បុរសជាតួសម្ដែងម្នាក់ ខណៈពេលចេញពីផឹកស៊ីត្រឡប់មកផ្ទះវិញ ក៏ស្រាប់តែត្រូវជនសង្ស័យមួយក្រុមធ្វើសកម្មភាពវា.យបណ្ដាលឲ្យ
រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា បុរសជាតួសម្ដែងម្នាក់ ខណៈពេលចេញពីផឹកស៊ីត្រឡប់មកផ្ទះវិញ ក៏ស្រាប់តែត្រូវជនសង្ស័យមួយក្រុមធ្វើសកម្មភាពវា.យបណ្ដាលឲ្យរងរបួស ហើយយកទូរស័ព្ទ និងកាបូបបានសំរេច និងនាំគ្នារត់គេចខ្លួនបាត់ស្រមោលអស់ទៅ បង្កឱ្យមានការភ្ញាក់ផ្អើលកាលពីវេលាម៉ោង៣និង៣០នាទីទៀបភ្លឺ ថ្ងៃទី៦ ខែតុលា ឆ្នាំ២០២២ នៅចំណុចម្តុំផ្សារដីថ្មី ស្ថិតក្នុងសង្កាត់ស្ទឹងមានជ័យទី៣ ខណ្ឌមានជ័យ ។
សេចក្តីរាយការណ៍បន្តថា ជនរងគ្រោះខាងលើមានឈ្មោះ សុង ភារ៉ា ភេទប្រុស អាយុ២៩ឆ្នាំ មុខរបរតារាសម្តែង ស្នាក់នៅផ្ទះជួល ម្តុំផ្សារដីថ្មី ក្នុងសង្កាត់ស្ទឹងមានជ័យទី៣ ខណ្ឌមានជ័យ។ ហើយរបស់ដែលបាត់បង់មាន លុយ៨ម៉ឺនរៀល កាតគ្រីម៉ូតូ២សន្លឹក អត្តសញ្ញាណប័ណ្ឌសញ្ជាតិខ្មែរ១សន្លឹក និងទូរស័ព្ទដៃម៉ាក oppo A31 មួយគ្រឿងផងដែរ។
តាមការរៀបរាប់របស់ជនរងគ្រោះ បានអោយដឹងថា មុនពេលកើតហេតុ ពួកគាត់មានគ្នា៣នាក់ ក្នុងនោះប្រុស២នាក់ និងស្រីម្នាក់ បានជិះម៉ូតូ២គ្រឿងចេញពីកន្លែងហូបចុកផឹកស៊ី នៅម្តុំផ្លូវ២០០២ ក្នុងគោលបំណងត្រឡប់មកផ្ទះជួលវិញ នៅម្តុំផ្សារដីថ្មី។ លុះពេលធ្វើដំណើរមកដល់ផ្ទះជួលហើយ រូបគាត់ក៏បានយកម៉ូតូចូលទុកក្នុងបន្ទប់ រួចហើយក៏ដើរជូនមិត្តភ័ក្តិស្រីម្នាក់ទៀតដែលមកជាមួយគ្នាឡើងម៉ូតូកង់បីត្រឡប់ទៅផ្ទះវិញ។
ជនរងគ្រោះបន្តថា នៅពេលដែលមិត្តភក្តិស្រីជិះម៉ូតូកង់បីចេញទៅបាត់ ស្រាប់តែមានក្រុមជនសង្ស័យចំនួន៣ទៅ៤នាក់ បាននាំគ្នាមកព័ទ្ធ ហើយវា.យទៅលើរូបគាត់ បណ្តាលឲ្យរងការបែកមាត់ និងបែកខ្ទង់ច្រមុះហូរឈា.ម បន្ទាប់មកក្រុមជនសង្ស័យទាំងនោះ ក៏បានលូកយកកាបូបលុយ និងទូរស័ព្ទដៃម៉ាក oppo A31 បានហើយ ក៏នាំគ្នារត់គេចខ្លួនបាត់ស្រមោលអស់តែម្ដង។
ពាក់ព័ន្ធក្នុងហេតុការណ៍ខាងលើនេះដែរ ជនរងគ្រោះបានស្រែកឆោឡោថា «ចោរៗ» ដែរ ដែលមិនមានអ្នកជួយចេញជួយនោះទេ គឺមានតែមិត្តភ័ក្ដិម្នាក់ចេញមកដល់ តែជនសង្ស័យនាំគ្នារត់គេចខ្លួនបាត់ស្រមោលអស់ទៅហើយ។
ក្រោយពេលកើតហេតុ ជនរងគ្រោះត្រូវបានមិត្តភ័ក្ដិជួយដឹកយកទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលស្ទឹងមានជ័យទី៣ ដើម្បីអោយសមត្ថកិច្ចជួយស្រាវជ្រាវរកជនសង្ស័យមកចាត់ការតាមនីតិវិធី និងយករបស់ទ្រព្យគាត់មកវិញផងដែរ៕
ចែករំលែកព័តមាននេះ