ឯកឧត្តម ថោង ខុន បានទទួលគ្រឿងឥស្សរិយ យសខ្ពស់បំផុតសម្រាប់ចលនាអូឡាំពិក
- ភ្នំពេញ
រាជធានីភ្នំពេញ ៖ លោកបណ្ឌិតថោង ខុនអនុប្រធានអចិន្ត្រៃយ៍នៃគណៈកម្មាធិការជាតិរៀបចំការ
រាជធានីភ្នំពេញ ៖ លោកបណ្ឌិតថោង ខុនអនុប្រធានអចិន្ត្រៃយ៍នៃគណៈកម្មាធិការជាតិរៀបចំការប្រកួតកីឡាសុីហ្គេមលើកទី៣២ ឆ្នាំ២០២៣ហៅកាត់ថា CAMSOC និងជាប្រធានគណៈកម្មាធិការជាតិអូឡាំពិកកម្ពុជា បានទទួលគ្រឿងឥស្សរិយយសថ្នាក់ខ្ពស់បំផុត«ខ្សែកមាស» ពីក្រុមប្រឹក្សាអូឡាំពិកអាស៊ី (OCA) ដើម្បីជាកិត្តិយសចំពោះការលះបង់របស់ឯកឧត្តមសម្រាប់ចលនាអូឡាំពិក និងជំរុញឲ្យកីឡារីកចម្រើនរហូតទទួលរៀបចំព្រឹត្តិការណ៍អន្តរជាតិធំៗ គឺកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ និងការប្រកួតកីឡាអូឡាំពិកយុវជនអាស៊ី ឆ្នាំ២០២៩នៅកម្ពុជា។
ក្រោយពីបានទទួលមេដាយនេះភ្លាមៗ ឯកឧត្តមបណ្ឌិតថោង ខុន បានមានប្រសាសន៍ថា ជាមេដាយដែលបានផ្ដល់កិត្តិយសយ៉ាងក្រៃលែងដល់កម្ពុជា ។ បន្ថែមលើសពីនេះក៏ជាមេដាយសម្រាប់ការផ្ដល់កិត្តិយសដល់កីឡាករ កីឡាការិនី គ្រូបង្វឹកសហព័ន្ធកីឡាជាតិនិងក្រសួងអប់រំ យុវជន និងកីឡាទៀតផង ។ នេះក៏ជាកិត្តិយសរាល់ការចូលរួមពីចលនាអូឡាំពិកទាំងអស់ ដែលបានគាំទ្រចលនាអូឡាំពិកនៅកម្ពុជា។
ដោយឡែក ឯកឧត្តម វ៉ាត់ ចំរើន អគ្គលេខាធិការនៃគណៈកម្មការជាតិអូឡាំពិកកម្ពុជា(NOCC) ក៏បានចូលរួមអបអរសាទរដល់ការទទួលបានគ្រឿងឥស្សរិយយសថ្នាក់ខ្ពស់ ដល់លោកបណ្ឌិតថោងខុនដែលបានលះបង់ទាំងកម្លាំងកាយចិត្តក្នុងការចូលរួមគ្រប់ចលនាអូឡាំពិក ក៏ដូចជាសកម្មភាពកីឡាកន្លងមក ។ ការទទួលបាននូវគ្រឿងឥស្សរិយយសរបស់លោកបណ្ឌិតធ្វើឡើងក្នុងពិធីបើកមហាសន្និបាតក្រុមប្រឹក្សាអូឡាំពិកអាស៊ីនៅថ្ងៃទី០៤ ខែតុលា កន្លងទៅនេះ ក្រោមអធិបតីភាពដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា។
មហាសន្និបាតនេះដែរក៏មានឥស្សរជននិងថ្នាក់ដឹកនាំចលនាកីឡាអូឡាំពិកអាស៊ី និងអន្ដរជាតិ
ប្រមាណ៤០០នាក់មកពី៥៥ប្រទេសជុំវិញពិភពលោកចូលរួម ក្នុងនោះមានប្រតិភូមកពីបណ្តាក្រុមប្រឹក្សាអូឡាំពិកអាស៊ីចំនួន៤៥ប្រទេស គឺជាព្រឹត្តិការណ៍ដ៏មានសំខាន់សម្រាប់ការជជែកពិភាក្សាលើព្រឹត្តិការណ៍កីឡាអូឡាំពិកអាស៊ី និងធ្វើឡើងជារៀងរាល់ឆ្នាំ ៕
ចែករំលែកព័តមាននេះ