ខេត្តកំពង់ធំ ៖ ទឹកស្ទឹងសែននៅក្នុងឆ្នាំង២០២២នេះបានហក់ឡើងខ្ពស់ហួសពីការគិត រហូតធ្វើឱ្យលិចផ្ទះ លិចផ្លូវធ្វើដំណើរ និងប៉ះពាល់ដល់ផលដំណាំរបស់បងប្អូនប្រជាពលរដ្ឋជាច្រើនហិកតា ។ជាក់ស្តែង នៅព្រឹកថ្ងៃទី០៤ តុលា នេះ…
ខេត្តកំពង់ធំ ៖ ទឹកស្ទឹងសែននៅក្នុងឆ្នាំង២០២២នេះបានហក់ឡើងខ្ពស់ហួសពីការគិត រហូតធ្វើឱ្យលិចផ្ទះ លិចផ្លូវធ្វើដំណើរ និងប៉ះពាល់ដល់ផលដំណាំរបស់បងប្អូនប្រជាពលរដ្ឋជាច្រើនហិកតា ។
ជាក់ស្តែង នៅព្រឹកថ្ងៃទី០៤ តុលា នេះ បើយោងតាមការបញ្ជាក់របស់មន្ទីរធនធានទឹក និងឧតុនិយមខេត្តកំពង់ធំឲ្យដឹងថា ទឹកស្ទឹងសែននៅតែបន្តកើនឡើងសីតុណ្ហភាពនៅស្ថានីយកំពង់ធំ អតិបរមា៣២,០°C អប្បរមា២២,៥°C ។
ចំណែកកំពស់ទឹកស្ទឹងសែននៅស្ថានីយកំពង់ធំ កាលពីម្សិលមិញថ្ងៃទី០៣ តុលា ទឹកមានកំពស់១៣,៩៣ម ហើយនៅថ្ងៃទី០៤ ខែតុលានេះ កំពស់ទឹកហក់ឡើងដល់១៣,៩៩ម លើសកំពស់ដែលប្រកាសឲ្យប្រុងប្រយ័ត្នគឺ១៣,៥០មតែប៉ុណ្ណោះ ។ ដោយឡែក នៅស្ថានីយស្រុកសណ្តាន់ ម្សិលមិញទឹកមានកំពស់១៩,៨៨ម ហើយថ្ងៃនេះ ទឹកមានកំពស់១៩,៩០ម ទឹកកើនឡើង០,០២ម កំពស់ដែលដាក់ឲ្យប្រុងប្រយ័ត្ន១៨,៥០ម ។
បើប្រៀបធៀបកំពស់ទឹកស្ទឹងសែននៅរយៈពេល៣ឆ្នាំជាប់ៗគ្នានេះ គិតត្រឹមថ្ងៃទី០៤ ខែតុលា ឆ្នាំ២០២០ នៅស្ថានីយកំពង់ធំ កំពស់ទឹកស្ទឹងសែនត្រឹមតែ១២,២៧ម នៅថ្ងៃទី០៤ ខែតុលាឆ្នាំ២០២១ កំពស់ទឹកស្ទឹងសែនត្រឹមតែ១៣,២៩ម តែប៉ុណ្ណោះ ស្រាប់តែនៅថ្ងៃទី០៤ ខែតុលា ឆ្នាំ២០២២នេះ កំពស់ទឹកស្ទឹងសែនបានហក់ឡើងដល់ទៅ១៣,៩៩មឯណោះ ដែលខ្ពស់ហួសពីការគិតទុក។
ជាមួយនឹងជំនន់ទឹកភ្លៀងនេះដែរអាជ្ញាធរខេត្ត ក្រុង ស្រុកគ្រប់ថ្នាក់ ក៏បានអំពាវនាវសូមឲ្យបងប្អូនប្រជាពលរដ្ឋទាំងអស់ត្រូវមានការប្រុងប្រយ័ត្នឲ្យបានខ្ពស់ជាប់ជានិច្ចចំពោះសុវត្ថិភាពមនុស្ស សត្វ ក៏ដូចជាទ្រព្យសម្បត្តិ និងបាននាំយកនូវអំណោយទៅចែកជូនដល់ពលរដ្ឋដែលរងគ្រោះផងដែរ ៕
ចែករំលែកព័តមាននេះ