អាមេរិកនឹងទប់ស្កាត់ការនាំចេញបច្ចេកវិទ្យាដើម្បីកុំឱ្យយោធាចិនទទួលបាន
អាមេរិក ៖ សហរដ្ឋអាមេរិក ត្រូវគេរំពឹងថានឹងប្រកាសពីវិធានការថ្មីក្នុងសប្តាហ៍នេះ ដើម្បីដាក់
អាមេរិក ៖ សហរដ្ឋអាមេរិក ត្រូវគេរំពឹងថានឹងប្រកាសពីវិធានការថ្មីក្នុងសប្តាហ៍នេះ ដើម្បីដាក់កំហិតលើក្រុមហ៊ុនចិនមិនឱ្យទទួលបានបច្ចេកវិទ្យាឈីប។
ទីភ្នាក់ងារសារព័ត៌មាន Reuters ត្រូវមនុស្សចំនួន ៣នាក់ប្រាប់ពីបញ្ហានេះថា វិធានការថ្មីរបស់អាមេរិកមានបំណងកាត់ផ្តាច់ការទទួលបានបច្ចេកវិទ្យាឈីប (semiconductor technology) ពីសំណាក់ក្រុមហ៊ុនចិន។
កាសែត The New York Times បានធ្វើការចុះផ្សាយដំបូងថា អាមេរិកនឹងចេញវិធានការថ្មីនៅសប្តាហ៍នេះ ដោយទីក្រុងវ៉ាស៊ីនតោននឹងក៏មានផែនការកម្រិតលើការលក់បន្ទះឈីបអាមេរិកទៅឱ្យគម្រោងមជ្ឍមណ្ឌលទិន្នន័យ និងកុំព្យូទ័រទំនើបបំផុតរបស់ចិន។
សេតវិមានមិនបានឆ្លើយតបភ្លាមៗចំពោះសំណើសុំការអត្ថាធិប្បាយទេ ហើយក្រសួងពាណិជ្ជកម្មបានបដិសេធការអត្ថាធិប្បាយ។
កាលពីខែមុន ទីភ្នាក់ងារសារព័ត៌មាន Reuters បានរាយការណ៍ថា រដ្ឋបាលរបស់លោក Joe Biden គ្រោងទុកក្នុងខែតុលាដើម្បីពង្រីកការទប់ស្កាត់ការដឹកជញ្ជូនឈីបអាមេរិកទៅកាន់ចិន ដែលប្រើសម្រាប់បញ្ញាសិប្បនិម្មិត និងឧបករណ៍ផលិតបន្ទះសៀគ្វី។
វិធានការថ្មីគឺជាផ្នែកមួយនៃកិច្ចប្រឹងប្រែងរបស់អាមេរិកដើម្បីគ្រប់គ្រងបច្ចេកវិទ្យាដែលអាចគាំទ្រដល់យោធាចិន។ ទីប្រឹក្សាសន្តិសុខជាតិអាមេរិកលោក Jake Sullivan និយាយនៅក្នុងសុន្ទរកថាកាលពីខែមុនថា ការត្រួតពិនិត្យការនាំចេញបច្ចេកវិទ្យាអាចជាទ្រព្យសម្បត្តិយុទ្ធសាស្ត្រថ្មីនៅសហរដ្ឋអាមេរិក និងជាឧបករណ៍ដើម្បីកំណត់តម្លៃលើបច្ចាមិត្ត ហើយសូម្បីយូរៗទៅ វានឹងធ្វើឱ្យខូចសមត្ថភាពសមរភូមិរបស់ពួកគេ។
ចំពោះបច្ចេកវិទ្យាដូចជា បន្ទះឈីបអង្គចងចាំ (memory chips) លោក Jake Sullivan ថ្លែងថា “យើងត្រូវរក្សាការនាំមុខគេឱ្យបានច្រើនតាមដែលអាចធ្វើទៅបាន”។
សូមរម្លឹកថា កាលពីខែសីហាកន្លងទៅនេះ ទីភ្នាក់ងារសារព័ត៌មាន Reuters បានចុះផ្សាយថា អាមេរិកកំពុងពិចារណាកំណត់ការនាំចេញនូវឧបករណ៍ផលិតបន្ទះឈីប និងឈីបអង្គចងចាំ នៅក្នុងប្រទេសចិន រួមមានក្រុមហ៊ុន Yangtze Memory Technologies Co Ltd (YMTC)៕ (យោងតាមប្រភព៖ Reuters)
ចែករំលែកព័តមាននេះ