ស្រវឹងស្រាជិះទូកទៅរាយមង ភ្លាត់ស្នៀតធ្លាក់ទឹកលង់ស្លាប់…!
ខេត្តបាត់ដំបង៖ បុរសម្នាក់ដែលមានមុខរបជាអ្នកនេសាទ បានលង់ទឹកស្លាប់នៅពេលស្រវឹងស្រា ហើយជិះទូកទៅរាយមង កាលពីវេលាម៉ោង៦និង៣០នាទី ល្ងាចថ្ងៃទី០៧ មីនា
ខេត្តបាត់ដំបង៖ បុរសម្នាក់ដែលមានមុខរបជាអ្នកនេសាទ បានលង់ទឹកស្លាប់នៅពេលស្រវឹងស្រា ហើយជិះទូកទៅរាយមង កាលពីវេលាម៉ោង៦និង៣០នាទី ល្ងាចថ្ងៃទី០៧ មីនា នៅចំណុចអតីតឡូត៍នេសាទលេខ៣ ស្ថិតក្នុងភូមិកំពង់ប្រហុក ឃុំកោះជីវាំង ស្រុកឯកភ្នំ។ សេចក្ដីរាយការណ៍បានឲ្យដឹងថា ជនរងគ្រោះឈ្មោះ សឿន សល់ អាយុ៣៣ឆ្នាំ មានមុខរបជាអ្នកនេសាទ រស់នៅភូមិព្រែកទាល់ ឃុំកោះជីវាំង។ អ្នកនេសាទរូបនេះបានជិះទូកទៅរាយមង ខណ:ដែលខ្លួនស្រវឹងស្រាជោគជាំ លុះពេលកំពុងរាយមង ស្រាប់តែភ្លាត់ស្នៀតធ្លាក់ពីលើទូកហែលមិនរួចក៏លង់ទឹកស្លាប់តែម្ដង។
បើតាមប្រភពបានឲ្យដឹងថា ជនរងគ្រោះបានរអិលធ្លាក់ពីលើទូកលង់ស្លាប់ភ្លាមៗ ហើយក្រុមគ្រួសារបានដឹងនៅពេលបាត់ជនរងគ្រោះមិនឃើញត្រលប់មកផ្ទះ។ អ្នកភូមិបានឲ្យដឹងទៀតថា ក្រោយពីបាត់ស្ងាត់ឈឹងបែបនេះ គេមានការសង្ស័យក៏នាំគ្នាជិះទូកទៅរកកន្លែងព្រែកដែលជនរងគ្រោះតែងទៅរាយមង ស្រាប់តែឃើញទូកតែបាត់មនុស្ស។ អ្នកភូមិ និងសាច់ញាតិសង្ស័យថា ជនរងគ្រោះប្រាកដជាធ្លាក់ទឹក ហើយអាចលង់ស្លាប់ទៀត ទើបនាំគ្នារាវរករហូតដល់វេលារំលងអាធ្រាត្រ ឈានចូលថ្ងៃទី៨ មីនា ទើបប្រទះឃើញសាកសព និងបង្កឲ្យមានការភ្ញាក់ផ្អើលតែម្ដង។
សពជនរងគ្រោះត្រូវបានក្រុមគ្រួសារដឹកទៅកាន់លំនៅឋាន រីឯសមត្ថកិច្ចក៏បានចុះទៅពិនិត្យសពជនរងគ្រោះផងដែរ ដើម្បីស្វែងរកមូលហេតុ ដែលនាំឲ្យជនរងគ្រោះលង់ទឹកស្លាប់។ ក្រោយពីពិនិត្យនិងធ្វើកំណត់ហេតុ មន្ត្រីជំនាញបានប្រគល់សពជនរងគ្រោះឲ្យទៅក្រុមគ្រួសារធ្វើបុណ្យតាមប្រពៃណីហើយ៕
ចែករំលែកព័តមាននេះ