ទ័រតាមបណ្តាហាងជាច្រើន។ លោក Jin Seng បាននិយាយថា គាត់កំពុងលក់វិទ្យុ TF-268 ស៊េរី Thanin ក្នុងតម្លៃ ២៩០បាត ដែលស្មើនឹង ៧.៧៥ដុល្លារក្នុង១គ្រឿង។ ប៉ុន្តែដោយសារតម្រូវការភ្លាមៗក្នុងកម្រិតខ្ពស់ ការលក់វិទ្យុប្រភេទនេះ ត្រូវអស់ពីហាងតែម្តង។
ដោយឡែក លោកស្រី Arun Silpa អាយុ៧១ឆ្នាំ ដែលមានហាងទូទៅស្រុក Kham Thale So ខេត្តនគររាជសីមា (Nakhon Ratchasima) បាននិយាយថា «កាលពីម្សិលមិញ ខ្ញុំមានការភ្ញាក់ផ្អើលជាខ្លាំង នៅពេលអតិថិជនសម្រុកមកទិញវិទ្យុរហូតទាល់តែអស់ពីក្នុងហាងរបស់ខ្ញុំ ដោយមិនដឹងមកពីមូលហេតុអ្វីទេ រហូតទាល់តែខ្ញុំដឹងព័ត៌មានអំពីការលើកឡើងរបស់លោកនាយករដ្ឋមន្ត្រី»៕ (ប្រភពពីបាងកកប៉ុស្តិ៍ និង Nation Thailand)
ចែករំលែកព័តមាននេះ