នាឱកាសអញ្ជើញបើកមហាសន្និបាតក្រុមប្រឹក្សាអូឡាំពិកអាស៊ី (OCA) លើកទី៤១ ប្រារព្ធធ្វើឡើងនៅសណ្ឋាគារសុខាភ្នំពេញនាថ្ងៃទី៤ ខែតុលា ឆ្នាំ២០២២ សម្តេចតេជោ បានចោទសួរថា តើហេតុអ្វីទៅបានជាកីឡារនៅទ្វីបអាស៊ីនៅទន់ខ្សោយ? ជាពិសេសបាល់ទាត់ សូម្បីវគ្គកណ្ដាលផ្ដាច់ព្រ័ត្រ World Cup ក៏ពិបាកចូលដែរ ខណៈមានប្រទេសមួយចំនួនតូចប៉ុណ្ណោះអាចចូលវគ្គជម្រុះ World Cup ជារៀងរាល់ពេល។
សម្ដេចតេជោ ហ៊ុន សែន បានគូសបញ្ជាក់ថា ៖«ក្នុងពេលជំនួបជាមួយ ប្រធានក្រុមប្រឹក្សា OCA មិញនេះខ្ញុំបានលើកឡើងចំណុចចំនួន២ ទីមួយអាស៊ីរបស់យើងគួរតែពិនិត្យថា តើហេតុអ្វីទៅបានជាកីឡាររបស់ទ្វីបរបស់យើងនៅទន់ខ្សោយ? ជាពិសេសបើពិនិត្យអំពីបាល់ទាត់យើងពិនិត្យឃើញថា ក្នុងតំបន់របស់យើងគ្រាន់តែចិន និងឥណ្ឌា គឺមានប្រជាជនជិត៣ពាន់លាននាក់បូកនឹងអាស៊ានប្រមាណ៦០០លាននាក់ទៀត និងបូកបណ្ដាប្រទេសនានា គឺប្រជាជនច្រើនណាស់។ ប៉ុន្ដែបើនិយាយបាល់ទាត់ សូម្បីតែវគ្គពាក់កណ្ដាលផ្ដាច់ព្រ័ត្រយើងក៏ពិបាកចូល ហើយក៏មានតែប្រទេសចំនួនតូចប៉ុណ្ណោះ ដែលបានអាចចូលទៅក្នុងវគ្គជម្រុះ World Cup ជារៀងរាល់ពេល»។
សម្ដេចតេជោ បន្ដថា ចំពោះ World Cup ឆ្នាំ២០២២នេះវិញ សម្ដេចពិតជារីករាយព្រោះក្នុងតំបន់ទ្វីបអាស៊ីមានព្រឹត្តិការណ៍ World Cup នៅកាតា។ សម្ដេចក៏សង្ឃឹមថា ក្រោយបញ្ចប់ការប្រកួតនឹងទទួលបានផ្លៃផ្កាពីការប្រកួត World Cup នៅទីនោះ ក៏ប៉ុន្ដែអ្វីគួរសិក្សាបន្ថែម គឺតើមានមូលហេតុអ្វីខ្លះ? ដែលប្រជាជនចំនួនដ៏ច្រើនបែរជាកីឡារទន់ខ្សោយជាងទ្វីបដ៏ទៃ?បើប្រៀបធៀបជាមួយទ្វីបអឺរ៉ុប និងទ្វីបអាមេរិក គឺទ្វីបអាស៊ីមានភាពទន់ខ្សោយជាងគេដែលចំណុចដែលត្រូវគួរសិក្សាបន្ថែមទៀត។
ចែករំលែកព័តមាននេះ