លោកពូទីនចុចឈ្មោះអតីតអ្នកប្រដាល់កម្ពស់ជាង២ម៉ែត្រ ចូលកងទ័ពត្រៀមប្រយុទ្ធនឹងអ៊ុយក្រែន
រុស្ស៊ី ៖ ប្រធានាធិបតីរុស្ស៊ី លោក Vladimir Putin បានជ្រើសរើសអតីតកំពូលអ្នកប្រដាល់សកលរបស់រុ
រុស្ស៊ី ៖ ប្រធានាធិបតីរុស្ស៊ី លោក Vladimir Putin បានជ្រើសរើសអតីតកំពូលអ្នកប្រដាល់សកលរបស់រុស្ស៊ីកម្ពស់ ២,១៣ម៉ែត្រ មកបម្រើក្នុងជួរកងទ័ពត្រៀមប្រយុទ្ធនៅក្នុងសង្គ្រាមជាមួយអ៊ុយក្រែន។ គួររំលឹកថា តើការចល័តទ័ពទ្រង់ទ្រាយធំរបស់លោកពូទីន នឹងប៉ះពាល់ដល់អត្តពលិករុស្ស៊ីដែរឬទេ?
យោងតាមប្រភពពីគេហទំព័រ LADbible បានចេញផ្សាយកាលពីថ្ងៃទី០៣ ខែតុលា បានឱ្យដឹងថា លោក ពូទីន បានចុះឈ្មោះលោក Nikolai Valuev អាយុ៤៩ឆ្នាំ អតីតកំពូលអ្នកប្រដាល់រុស្ស៊ី ម្ចាស់ខ្សែក្រវាត់ទម្ងន់ធ្ងន់ពិភពលោក WBA heavyweight ដែលកាន់កាប់តំណែងអ្នកប្រដាល់កម្ពស់ខ្ពស់ និងទម្ងន់ធ្ងន់បំផុតក្នុងប្រវត្តិសាស្ត្រប្រដាល់ជាមួយកម្ពស់២,១៣ម៉ែត្រ និងទម្ងន់១៤៩គីឡូក្រាម ចូលក្នុងបញ្ជីកងទ័ពបម្រុង សម្រាប់ការប្រយុទ្ធជាមួយអ៊ុយក្រែន។
កាលពីចុងខែកញ្ញាកន្លងទៅ ទូរទស្សន៍រុស្ស៊ី Izvestia បានថ្លែងទៅកាន់លោក Valuev ដែលបានចូលនិវត្តន៍ពីអាជីពកាលពីឆ្នាំ២០០៩ ដើម្បីបង្ហាញថា គាត់ត្រូវបានកោះហៅចូលការិយាល័យយោធា។
លោក Valuev បានប្រាប់អ្នកសារព័ត៌មានថា «ខ្ញុំគិតថាគ្រប់គ្នានឹងទៅ។ ខ្ញុំក៏បានទទួលការជូនដំណឹងផងដែរ។ ហើយខ្ញុំនឹងទៅការិយាល័យយោធា»។ ជំហានបន្ទាប់សម្រាប់លោក Valuev គឺត្រូវទៅការិយាល័យចុះឈ្មោះ និងបំពេញកាតព្វកិច្ចយោធា មុនពេលគាត់អាចចូលរួមក្នុងកាតព្វកិច្ចផ្លូវការរបស់កងទ័ពរុស្ស៊ី។ ហើយគាត់បាននិយាយថា គាត់នឹងធ្វើវានៅសប្តាហ៍នេះ។
ប្រធានាធិបតីរុស្ស៊ី លោក Vladimir Putin កាលពីថ្ងៃទី២១ ខែកញ្ញា បានប្រកាសអំពីអ្វីដែលលោកពិពណ៌នាថាជាការចល័តកងទ័ពទ្រង់ទ្រាយធំ ដោយផ្នែកជាមួយនឹងរដ្ឋមន្ត្រីការពារជាតិ លោក Sergei Shoigu ហើយទាហានបម្រុងប្រមាណ ៣០ម៉ឺននាក់នឹងត្រូវបានកោះហៅ។ ប៉ុន្តែទោះយ៉ាងណា ប្រព័ន្ធផ្សព្វផ្សាយរុស្ស៊ីបានរាយការណ៍ថា ចំនួនពិតប្រាកដអាចនឹងច្រើនជាងនេះទៅទៀត។
គួររំលឹកថា លោក Nikolai Valuev គឺជាម្ចាស់ខ្សែក្រវាត់ទម្ងន់ធ្ងន់ពិភពលោក WBA heavyweight រវាងចន្លោះឆ្នាំ ២០០៥ និង ២០០៧ ហើយម្តងទៀត នៅក្នុងឆ្នាំ ២០០៩ មុនពេលត្រូវបានផ្តួលដោយអ្នកប្រដាល់អង់គ្លេស David Haye កាលពីខែវិច្ឆិកា ឆ្នាំ២០០៩។
នៅក្នុងអាជីពប្រដាល់របស់ Valuev បានឆ្លងកាត់ការប្រកួតសរុប ៥៣ដង ឈ្នះ៥០ដង ចាញ់២ដង និងគ្មានលទ្ធផល១ដង ដោយផ្តួលគូប្រកួតឱ្យសន្លប់ចំនួន ៣៤ដង។ មិនតែប៉ុណ្ណោះ Valuev គឺជាអត្តពលិករុស្ស៊ីម្នាក់ ដែលទទួលបានការចាប់អារម្មណ៍ និងចូលចិត្តយ៉ាងខ្លាំងពីសំណាក់លោកពូទីនផងដែរ៕
ចែករំលែកព័តមាននេះ