រាជធានីភ្នំពេញ ៖ ក្រសួងទេសចរណ៍កំពុងរៀបចំចលនាប្រឡងប្រណាំងរមណីយដ្ឋានស្អាតនៅគ្រប់រាជធានី-ខេត្តទូទាំងប្រទេស ក្នុងគោលដៅឲ្យអាជ្ញាធរមូលដ្ឋានបង្កើនការយកចិត្តទុកដាក់លើបញ្ហាអនាម័យ សេវាកម្ម និងសុវត្ថិភាពម្ហូបអាហារជាដើម ។
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងឲ្យដឹងតាមទូរស័ព្ទនៅព្រឹកថ្ងៃទី៨ មីនាថា ចលនាប្រឡងប្រណាំងរមណីយដ្ឋានស្អាតបានធ្វើកន្លងមកហើយ ប៉ុន្តែមិនទាន់ទូលំទូលាយនៅឡើយទេ។ ពេលនេះក្រសួងជំរុញឲ្យរមណីយដ្ឋាននានាគោរពតាមស្តង់ដាច្បាស់លាស់ ទាំងសេវាកម្ម អនាម័យ សុវត្ថិភាពចំណីអាហារ ព្រមទាំងរៀបចំឲ្យមានភាពទាក់ទាញផងដែរ ។
លោកមានប្រសាសន៍ថា ៖ « អាជ្ញាធរថ្នាក់រាជធានី-ខេត្ត មន្ទីរជំនាញនិយាយពីកង្វះខាតថវិកាសម្រាប់វិនិយោគ ឬរៀបចំរមណីយដ្ឋានទាំងនោះឲ្យល្អប្រសើរ ប៉ុន្តែការពិតអាជ្ញាធរមូលដ្ឋានអាចរៀបចំបានតាមរយៈការសហការជាមួយវិស័យឯកជនធ្វើការវិនិយោគរួមគ្នា ឬស្វែងរកដៃគូអភិវឌ្ឍន៍ដើម្បីជួយ ហើយសំខាន់ត្រូវមានគំនិតច្នៃប្រឌិត និងមានទំនាក់ទំនងជាមួយដៃគូនានាឲ្យបានល្អ » ។
លោកបន្តថា ៖ « មន្ទីរជំនាញ ឬអាជ្ញាធរមូលដ្ឋានអាចលើកសំណើមកក្រសួង ប្រសិនជាពួកគេចង់ឈ្វេងយល់ពីការគ្រប់គ្រងរមណីយដ្ឋានបែបណា ពួកគេអាចទៅសិក្សានៅប្រទេសថៃ១ខែឬ២ខែ នឹងយល់ដឹងច្រើន និងយកបទពិសោធន៍ទាំងនោះមកអនុវត្តនៅកម្ពុជា » ។
កម្មវិធីប្រឡងប្រណាំងរមណីយដ្ឋាននេះ នឹងប្រកាសលទ្ធផលនៅខែវិច្ឆិកាខាងមុខ ប្រសិនជាគ្មានអ្វីប្រែប្រួលទេនោះ ។
លោក ហូ វណ្ឌី អគ្គលេខាធិការសមាគមសម្ព័ន្ធទេសចរណ៍ជាតិកម្ពុជា ថ្លែងថា ការរៀបចំចលនាប្រឡងប្រណាំងបែបនេះជាការល្អ ដែលស្តង់ដារបស់អាស៊ានបានចែងអំពីក្រមសុខាភិបាល ព្រោះពួកគេបារម្ភពីគុណភាពម្ហូបអាហារ ហើយបញ្ហាម្ហូបអាហារនៅកម្ពុជា អាជ្ញាធរកាំកុងត្រូលបានត្រួតពិនិត្យជាប្រចាំផងដែរ។ លោកបន្តថា ក្រសួងរៀបចំចលនាប្រឡងប្រណាំងនេះ គឺជាការលើកទឹកចិត្តម្ចាស់អាជីវកម្មពង្រឹងគុណភាពធនធានមនុស្ស និងជំនាញជាក់លាក់ក្នុងវិស័យនេះឲ្យមានស្តង់ដាមួយ ។
លោកបន្តថា រមណីយដ្ឋាននានាគួររៀបចំសេវាកម្មឲ្យមានស្តង់ដា ឧទាហរណ៍ សម្លកកូរ ត្រូវមានស្តង់ដាមួយថា ត្រូវដាក់បន្លែអ្វី ដាក់សាច់អ្វី មិនមែនចេះតែដាក់តាមការនឹកឃើញ ហើយហៅថា សម្លកកូរនោះទេ ។ លោកបន្តថា ថវិកាសម្រាប់រៀបចំការងារនេះ រាជរដ្ឋាភិបាលបានបែងចែកទៅស្ថាប័នថ្នាក់ក្រោមជាតិរួចហើយ ប៉ុន្តែបញ្ហាគឺអាជ្ញាធរខេត្តនានាហាក់ដូចជាដេកលក់ ដែលធ្វើឲ្យអនាម័យនៅតាមរមណីយដ្ឋានបាត់បង់ការគ្រប់គ្រង និងប៉ះពាល់ដល់អារម្មណ៍ភ្ញៀវទេសចរជាតិ និងអន្តរជាតិ ទីបំផុត គឺបាត់បង់ចំណូលទាំងអស់គ្នា ។
លោក ហូ វណ្ឌី បន្តថា ៖ « ប្រសិនជារមណីយដ្ឋាននានាយកខ្នាតដែលក្រសួងបានរៀបចំ និងមានការតាមដានជាក់លាក់ លោកជឿថា រមណីយដ្ឋាននានានឹងទាក់ទាញភ្ញៀវទេសចរ និងទទួលបានចំណូលកាន់តែច្រើន ហើយជួយភ្ញោចគំនិតម្ចាស់អាជីវកម្ម រួមទាំងអ្នកទេសចរកាន់តែសកម្មចូលរួមក្នុងចលនាប្រឡងប្រណាំងនេះ » ៕
ចែករំលែកព័តមាននេះ