កម្ពុជា និងអារ៉ាប៊ីសាអ៊ូឌីត ប្តេជ្ញាជំរុញកិច្ចសហការរៀបចំព្រឹត្តិការណ៍កីឡាធំៗ និងវិស័យទេសចរណ៍រវាងប្រទេសទាំង២
- ភ្នំពេញ
រាជធានីភ្នំពេញ ៖ នាថ្ងៃទី០៤ ខែតុលា ឆ្នាំ២០២២ នៅសណ្ឋាគារសុខារេស៊ីដង់ភ្នំពេញ ឯកឧត្តម ថោង
រាជធានីភ្នំពេញ ៖ នាថ្ងៃទី០៤ ខែតុលា ឆ្នាំ២០២២ នៅសណ្ឋាគារសុខារេស៊ីដង់ភ្នំពេញ ឯកឧត្តម ថោង
រាជធានីភ្នំពេញ ៖ នាថ្ងៃទី០៤ ខែតុលា ឆ្នាំ២០២២ នៅសណ្ឋាគារសុខារេស៊ីដង់ភ្នំពេញ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ ប្រធានគណៈកម្មាធិការជាតិអូឡាំពិកកម្ពុជា និងជាអនុប្រធានអចិន្ទ្រៃយ៍គណៈកម្មាធិការជាតិCAMSOC-CAMAPGOC បានជួបពិភាក្សាការងារជាមួយព្រះអង្គម្ចាស់ Adbullaziz BinTurki Al Saud រដ្ឋមន្ត្រីក្រសួងកីឡានៃព្រះរាជាណាចក្រអារ៉ាប៊ីសាអ៊ូឌីត ជាប្រធាន NOC និងជាអនុប្រធានក្រមប្រឹក្សាអូឡាំពិកអាសុី ។
លោករដ្ឋមន្ត្រី ថោង ខុន បានជម្រាបជូនប្រតិភូប្រទេសអារ៉ាប៊ីសាអ៊ូឌីត អំពីការអភិវឌ្ឍរបស់កម្ពុជាដែលមានការអភិវឌ្ឍលើគ្រប់វិស័យ ក្រោមនយោបាយឈ្នះឈ្នះរបស់សម្តេចតេជោនាយកដ្ឋមន្ត្រី ធ្វើឱ្យកម្ពុជាទទួលបានសន្តិភាព ស្ថេរភាពពេញលេញ និងការអភិវឌ្ឍលើគ្រប់វិស័យ។
លោករដ្ឋមន្ត្រី បានបន្ថែមថា ទន្ទឹមនឹងការអភិវឌ្ឍនេះ កម្ពុជាក៏នៅបន្តត្រូវការការវិនិយោគបន្ថែមទៀត ជាអាទិ៍វិស័យសណ្ឋាគារប្រណីតនៅតាមគោលដៅទេសចរណ៍ដ៏ទាក់ទាញសំខាន់ៗមួយចំនួននិងការហោះហើរត្រង់តភ្ជាប់ជាមួយគ្នា។
ទន្ទឹមនឹងនោះ ដោយប្រទេសកម្ពុជានឹងទទួលធ្វើម្ចាស់ផ្ទះព្រឹត្តិការណ៍កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ និងការប្រកួតកីឡាយុវជនអាស៊ី ឆ្នាំ២០២៩ រីឯប្រទេសអារ៉ាប៊ីសាអ៊ូឌីតក៏នឹងទទួលធ្វើម្ចាស់ផ្ទះប្រកួតកីឡាក្នុងសាល និងក្បាច់គុនប្រយុទ្ធអាស៊ី ឆ្នាំ២០២៥, ការប្រកួតកីឡាអាស៊ីរដូវរងារ ឆ្នាំ២០២៩ និងការប្រកួតកីឡាអាស៊ី ឆ្នាំ២០៣៤ ប្រតិភូទាំងពីរប្រទេសបានឯកភាពគ្នារៀបចំគណៈប្រតិភូក្នុងការផ្លាស់ប្តូរទស្សនកិច្ចសិក្សាដើម្បីដកស្រង់បទពិសោធន៍ទៅវិញទៅមកលើការរៀបចំព្រឹត្តិការណ៍កីឡាធំៗ។
ជាមួយគ្នានេះដែរ ដោយមើលឃើញពីសក្តានុពលវិស័យទេសចរណ៍រវាងប្រទេសទាំងពីរ ព្រះអង្គម្ចាស់ Adbullaziz Bin Turki Al Saud បានសន្យានឹងខិតខំកៀរគរវិនិយោគិនអារ៉ាប៊ីសាអ៊ូឌីតមកកម្ពុជា ក៏ដូចជាខិតខំជំរុញឱ្យមានការហោះហើរត្រង់ និងពង្រឹងកិច្ចសហប្រតិបត្តិការទេសចរណ៍រវាងប្រទេសទាំងពីរផងដែរ។
ព្រះអង្គម្ចាស់ Adbullaziz Bin Turki Al Saud បានជម្រាបជូនលោករដ្ឋមន្ត្រី ថោង ខុន ថា នៅពេលដែលអារ៉ាប៊ីសាអ៊ូឌីត បង្កើតឱ្យមានស្ថានទូតប្រចាំនៅកម្ពុជានាពេលឆាប់ៗមុខនេះ គឺកិច្ចសហការលើគ្រប់វិស័យរវាងប្រទេសទាំងពីរពិតជានឹងមានការងាយស្រួល និងរីកចម្រើនយ៉ាងរហ័ស។
នៅទីបញ្ចប់ ព្រះអង្គម្ចាស់ Adbullaziz Bin Turki Al Saud បានសម្តែងនូវក្តីរីករាយ និងសន្យាមកចូលរួមក្នុងព្រឹត្តិការណ៍ស៊ីហ្គេម ឆ្នាំ២០២៣ តាមការអញ្ជើញពីលោករដ្ឋមន្ត្រី ថោង ខុន ផងដែរ ៕
ចែករំលែកព័តមាននេះ