យោងតាមរបាយការណ៍របស់មន្ទីរធនធានទឹក និងឧតុនិយមខេត្តកំពង់ឆ្នាំង បានឲ្យដឹងថា ពិនិត្យតាមស្ថានីយជលសាស្ត្រផ្សារក្រោម គិតត្រឹមថ្ងៃទី៥ ខែតុលា ឆ្នាំ២០២២ នេះ ទឹកមានកម្ពស់
ខេត្តកំពង់ឆ្នាំង ៖ យោងតាមរបាយការណ៍របស់មន្ទីរធនធានទឹក និងឧតុនិយមខេត្តកំពង់ឆ្នាំង បានឲ្យដឹងថា ពិនិត្យតាមស្ថានីយជលសាស្ត្រផ្សារក្រោម គិតត្រឹមថ្ងៃទី៥ ខែតុលា ឆ្នាំ២០២២ នេះ ទឹកមានកម្ពស់ ៩,៤៤ ម៉ែត្រ បើប្រៀបធៀបឆ្នាំចាស់២០២១ គិតត្រឹមថ្ងៃទី៥ ខែតុលាដូចគ្នានេះដែរ ទឹកមានកម្ពស់ត្រឹមតែ ៧,១០ ម៉ែត្រ តែប៉ុណ្ណោះ ដែលមានន័យថា កំពស់ទឹកឆ្នាំនេះ ខ្ពស់ជាងឆ្នាំចាស់ ២,៣៤ ម៉ែត្រ។
យ៉ាងនេះក្តី កម្ពស់ទឹកត្រូវប្រកាសអាសន្នមានកម្ពស់១១ម៉ែត្រ ដូច្នេះនៅខ្វះត្រឹមតែ១,៥៦ម៉ែត្រទៀត នឹងត្រូវប្រកាសអាសន្នហើយ។
ដោយឡែកតាមមន្ត្រីការិយាល័យនគរបាលចរាចរណ៍ផ្លូវទឹក នៃស្នងការនគរបាលខេត្តកំពង់ឆ្នាំង ដែលមានទីតាំងនៅដើមពោធិ៍ផ្សារក្រោម បានបញ្ជាក់ថា នៅព្រឹកថ្ងៃទី៥ នេះ ស្ថានភាពទឹកទន្លេមេគង្គបានហូរច្រាលចូលមកទន្លេសាបវិញហើយ គឺបាននាំមកនៅទឹកល្អក់ ហូរត្រឡប់ពីទិសខាងត្បូងទៅទិសខាងជើងវិញ មានន័យថា ចូលបឹងទន្លេសាបដែលអាចបង្កឲ្យស្ថានភាពទឹក និងហក់ឡើងជាងនេះ។
ដោយឡែកយោងតាមលិខិតជូនដំណឹងរបស់រដ្ឋបាលស្រុកកំពង់ត្រឡាច បានឱ្យដឹងថាកំណាត់ផ្លូវពីមាត់កំពង់ទឹកទន្លេ ស្ថិតក្នុងភូមិកំពង់ប្រាសាទ ឡើងមកថ្នល់ជាតិលខ៥ ប្រហែល១គីឡូម៉ែត្រ ត្រូវបានកាត់ផ្តាច់ដោយសារទឹកជំនន់ ហើយបានបិទការធ្វើដំណើរ តាមយានយន្តគ្រប់ប្រភេទ តែអាចទៅមកបានដោយការឆ្លងសាឡាងជាបណ្ដោះអាសន្នសិន។
សូមបញ្ជាក់ដែរថា ស្ថានភាពទឹកក្នុងឆ្នាំ២០២២ នេះ មានកម្រិតខ្ពស់គួរកត់សម្គាល់ ដែលមួយផ្នែកហូរធ្លាក់ពីប៉ែកខាងលើចូលបឹងទន្លេសាប ចំណែកមួយផ្នែកទៀតបានហូរចាក់ពីទន្លេមេគង្គមកចូលក្នុងបឹងទន្លេសាបដែរ ជាហេតុធ្វើឲ្យផ្ទះប្រជាពលរដ្ឋមួយចំនួននៅតាមទន្លេនៃខេត្តកំពង់ឆ្នាំង បានរកការលិចលង់ ដូចជានៅឃុំផ្លូវទូក ក្នុងស្រុកកំពង់លែង និងឃុំឆ្នុកទ្រូ ក្នុងស្រុកបរិបូណ៌ជាដើម។
ហើយបើតាមប្រជាពលរដ្ឋរស់នៅតាមដងទន្លេបានឱ្យថា ប្រសិនបើស្ថានភាពទឹកទន្លេមេគង្គនៅតែបន្តហូរចាក់ចូលបឹងទន្លេសាប ស្ថានភាពនឹងបន្តជន់ឡើង រហូតដល់កម្រិតប្រកាសអាសន្នហើយ៕
ចែករំលែកព័តមាននេះ