ក្មេងស្រីអាយុ១៨ឆ្នាំម្នាក់ធ្វើឱ្យពេទ្យនិងសមត្ថកិច្ចដាច់បាយដាច់ទឹកដោយសារតែ…
ខេត្តកំពត ៖ មានការភ្ញាក់ផ្អើលមួយបានកើតឡើងកាលរសៀលថ្ងៃទី១១ មីនា ខណៈមានក្មេងស្រីអាយុ១៨ឆ្នាំម្នាក់
ខេត្តកំពត ៖ មានការភ្ញាក់ផ្អើលមួយបានកើតឡើងកាលរសៀលថ្ងៃទី១១ មីនា ខណៈមានក្មេងស្រីអាយុ១៨ឆ្នាំម្នាក់ដែលពេទ្យសន្និដ្ឋានថា ជាមនុស្យមានសតិមិនគ្រប់ ឬក៏ជាមនុស្សវិកលចរិតដែលនគរបាលក្រុងបានទទួលពីសាខាកាកបាទក្រហមខេត្តហើយយកមកចូលមន្ទីរពេទ្យបង្អែកខេត្តបន្ទប់សង្គ្រោះបន្ទាន់ ។ តាមសមត្ថកិច្ចដែលបញ្ជូនក្មេងស្រីទៅកាន់មន្ទីរពេទ្យបានឲ្យដឹងថា គ្រាន់តែចូលដល់មន្ទីរពេទ្យភ្លាមក្មេងស្រីរូបនេះធ្វើជាសន្លប់ស្តូកស្តឹងធ្វើឲ្យទាំងសមត្ថកិច្ច ទាំងគ្រូពេទ្យមានការភ្ញាក់ផ្អើលគ្រប់គ្នា ។
ប្រភពបន្តទៀតថា ពេលនោះសមត្ថកិច្ច និងក្រុមគ្រូពេទ្យបានលើកក្មេងស្រីនោះដាក់លើគ្រែដើម្បីដាក់សេរ៉ូមចាក់ថ្នាំ ប៉ុន្តែត្រូវបានក្មេងស្រីរូបនេះធ្វើជាដឹងខ្លួនវិញ ហើយមិនព្រមដេកលើគ្រែ សុខចិត្តដេកនៅលើឥដ្ឋការ៉ូវិញ ក្រោយមកគ្រូពេទ្យបានចាក់ថ្នាំឲ្យ រួចហើយបានសម្ងំដេកទៅ ។ ប្រភពដដែលឲ្យដឹងទៀតថាពេលអ្នកជំងឺរូបនេះសម្ងំដេក ហើយសមត្ថកិច្ចក៏ប្រគល់ឲ្យគ្រូពេទ្យជួយមើលមួយភ្លែតដើម្បីសមត្ថកិច្ចទៅហូបបាយ គ្រាន់តែសមត្ថកិច្ចទៅមិនទាន់ដល់កន្លែងហូបបាយផង ស្រាប់តែមានប្រពលរដ្ឋរាយការថាមានមនុស្សស្រីក្មេងម្នាក់ឡើងលើបង្កាន់ដៃស្ពានឥន្ទនូបម្រុងលោតទឹកពេលនោះមានការផ្អើលឆោឡោរឡើងអស់ប្រជាពលរដ្ឋរត់ទៅមើល និងជួយអន្តរាគមន៍ដើម្បីជួយសង្គ្រោះ ។
ចំណែកសមត្ថកិច្ចដែលយាមក៏មិនបានហូបបាយទេនៅពេលនោះ នៅកន្លែងកើតហេតុគេឃើញកម្លាំងនគរបាលក្រុងទៅយកពូកជាច្រើនមកក្រាលនៅលើស្ពានក្រោមបង្កាន់ដៃ ខ្លាចក្មេងស្រីរូបនេះលោតចុះនៅពេលកម្លាំងសមត្ថកិច្ចនគរបាលក្រុងឡើងទៅចាប់ពីសងខាងបង្កាន់ដៃស្ពាន ។ ខណៈពេលសមត្ថកិច្ចឡើងទៅចាប់នៅលើបង្កាន់ដៃស្ពាន បានយកមកដល់ដីក្មេងស្រីនោះធ្វើជាសន្លប់រួចសមត្ថកិច្ចក៏ដឹកទៅកាន់មន្ទីរពេទ្យដើម្បីសង្គ្រោះបន្ត ប៉ុន្តែយកចូលដល់ក្នុងបន្ទប់សង្គ្រោះក្មេងស្រីនោះក៏សន្លប់ទៅវិញ រួចហើយសមត្ថកិច្ចក៏នៅយាមអ្នកក្មេងស្រីនោះរហូត ។
បើតាមលោកវរសេនីយ៍ត្រី កែវ មុន្នី អធិការនគរបាលក្រុងបានឲ្យដឹងថា ក្មេងស្រីរូបនេះមានជំងឺវិកលចរិត ពីព្រោះពេលនាង ចង់ស្រែកក៏ស្រែក ចង់យំក៏យំ លោកបានទៅទទួលពីសាខាកាកបាទក្រហមខេត្តតាំងពីថ្ងៃទី៩ មីនា មកម្ល៉េះ ហើយបានបញ្ជូនទៅកាន់មន្ទីរពេទ្យឲ្យពេទ្យជួយព្យាបាលលោកបានចំណាយថវិកាផ្ទាល់ខ្លួនដើម្បីជួលកម្មករធ្វើការនៅពេទ្យឲ្យជួយយាមឲ្យផង និងទិញនំចំណីឲ្យអ្នកជំងឺរូបនេះហូបផង ។ លោកបន្តទៀតថា ពេទ្យមើលទៅដូចជាដឹងស្មារតី ហើយអាចឲ្យកម្លាំងសមត្ថកិច្ចរបស់លោកសួរនាំពីឈ្មោះ និងស្រុកកំណើត ក្មេងស្រីរូបនោះក៏បានឲ្យដឹងថា ខ្លួនឈ្មោះ យឹម សំណាង អាយុ១៨ឆ្នាំ ប៉ុន្តែប្រាប់ទីលំនៅមិនច្បាស់លាស់ ម្តងថា នៅខេត្តកំពង់ស្ពឺ ម្តងថា នៅខេត្តព្រៃវែង ម្តងថា នៅខេត្តកំពង់ចាម ។
លោកអធិការបានឲ្យដឹងទៀតថា ក្រោយពីកម្លាំងសមត្ថកិច្ចទៅចាប់ពីលើស្ពានយកមកចូលមន្ទីរពេទ្យបានប្រហែលជាងមួយម៉ោងក្រោយមកក៏មានក្រុមការងារខាងមន្ទីរកិច្ចការនារី និងមានការផ្តល់យោបល់ជួយអន្តរាគមន៍ពីលោកស្រី យូ សុគន្ឋ អភិបាលរងខេត្តបានឲ្យសមត្ថកិច្ចយកចេញពីមន្ទីរពេទ្យពីព្រោះក្រុមគ្រូពេទ្យមិនអាចការពារអ្នកជំងឺនេះបានឡើយ ។ ពេលនោះកម្លាំងសមត្ថកិច្ចក៏យកមកដាក់នៅអធិការដ្ឋាននគរបាលក្រុងដើម្បីធ្វើការទំនាក់ទំនងស្រាវជ្រាវរកក្រុមគ្រួសារឲ្យមកទទួលយកទៅវិញ ។
លោកស្រី ចាន់ កញ្ញា អភិបាលរងក្រុងកំពតបានប្រាប់អ្នកយកព័ត៌មានកោះសន្តិភាពថា លោកស្រីកំពុងពិភាក្សាជាមួយលោកអធិការក្រុងដើម្បីទំនាក់ទំនងទៅខេត្តដែលក្មេងស្រីបានប្រាប់សមត្ថកិច្ច ប៉ុន្តែជាដំបូងយើងទំនាក់ទំនងទៅខេត្តកំពង់ស្ពឺឲ្យកម្លាំងសមត្ថកិច្ចខេត្តនេះមកទទួលសិន រួចចាំឲ្យគេជួយស្រាវជ្រាវរកគ្រួសារបន្តទៅទៀតចុះ ៕
ចែករំលែកព័តមាននេះ