រាជធានីភ្នំពេញ ៖ លទ្ធផលប្រមូលពន្ធចំណូលពន្ធ-អាករគ្រប់ប្រភេទ ក្នុងខែកុម្ភៈ ឆ្នាំ២០១៧ អគ្គនាយកដ្ឋានពន្ធដារប្រមូលបាន និងធ្វើបែបបទសលាកបត្របង់ចូលថវិកាជាតិបានចំនួន៤២១.០៨៦,៣១លានរៀល (ប្រមាណ១០៥,២៧លានដុល្លារ)។ បើធៀបនឹងរយៈពេលដូចគ្នាក្នុងឆ្នាំ២០១៦ ឃើញថា កើនឡើងចំនួន៣៨.១៨៥,៧២លានរៀល(ប្រមាណ៩,៥៤លានដុល្លារ) ឬស្មើនឹងអត្រាកំណើន ៩,៩៧% ។ នេះបើតាម លោក គង់ វិបុល ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ បានថ្លែងក្នុងកិច្ចប្រជុំបូកសរុបលទ្ធផលគ្រប់គ្រងប្រមូលចំណូលប្រចាំខែកុម្ភៈឆ្នាំ២០១៧ នៅសាលប្រជុំសាលាជាតិពន្ធដារកាលព្រឹកថ្ងៃទី១០ កុម្ភៈ ។
សម្រាប់រយៈពេល២ខែ ឆ្នាំ២០១៧ ចំណូលពន្ធ-អាករគ្រប់ប្រភទប្រមូលបានមានចំនួន១.៤០៦.៣១៣,១២លានរៀល(ប្រមាណជា ៣៥១,៥៨លានដុល្លារ) ស្មើនឹង២០,៤៩%នៃគោលដៅកំណត់ដោយច្បាប់ ។
ចំណូលពន្ធតាមប្រភេទពន្ធដែលប្រមូល បានក្នុងខែកុម្ភៈ ឆ្នាំ២០១៧ មានការកើន ឡើងស្ទើរគ្រប់ប្រភេទពន្ធ ជាពិសេសប្រភេទពន្ធអាករសំខាន់ៗមានជាអាទិ៍៖ ពន្ធលើប្រាក់ចំណូលកើនឡើង១៦% ពន្ធលើប្រាក់បៀវត្សរ៍កើនឡើង៥៣,១% និងអាករពិសេសកើនឡើង៤៧,៩% ខណៈដែលអាករលើតម្លៃបន្ថែមមានការថយចុះ២,២%។
លោក គង់ វិបុល បញ្ជាក់ថា ដើម្បីធានាបាននូវប្រសិទ្ធភាពក្នុងការអនុវត្តការប្រមូលចំណូលពន្ធ បានគ្រប់តាមផែនការកំណត់ដោយច្បាប់ចំនួន៦.៨៦៣.៣០០លានរៀល(គិតជាដុល្លារ ១.៧១៥,៨៣លានដុល្លារ) លោកបានដាក់ចេញនូវវិធានការសំខាន់ៗមួយចំនួនដូចខាងក្រោម ៖
-បន្តពង្រឹងយន្តការនៃការចុះបញ្ជីពន្ធ ដារ និងប្រសិទ្ធភាពនៃការផ្តល់សេវាជូនអ្នកជាប់ពន្ធ
-បន្តពង្រឹងប្រសិទ្ធភាពនៃការចាត់ចែងការដាក់លិខិតប្រកាសសារពើពន្ធរបស់អ្នកជាប់ពន្ធ
-បន្តពង្រឹងការធ្វើសវនកម្មលើសហគ្រាសដែលមានហានិភ័យខ្ពស់ ដែលព្យាយាមគេចវេះកាតព្វកិច្ចបង់ពន្ធតាមគ្រប់រូបភាព
-បន្តពង្រឹងនិងបណ្តុះបណ្តាលសមត្ថភាពរបស់មន្ត្រីរាជការពន្ធដារ តាមរយៈការរៀបចំសិក្ខាសាលា និងវគ្គបណ្តុះបណ្តាលជំនាញបន្ថែម ទាំងក្នុងនិងក្រៅប្រទេស
-បន្តពង្រឹងអភិបាលកិច្ចល្អនិងកែប្រែផ្នត់គំនិតរបស់មន្ត្រីពន្ធដារឲ្យក្លាយជាអ្នកបម្រើសេវាសាធារណៈបានល្អ
-បន្តធ្វើទំនើបកម្មប្រព័ន្ធព័ត៌មានវិទ្យា ជាពិសេសរៀបចំអភិវឌ្ឍន៍កម្មវិធីគ្រប់គ្រងការប្រមូលពន្ធគ្រប់ប្រភេទតាមបច្ចេវិទ្យាព័ត៌មាន
-បន្តលើកកម្ពស់និងបញ្ជ្រាបវប្បធម៌ពន្ធដារ បន្តពង្រឹងការអនុវត្តច្បាប់ស្តីពីសារពើពន្ធ ក្នុងចំណោមធុរជនគ្រប់មជ្ឈដ្ឋាន តាមរយៈការរៀបចំសិក្ខាសាលាផ្សព្វផ្សាយស្តីពីប្រព័ន្ធពន្ធដារកម្ពុជា ៕
ចែករំលែកព័តមាននេះ