ខេត្តសៀមរាប ៖ ក្រុមអ្នកភូមិប្រមាណជាង២៦០នាក់មកពីសហគមន៍ជីក្រែង ស្រុកជីក្រែង សហគមន៍ស្គុន ស្រុកបន្ទាយស្រី និងសហគមន៍ស្រែណូយ ស្រុកវ៉ារិន កាលពីព្រឹកថ្ងៃទី២៤ ខែមីនា ឆ្នាំ២០១១ បានលើកគ្នាមកកាន់មុខអគាររដ្ឋបាលសាលាដំបូងខេត្ដសៀមរាប ដើម្បីចូលរួមលើកទឹកចិត្ដដល់តំណាងអ្នកឃុំស្រែណូយចំនួន៤រូប ដែលត្រូវតុលាការកោះហៅឱ្យចូលខ្លួនសាកសួរពីបទចាប់ជំរឹតទារប្រាក់
ខេត្តសៀមរាប ៖ ក្រុមអ្នកភូមិប្រមាណជាង២៦០នាក់មកពីសហគមន៍ជីក្រែង ស្រុកជីក្រែង សហគមន៍ស្គុន ស្រុកបន្ទាយស្រី និងសហគមន៍ស្រែណូយ ស្រុកវ៉ារិន កាលពីព្រឹកថ្ងៃទី២៤ ខែមីនា ឆ្នាំ២០១១ បានលើកគ្នាមកកាន់មុខអគាររដ្ឋបាលសាលាដំបូងខេត្ដសៀមរាប ដើម្បីចូលរួមលើកទឹកចិត្ដដល់តំណាងអ្នកឃុំស្រែណូយចំនួន៤រូប ដែលត្រូវតុលាការកោះហៅឱ្យចូលខ្លួនសាកសួរពីបទចាប់ជំរឹតទារប្រាក់និងបង្ខាំងមនុស្សខុសច្បាប់ ។ អ្នកតំណាងទាំង៤នោះត្រូវបានចោទប្រកាន់ថា បានដឹកនាំក្រុមអ្នកឃុំស្រែណូយជាច្រើននាក់ប្រដាប់ដោយដំបង និងកាំបិតឡោមព័ទ្ធបណ្ដេញគ្រឿងចក្ររបស់ក្រុមហ៊ុនអភិវឌ្ឈន៍ទីក្រុងរណប« បានយ៉ាគ្រុប» ដែលធ្វើសកម្មភាពឈូសឆាយព្រំដីប៉ះពាល់ដីប្រជាពលរដ្ឋ កាលពីថ្ងៃទី២៣ ខែកុម្ភៈ ឆ្នាំ ២០០៩កន្លងទៅ ។
ទោះបីជាយ៉ាងណា ការលើកគ្នាមកឈរនៅមុខតុលាការនេះត្រូវបានពួកគាត់អះអាងថា មិនមែនមកចាំការពារ ឬប្រើអំពើហិង្សាដាក់នរណាម្នាក់ទេ គ្រាន់តែមកលើកទឹកចិត្ដដល់អ្នកតំណាងទាំង៤រូប ដែលត្រូវចូលបំភ្លឺតាមដីកាកោះហៅរបស់ចៅក្រមស៊ើបសួរនៃសាលាដំបូងតែប៉ុណ្ណោះ ។ អ្នកភូមិម្នាក់ក្នុងចំណោមអ្នកភូមិជាច្រើននាក់ទៀតដែលឈរនៅមុខអគាររដ្ឋបាលសាលាដំបូងខេត្ដសៀមរាបបាននិយាយថា ការលើកគ្នាមកកាន់ទីនេះ មានអ្នកភូមិ២៦០នាក់មកពីសហគមន៍ចំនួន៣ផ្សេងគ្នា គឺសហគមន៍ជីក្រែង ស្រុកជីក្រែង សហគមន៍ស្គុន ស្រុកបន្ទាយស្រី និងសហគមន៍ស្រែណូយ ស្រុកវ៉ារិន ដើម្បីលើកទឹកចិត្ដដល់តំណាង៤នាក់របស់សហគមន៍ស្រែណូយដែលត្រូវបានតុលាការកោះហៅឱ្យចូលបំភ្លឺជុំវិញបណ្ដឹងចោទប្រកាន់ពីបទចាប់ជំរឹតទារប្រាក់ និងបង្ខាំងមនុស្សខុសច្បាប់ ។
តំណាងអ្នកឃុំស្រែណូយទាំង៤រូបនោះ១-ឈ្មោះម៉ៅ ឌិន ២-ឈ្មោះប៉ិ ងំ ៣-ឈ្មោះភឿន ផា និង៤-ឈ្មោះដួង ឡាញ់ ភេទស្រី អ្នកទាំង៤រូបនេះរស់នៅភូមិវត្ដ និងភូមិស្រែណូយ ស្រុកវ៉ារិន ដែលមានដីស្រែ និងដីចំការបុស ស្ថិតនៅក្នុងប្លង់គោលនៃក្រុមហ៊ុនវិនិយោគក្រុងរណប «បានយ៉ាគ្រុប» ។ ដើមចមបណ្តាលឱ្យមានការចោទប្រកាន់ខាងលើគឺកាលពីថ្ងៃទី២៣ ខែកុម្ភៈ ឆ្នាំ២០០៩ ក្រុមហ៊ុន «បានយ៉ាគ្រុប» ដែលទទួលសិទ្ធិពីរាជរដ្ឋាភិបាលក្នុងការវិយោគអភិវឌ្ឍន៍ទីក្រុងរណបលើផ្ទៃដី៧ពាន់ហិកតា នៅក្នុងភូមិសាស្ដ្រឃុំចំនួនពីរក្នុងស្រុកវ៉ារិន ខេត្ដសៀមរាប រួមបញ្ជូលទាំងឃុំស្រែណូយផងដែរនោះ បានបញ្ជូនគ្រឿងចក្រជាច្រើនគ្រឿងទៅធ្វើការឈូសឆាយព្រំដីដោយក្រុមសហគមន៍បានអះអាងថា ក្រុមហ៊ុនបានហ៊ុមព័ទ្ធឈូសឆាយទាំងដីស្រែនិងដីចំការបុសរបស់ពួកគាត់។ នៅពេលនោះហើយប្រជាពលរដ្ឋស្រីប្រុស ក្មេងចាស់រាប់សិបនាក់ប្រដាប់ដោយកាំបិតនិងដំបងដឹកនាំដោយតំណាងទាំង៤នាក់ ដែលបានចូលខ្លួនបំភ្លឺនៅតុលាការនោះបានលើកគ្នាធ្វើការឡោមព័ទ្ធគ្រឿងចក្ររបស់ក្រុមហ៊ុននោះមិនឱ្យឈូសឆាយ ដោយសំអាងថាបានប៉ះពាល់ដីពួកគាត់ ។
លោកភឿន ផា តំណាងអ្នកភូមិមួយរូបក្នុងចំណោមអ្នកភូមិ៣នាក់ទៀត ដែលត្រូវកោះហៅឱ្យចូលបំភ្លឺបាននិយាយប្រាប់ថា គេចោទពួកគាត់ដោយសារតែកាលពីថ្ងៃទី២៣ ខែកុម្ភៈ ២០០៩ ប្រជាពលរដ្ឋបានលើកគ្នាទៅហាមឃាត់គ្រឿងចក្ររបស់ក្រុមហ៊ុន«បានយ៉ាគ្រុប» ដែលឈូសព្រំដីប៉ះចំដីប្រជាពលរដ្ឋ ហើយពេលនោះមន្ដ្រីនគរបាលប៉ុស្ដិ៍ឃុំស្រែណូយបានហៅពួកគាត់ឱ្យមកដោះស្រាយគ្នានៅឃុំ ដោយប្រាប់ថាមេឃុំរង់ចាំនៅទីនោះ ។ ពេលពួកគាត់លើកគ្នាទៅកាន់សាលាឃុំ អត់ឃើញមេឃុំនៅទេ ឃើញតែជំទប់ទី១ ទើបពួកគាត់ដេកចាំនៅសាលាឃុំដើម្បីរង់ចាំដំណោះស្រាយ ។ តំណាងអ្នកភូមិរូបនោះបានបន្ដថា អ្នកដែលប្ដឹងពួកគាត់ទៅតុលាការនោះគឺជាអនុប្រធានភូមិ និងកូនលោកស្រីប៉ក់ ម៉ម តែពួកគាត់រួមទាំងអ្នកភូមិទាំងអស់អត់បានធ្វើដូចការចោទប្រកាន់នោះទេ។
មន្ដ្រីស៊ើបអង្កេតសមាគមការពារសិទ្ធិមនុស្ស«អាដហុក»ប្រចាំខេត្ដសៀមរាប ដែលបានចុះអង្កេតទៅលើករណីនេះបានថ្លែងថា ករណីនេះវាមានជាប់ពាក់ពន្ធ័ជាមួយក្រុមហ៊ុន«បានយ៉ាគ្រុប»ពិតមែនតែក្រុមហ៊ុននេះអត់មានកំហុសទេ ព្រោះក្រុមហ៊ុនបានទម្លាក់លុយដោះស្រាយសំណងជូនប្រជាពលរដ្ឋរួចហើយតាមរយៈមេឃុំនិងមេភូមិ ។ ចំពោះការលើកគ្នាមកតវ៉ាឡោមព័ទ្ធគ្រឿងចក្រមិនឱ្យឈូសឆាយនាំឱ្យកើតមានការប្ដឹងប្ដល់គ្នានេះ ដោយសារតែប្រជាពលរដ្ឋអះអាងថាពួកគាត់នៅមិនទាន់បានទទួលប្រាក់ដោះស្រាយគោលនយោបាយពីអាជា្ញធរភូមិឃុំនៅឡើយ ដូច្នេះពួកគាត់ក៏លើកគ្នាទៅទារលុយតែម្តងទៅ ។
មន្ដ្រីការពារសិទ្ធិមនុស្សដដែលនោះបានបន្ថែមថា ការចោទប្រកាន់ពីបទចាប់ជំរឹត និង បង្ខាំងមនុស្សខុសច្បាប់ប្រឆាំងទៅលើតំណាងអ្នកឃុំស្រែណូយទាំង៤នាក់នោះ វាហាក់ដូចជាមិនត្រឹមត្រូវទេ នេះបើផ្អែកទៅលើកន្លែងកើតហេតុគឺនៅក្នុងបរិវេណសាលាឃុំដែលជាអគាររដ្ឋបាលសាធារណៈរបស់រដ្ឋ ។ ជាពិសេសក្នុងករណីដែលអាជា្ញធរភូមិឃុំមិនទាន់ប្រគល់ប្រាក់ដោះស្រាយគោលនយោបាយដែលក្រុមហ៊ុនបានយ៉ាគ្រុបទម្លាក់់មកឱ្យពួកគាត់ជាប្រជាពលរដ្ឋ ដូច្នេះពួកគាត់នៅតែមានសិទ្ធិក្នុងការទាមទារដដែល ។ នៅវេលាម៉ោង១១និង៤៧នាទីថ្ងៃត្រង់ថ្ងៃទី២៧ ខែមីនា កោះសន្ដិភាពបានហៅទូរស័ព្ទចំនួន៣លើកចុងក្រោយទៅកាន់លោកម៉ៅ ភន អគ្គនាយកក្រុមហ៊ុនបានយ៉ាគ្រុប ប៉ុន្ដែការហៅចូលត្រូវបានចុចឱ្យជាប់រវល់ ដូច្នេះមិនអាចសុំការពន្យល់បន្ថែមជុំវិញរបៀបដោះស្រាយគោលនយោបាយដីធ្លីជូនប្រជាពលរដ្ឋដែលនៅមានការជំពាក់ជំពិននោះបានទេ ៕
ចែករំលែកព័តមាននេះ