រាជធានីភ្នំពេញ ៖ ការសាងសង់ស្ពានស្ទឹងត្រង់ ក្រូចឆ្មារ ដែលគ្រោងចំណាយរហូតដល់៥៧លានដុល្លារអាមេរិក នឹងចាប់ផ្តើមនៅពេលឆាប់ៗនេះ ប្រសិនជាគ្មានអ្វីប្រែប្រួលទេនោះ ។
លោក នូ វឌ្ឍនៈ អគ្គនាយកបច្ចេកទេសនៃក្រសួងសាធារណការ និងដឹកជញ្ជូន បានថ្លែងកាលពីថ្ងៃទី៧ មីនា ថា ការសាងសង់ស្ពាននេះនឹងចំណាយរយៈពេលបីឆ្នាំ និងសាងសង់ដោយក្រុមហ៊ុនសៀងហៃ ព្រមទាំងត្រួតពិនិត្យបច្ចេកទេសដោយក្រុមហ៊ុនក្វាងចូវ វ៉ានអាន ។
លោកបន្តថា ស្ពាននេះមានប្រវែង១.១៣១ម៉ែត្រ និងផ្លូវភ្ជាប់នៅត្រើយខាងកើត ឬទឹកដីស្រុកក្រូចឆ្មារមានប្រវែង៧៥០ម៉ែត្រ និងត្រើយខាងលិចស្ថិតក្នុងទឹកដីស្រុកស្ទឹងត្រង់ មានប្រវែង៣.០៨៩ម៉ែត្រ ។
លោកថ្លែងថា ៖ « ខ្ញុំគិតថា រាជរដ្ឋាភិបាលនឹងពង្រីកផ្លូវចេញពីក្រុងកំពង់ចាម ទៅកាន់ស្រុកស្ទឹងត្រង់ផងដែរ ព្រោះថា បើយើងមានស្ពានស្អាតហើយ តែផ្លូវមិនស្អាត មិនល្អ ក៏មិនសមស្របដែរ » ។ លោកបន្តថា ៖ « រាជរដ្ឋាភិបាលបាននិងកំពុងខិតខំកសាងហេដ្ឋារចនាសម្ព័ន្ធនានានៅទូទាំងប្រទេស ទោះទៅដល់ទីណា ក៏យើងឃើញមានស្ពាន និងផ្លូវថ្មីៗខ្វាត់ខ្វែងផងដែរ » ។
លោក វ៉ា ស៊ីមសូរិយា អ្នកនាំពាក្យក្រសួងសាធារណការ និងដឹកជញ្ជូន ថ្លែងថា ការសាងសង់ហេដ្ឋារចនាសម្ព័ន្ធ ផ្លូវ ស្ពាន ជាគម្រោងវិនិយោគធំៗរបស់ជាតិ ហើយកម្ពុជាបានឈានដល់ដំណាក់កាលត្រូវការថវិកាកម្រិតទ្វេដងដើម្បីវិនិយោគលើហេដ្ឋារចនាសម្ព័ន្ធនានា ព្រោះជាការធ្វើឲ្យសេដ្ឋកិច្ចមានកំណើនទ្វេដងបន្ថែមទៀត ។
លោកថ្លែងថា ៖ « ប្រសិនជារាជរដ្ឋាភិបាល មិនវិនិយោគលើហេដ្ឋារចនាសម្ព័ន្ធ សេដ្ឋកិច្ចរបស់កម្ពុជានឹងមិនកើនឡើងបន្ថែមទៀតទេ គឺអាចនៅកម្រិត៧% ឬទាបជាងនេះ » ។ លោកបន្តថា ៖ « ហេដ្ឋារចនាសម្ព័ន្ធមានសារសំខាន់ណាស់សម្រាប់ជាតិទាំងមូល ហេតុនេះទើបប្រទេសនានាចំណាយថវិកាជាច្រើនលើវិស័យនេះ ដើម្បីរុញប្រទេសរបស់ខ្លួនទៅកាន់កម្រិតថ្មីមួយទៀត » ។
លោកបណ្ឌិត ម៉ី កល្យាណ ទីប្រឹក្សាជាន់ខ្ពស់ឧត្តមក្រុមប្រឹក្សាសេដ្ឋកិច្ចជាតិ ថ្លែងថា រាជរដ្ឋាភិបាលកម្ពុជាបាននិងកំពុងគិតគូរពង្រីកហេដ្ឋារចនាសម្ព័ន្ធយ៉ាងច្រើន ប៉ុន្តែល្បឿនយឺតនៅឡើយ ។ ហេតុនេះ លោកសំណូមពរឲ្យពន្លឿនការអភិវឌ្ឍក្នុងវិស័យនេះ ព្រោះវិស័យដឹកជញ្ជូនកម្ពុជាកំពុងក្លាយជាបញ្ហាប្រឈមមួយ ដែលពិបាកប្រកួតប្រជែងជាមួយបណ្តាប្រទេសក្នុងតំបន់ ព្រោះការដឹកជញ្ជូនរបស់កម្ពុជាមានតម្លៃថ្លៃ ។
លោកថ្លែងថា ៖ « ចង់ឲ្យសេដ្ឋកិច្ចរីកចម្រើន និងទាក់ទាញវិនិយោគិនបន្ថែមថ្មីៗ កម្ពុជាត្រូវរៀបចំខ្លួនជាមុន ជាពិសេស ការពង្រីកហេដ្ឋារចនាសម្ព័ន្ធដើម្បីឆ្លើយតបនឹងតម្រូវការរបស់វិនិយោគិនទាំងនោះ » ។ លោកបន្តថា ៖ « ហេដ្ឋារចនាសម្ព័ន្ធជាបញ្ហាប្រឈមមួយក្នុងចំណោមបញ្ហាធំៗរបស់កម្ពុជា ដូចជា អគ្គិសនីថ្លៃខ្ពស់និងមិនមានគុណភាព ការដឹកជញ្ជូនថ្លៃ និងបរិយាកាសវិនិយោគមិនទាន់មានភាពប្រសើរនៅឡើយ » ៕
ចែករំលែកព័តមាននេះ