លោក ប្រាយុទ្ធ ចាន់អូចា វិលត្រលប់ចូលធ្វើជានាយករដ្ឋមន្ត្រីថៃ នៅថ្ងៃចន្ទនេះ
ទីក្រុងបាងកក ៖ នៅព្រឹកថ្ងៃចន្ទ ទី៣ ខែតុលានេះ លោក ប្រាយុទ្ធ ចាន់អូចា បានវិលត្រលប់ទៅការិយាល័យរបស់លោកវិញ ដើម្បីបំពេញការងារជានាយករដ្ឋមន្ត្រីថៃ…
ទីក្រុងបាងកក ៖ នៅព្រឹកថ្ងៃចន្ទ ទី៣ ខែតុលានេះ លោក ប្រាយុទ្ធ ចាន់អូចា បានវិលត្រលប់ទៅការិយាល័យរបស់លោកវិញ ដើម្បីបំពេញការងារជានាយករដ្ឋមន្ត្រីថៃ ក្រោយពីតុលាការធម្មនុញ្ញ បានផ្អាកការងារពាក់ព័ន្ធនឹងបញ្ហាចម្រូងចម្រាស់សម្រាប់រយៈពេល នៃការកាន់អំណាច ។
ដូចការគ្រោងទុក តុលាការធម្មនុញ្ញនៅប្រទេសថៃ បានចេញសេចក្ដីសម្រេចកាលពីថ្ងៃសុក្រ ទី៣០ ខែកញ្ញាថា លោកប្រាយុទ្ធចាន់អូចា មិនទាន់កាន់អំណាចគ្រប់ប្រាំបីឆ្នាំ នៅឡើយទេ ។ ដូច្នេះបើពិនិត្យទៅលើទិដ្ឋភាពច្បាប់របស់ថៃ តុលាការធម្មនុញ្ញសម្រេចថា លោក ប្រាយុទ្ធ ចាន់អូចា អាចកាន់តំណែងនាយករដ្ឋមន្ត្រីថៃ ជាបន្តទៀតបាន ។
តុលាការ បានសម្រេចកាលពីថ្ងៃសុក្រ ដោយសម្លេង ៦-៣ គាំទ្រនាយករដ្ឋមន្ត្រី និងបានរកឃើញថា អាណត្តិរបស់លោក ប្រាយុទ្ធ គួរតែត្រូវបានគណនា ចាប់ពីថ្ងៃទី៦ ខែមេសា ឆ្នាំ២០១៧ ជំនួសឲ្យថ្ងៃទី២៤ ខែសីហា ឆ្នាំ២០១៤ នៅពេលដែលលោកបានក្លាយជានាយករដ្ឋមន្ត្រី នៃរដ្ឋាភិបាលរបបយោធា បន្ទាប់ពីធ្វើរដ្ឋប្រហារក្នុងខែឧសភាឆ្នាំនោះ ។
តុលាការធម្មនុញ្ញ សម្រេចថា លោក ប្រាយុទ្ធ នៅតែអាចក្លាយជានាយករដ្ឋមន្ត្រី រយៈពេល ២ឆ្នាំកន្លះបន្ថែមទៀត ពីព្រោះដែនកំណត់រយៈពេលប្រាំបីឆ្នាំ ដែលមានចែងក្នុងធម្មនុញ្ញ គួរតែត្រូវបានរាប់តែ នៅពេលដែលរបបយោធា ត្រូវបានគាំទ្រដោយរដ្ឋធម្មនុញ្ញ ដែលចូលជាធរមាន នៅខែមេសា ឆ្នាំ២០១៧ ។
សូមបញ្ជាក់ថា តុលាការធម្មនុញ្ញរបស់ថៃ កាលពីថ្ងៃពុធ ទី២៤សីហា បានផ្អាកការងាររបស់លោក ប្រាយុទ្ធ ចាន់អូចា ពីនាយករដ្ឋមន្ត្រីថៃ បន្ទាប់ពីស្ថាប័នច្បាប់កំពូលមួយនេះ សម្រេចទទួលយកពាក្យបណ្ដឹងតវ៉ារបស់ក្រុមប្រឆាំង ដែលសុំអោយពិនិត្យលើភាពស្របច្បាប់នៃរយៈពេលកាន់អំណាចរបស់នាយករដ្ឋមន្ត្រីថៃ បច្ចុប្បន្ននេះ ។
លោក ប្រាយុទ្ធ បានបង្ហោះនៅលើទំព័រហ្វេសប៊ុកផ្លូវការរបស់លោក ដោយសន្យាថា នឹងដឹកនាំប្រជាជនថៃ ឆ្ពោះទៅរក “យុគសម័យមាសថ្មី” នៃវឌ្ឍនភាព និងការអភិវឌ្ឍន៍ ដោយជំរុញឲ្យមានគម្រោងដឹកជញ្ជូន និងហេដ្ឋារចនាសម្ព័ន្ធសំខាន់ៗ ។
ឧត្តមសេនីយ៍ ប្រាយុទ្ធ ចាន់អូចា បានបញ្ជាក់យ៉ាងច្បាស់ថា គាត់គ្រោងនឹងបន្តធ្វើ “រឿងអស្ចារ្យ” បន្ថែមទៀតសម្រាប់ប្រទេសថៃ ៕
ចែករំលែកព័តមាននេះ