រាជធានីភ្នំពេញ ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅឆ្នាំ២០១៧នេះ គ្រោងចំណាយថវិកាប្រមាណ៥,៤៣%នៃផលិតផលក្នុងស្រុក សរុបសម្រាប់មនុស្សម្នាក់ ដែលនឹងយកទៅប្រើប្រាស់ក្នុងវិស័យសង្គមកិច្ច រួមទាំងការងារយេនឌ័រផងដែរ ។
លោកទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងក្នុងពិធីសំណេះសំណាលជាមួយមន្ត្រីរាជការជាស្ត្រី ក្នុងទិវាអន្តរជាតិនារី ៨ មីនា ខួបលើកទី១០៦នាព្រឹកថ្ងៃទី៩ មីនាថា ឆ្នាំ២០១៧ ថា កញ្ចប់ថវិកាប្រមាណ៥,៤៣%នៃផលិតផលសរុបក្នុងស្រុកសម្រាប់មនុស្សម្នាក់ នឹងផ្ដល់ជូនប្រើប្រាស់ក្នុងវិស័យសង្គមកិច្ច ហើយក្នុងនាមជាសេនាធិការរបស់រាជរដ្ឋាភិបាល ក្រសួងសេដ្ឋកិច្ច និងហិរញ្ញវត្ថុបានខិតខំយកចិត្តទុកដាក់យ៉ាងសកម្មក្នុងការជំរុញសមភាពយេនឌ័រ ។
លោកបន្តថា ថវិកានេះនឹងយកទៅចំណាយលើការងារពាក់ព័ន្ធផ្ទាល់ និងយេនឌ័រ ព្រមទាំងសកម្មភាពផ្តល់ប្រយោជន៍ចំពោះស្ត្រី ហើយកញ្ចប់ថវិកាសម្រាប់ក្រសួងកិច្ចការនារីបានកើនជាលំដាប់ផងដែរ ។
លោកទេសរដ្ឋមន្ត្រីបន្តថា ៖ « ការវិនិយោគសាធារណៈរបស់រាជរដ្ឋាភិបាល ក្នុងវិស័យកសាងហេដ្ឋារចនាសម្ព័ន្ធរូបវ័ន្ត ប្រព័ន្ធទឹក ភ្លើង ផ្លូវថ្នល់ ការដឹកជញ្ជូន ព័ត៌មានវិទ្យា ក៏ដូចជាវិស័យកសិកម្ម សិប្បកម្ម ផលិតកម្ម និងសង្គមកិច្ច ជាពិសេស វិស័យអប់រំ សុខាភិបាល ដែលទាំងអស់នេះសុទ្ធតែបង្កើតនូវអំណោយផលផងដែរ។ កម្ពុជាបានវិវត្តន៍ខ្លួនចេញពីប្រទេសមានប្រាក់ចំណូលទាប មកជាប្រទេសមានប្រាក់ចំណូលមធ្យមកម្រិតទាប ហើយឈានមកកាន់ប្រទេសមានប្រាក់ចំណូលមធ្យមកម្រិតទាបនៅឆ្នាំ២០១៥។ រាជរដ្ឋាភិបាលគ្រោងនាំកម្ពុជាក្លាយជាប្រទេសមានប្រាក់ចំណូលមធ្យមកម្រិតខ្ពស់ នៅឆ្នាំ២០៣០ និងប្រាក់ចំណូលខ្ពស់នៅឆ្នាំ២០៥០ ខាងមុខនេះ » ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា ការបង្កើនការចំណាយលើវិស័យសង្គមកិច្ច ដែលផ្តោតលើផ្នែកអប់រំ សុខាភិបាល និងស្ត្រីជាដើមគឺជារឿងត្រឹមត្រូវ ព្រោះវាជាវិស័យជួយប្រទេសទៅថ្ងៃក្រោយ ដោយសារបើយើងពង្រឹងវិស័យអប់រំ បណ្តុះបណ្តាលធនធានមនុស្សមានគុណភាព ពួកគេនឹងចូលរួមអភិវឌ្ឍន៍ប្រទេស ។ ចំណែកវិស័យសុខាភិបាល កាលណាប្រជាពលរដ្ឋមានសុខភាពល្អ ពួកគេនឹងមានបញ្ញាវាងវៃ និងបង្កើតផលិតភាពរបស់ជាតិ ។
លោកបន្តថា ៖ « វាជាទិសដៅត្រឹមត្រូវ ប៉ុន្តែបញ្ហាគឺនៅត្រង់ថា តើការចំណាយធ្វើឡើងចំទិសដៅ និងមានប្រសិទ្ធភាពឬអត់ ជារឿងត្រូវតាមដាន និងពិនិត្យមើលឲ្យបានដិតដល់»។ លោកបន្តថា ៖ « ការឈានទៅកាន់ប្រទេសមានប្រាក់ចំណូលមធ្យមកម្រិតខ្ពស់ និងមានប្រាក់ចំណូលខ្ពស់ ផ្អែកលើសេដ្ឋកិច្ច និងការខិតខំរបស់យើង ទោះបីទៅមិនដល់ ក៏ទៅជិតដល់គោលដៅដែរ » ។
លោកបណ្ឌិត ម៉ី កល្យាណ បន្ថែមថា ៖ «អ្វីសំខាន់នាពេលនេះត្រូវខិតខំ និងដំឡើងសាច់ដុំរបស់កម្ពុជាឲ្យបាន ហើយរាជរដ្ឋាភិបាលធ្វើយ៉ាងណាគ្រប់គ្រងការមិនសប្បាយចិត្តរបស់ប្រជាពលរដ្ឋ និងបំពេញបន្ថែមនូវអ្វីជាចំណុចខ្វះខាតរបស់ខ្លួន » ៕
ចែករំលែកព័តមាននេះ