ជំនន់ទឹកភ្លៀងបន្តហូរទៅជន់លិចផ្ទះសម្បែងប្រជាពលរដ្ឋជាង៥០ខ្នង
- ប៉ៃលិន
រហូតមកដល់រសៀលថ្ងៃទី០៣ ខែតុលា ឆ្នាំ២០២២នេះ គេសង្កេតឃើញផ្ទៃមេឃកំពុងតែបន្តភ្លៀងធ្លាក់យ៉ាងខ្លាំងនៅក្រុងប៉ៃលិន ហើយទឹកភ្លៀងនេះ ក៏បានហូរបន្តទៅជន់លិច
ខេត្តប៉ៃលិន ៖ រហូតមកដល់រសៀលថ្ងៃទី០៣ ខែតុលា ឆ្នាំ២០២២នេះ គេសង្កេតឃើញផ្ទៃមេ ឃកំពុងតែបន្តភ្លៀងធ្លាក់យ៉ាងខ្លាំងនៅក្រុងប៉ៃលិន ហើយទឹកភ្លៀងនេះ ក៏បានហូរបន្តទៅជន់លិចភូមិកូនដំរី ភូមិដីស ស្ថិតក្នុងឃុំស្ទឹងត្រង់ ស្រុកសាលាក្រៅ បណ្តាលឱ្យទឹកហូរចូលទៅក្នុងផ្ទះរបស់ពលរដ្ឋជាង៥០គ្រួសារ ខណៈពេលដែលអាជ្ញាធរខេត្តប៉ៃលិន ក៏បានដឹកនាំមន្ត្រីក្រោមឱវាទចុះទៅជួយជម្លៀសជនរងគ្រោះទាំងអស់ទៅកាន់រកទីទួលសុវត្ថិភាពផងដែរ។
បើតាមប្រភពព័ត៌មានពីលោក សៀ សុខុន អភិបាលរងស្រុកសាលាក្រៅ បានឱ្យដឹងថា ជំនន់ ទឹកភ្លៀងបានកើតឡើងតាំងពីរសៀលថ្ងៃទី០២ ខែតុលា ឆ្នាំ២០២២មកម្ល៉េះ លុះរហូតមកដល់ថ្ងៃទី០៣ ខែតុលានេះ ទឹកនៅមិនទាន់ស្រកអស់នៅឡើយទេ ដោយធ្វើឱ្យប៉ះពាល់ដល់ផ្ទះសម្បែង ដំណាំដាំដុះរបស់ប្រជាពលរដ្ឋ ទាំងឃុំអូរអណ្តូង ឃុំសាលាក្រៅ និងឃុំស្ទឹងត្រង់ផងដែរ។
លោកបន្តទៀតថា ប៉ុន្តែអ្វីដែលគួរឱ្យកត់សម្គាល់នោះ គឺនៅពេលនេះ ជំនន់ទឹកភ្លៀងមិនទាន់ស្រកអស់ចេញពីផ្ទះប្រជាពលរដ្ឋមួយចំនួនក្នុងឃុំស្ទឹងត្រង់នៅឡើយទេ ខណៈមេឃកំពុងបន្តធ្លាក់ភ្លៀងខ្លាំងនៅក្នុងក្រុងប៉ៃលិន ដែលជាហេតុអាចនឹងបន្តហូរធ្លាក់ទៅក្នុងអូរ ស្ទឹង និងធ្វើឱ្យជន់លិចផ្ទះប្រជាពលរដ្ឋថែមទៀតផងដែរ។
ទោះបីជាយ៉ាងណា លោកជំទាវ បាន ស្រីមុំ អភិបាលខេត្តប៉ៃលិន បានដឹកនាំក្រុមការងារ ចុះទៅត្រួតពិនិត្យផ្ទះប្រជាពលរដ្ឋរងគ្រោះ និងធ្វើការចែកអំណោយស្បៀងសង្គ្រោះបន្ទាន់ជូនដល់បងប្អូនប្រជាពលរដ្ឋផងដែរ។
សូមបញ្ជាក់ថា រហូតមកដល់វេលាម៉ោង៣និង៥០នាទីរសៀល ថ្ងៃទី០៣ ខែតុលា ឆ្នាំ២០២២នេះ មេឃនៅតែបន្តធ្លាក់ភ្លៀងខ្លាំងក្នុងក្រុងប៉ៃលិន រីឯនៅស្រុកសាលាក្រៅ ផ្ទៃមេឃក៏នៅមានសភាពអួរអាប់គួរឱ្យព្រួយបារម្ភ ក្រែងមានភ្លៀងធ្លាក់ថែមទៀត អាចនឹងលិចលង់លំនៅឋានរបស់ប្រជាពលរដ្ឋពិតប្រាកដមែន។ ចំណែកអាជ្ញាធរខេត្ត និងមន្ត្រីនៅមូលដ្ឋាន ក៏កំពុងតែដុតដៃដុតជើង ត្រៀមរៀបចំកម្លាំងចុះជួយសង្គ្រោះដល់ប្រជាពលរដ្ឋនៅក្នុងភូមិខាងលើហើយ បើសិនមានករណីជំនន់ខ្លាំងកើតឡើងដូចកាលពីឆ្នាំមុនៗ៕
ចែករំលែកព័តមាននេះ