ខេត្តស្វាយរៀង ៖ មានទូកនេសាទជនជាតិវៀតណាមជាច្រើនបានឆ្លងដែនចូលមកឆក់ត្រីដោយខុសច្បាប់ នៅបឹងបាយ៉ាប ភូមិបាយ៉ាប ឃុំបាសាក់ស្រុកស្វាយជ្រំ ហើយត្រូវមហាជនបានរិះគន់ចំៗថា សមត្ថកិច្ចបើកដៃឲ្យទូកនេសាទយួនចូលមកទឹកដីកម្ពុជា ដើម្បីឆក់ត្រីយ៉ាងអនាធិបតេយ្យ អាជ្ញាធរនិងសមត្ថកិច្ចពាក់ព័ន្ធមិនអើពើ ។
បើតាមប្រជាពលរដ្ឋរស់នៅភូមិបាយ៉ាបដែលជាអ្នកប្រកបមុខរបរនេសាទបានឲ្យដឹងថា កាលពីរសៀលថ្ងៃទី០២ ខែតុលា ឆ្នាំ២០២២ មានទូកនេសាទជនជាតិវៀតណាមជាច្រើនគ្រឿងបានធ្វើសកម្មភាពឆក់ត្រីខ្នាតធំនៅក្នុងព្រែកបឹងបាយ៉ាប ស្ថិតនៅក្នុងភូមិបាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀង ។
ប្រភពបានលើកឡើងថា ចំពោះទីតាំងមួយនេះប្រជាពលរដ្ឋអ្នកនេសាទត្រី តែងតែឃើញជនជាតិវៀតណាមជិះទូកមកឆក់ត្រីជារៀងរាល់ថ្ងៃ ដោយដាក់ស្បៃអួនរុញពីមុខទូករួចឆក់ត្រីឲ្យសន្លប់ចូលក្នុងអួនពួកគេ ធ្វើឲ្យប៉ះពាល់ដល់ត្រី តូចៗងាប់ ។ ចំពោះអាជ្ញាធរនិងសមត្ថកិច្ចពាក់ព័ន្ធនៅក្នុងមូលដ្ឋានវិញធ្វើជាមិនដឹងមិនឮ គ្មានវិធានការបង្ក្រាបនោះឡើយ ដោយបណ្ដោយឲ្យជនជាតិវៀតណាមមកឆក់ត្រីយ៉ាងអនាធិបតេយ្យ ។ ពេលខ្លះ ជនជាតិវៀតណាមមកឆក់ត្រីហើយបានផ្ដាច់ម៉ង ត្រីរបស់ប្រជាពលរដ្ឋខ្មែរ ដាច់អស់ក៏មានដែរ ។
ជុំវិញករណីខាងលើនេះដែរ កោះសន្តិភាពមិនអាចទំនាក់ទំនងទៅលោក សោម សុភ័ណ្ឌ អធិការស្រុកស្វាយជ្រំបានទេរហូតមកដល់ថ្ងៃទី៤ ខែតុលា ឆ្នាំ២០២២នេះ ។ ទោះជាយ៉ាងណាក្ដី បងប្អូនប្រជាពលរដ្ឋបានសំណូមពរដល់អាជ្ញាធរពាក់ព័ន្ធទាំងអស់ មេត្តាបង្ក្រាបជនជាតិវៀតណាមដែលមកឆក់ត្រីនៅទឹកដីក្នុងភូមិបាយ៉ាប ឃុំបាសាក់ ស្រុកស្វាយជ្រំ ខេត្តស្វាយរៀងទាំងនេះផង ។
បងប្អូនប្រជាពលរដ្ឋសង្ឃឹមជឿជាក់លើឯកឧត្តម ម៉ែន វិបុល អភិបាលខេត្តស្វាយរៀង និងលោកស្នងការខេត្ដស្វាយរៀងដែលទើបនិងកាន់តំណែងថ្មីៗ ចាត់វិធានការដោះស្រាយរាល់បញ្ហាជូនពលរដ្ឋជាមិនខាន ជាពិសេស ចំណាត់ការបង្ក្រាបទូកនេសាទជនជាតិវៀតណាម ដែលមកឆក់ត្រីខុសច្បាប់ ទាំងនេះប្រសិនបើពុំមានចំណាត់ការទេ ពូជមច្ឆាជាតិ បឹងបាយ៉ាបនឹងត្រូវផុតពូជ៕
ចែករំលែកព័តមាននេះ