ខេត្តកណ្ដាល ៖ កម្លាំងនគរបាលស្រុកអង្គស្នួល បានបន្តធ្វើប្រតិបត្តិការបង្ក្រាបក្រុមជួញដូរ និងប្រើប្រាស់ គ្រឿងញៀន តាមបែបភ្លៀងរលឹមដោយនៅក្នុងរយៈពេល៤ថ្ងៃ
ខេត្តកណ្ដាល ៖ កម្លាំងនគរបាលស្រុកអង្គស្នួល បានបន្តធ្វើប្រតិបត្តិការបង្ក្រាបក្រុមជួញដូរ និងប្រើប្រាស់ គ្រឿងញៀន តាមបែបភ្លៀងរលឹមដោយនៅក្នុងរយៈពេល៤ថ្ងៃ គឺគិតត្រឹមថ្ងៃទី៣ ដល់ថ្ងៃទី៧ ខែមីនា ឆ្នាំ២០១៧ បានធ្វើការឃាត់ខ្លួន មុខសញ្ញាជួញដូរ និងប្រើប្រាស់បានចំនួន៧នាក់ និងដកហូតបានគ្រឿង ញៀនប្រភេទម៉ាទឹកកក បានចំនួន៩កញ្ចប់រួមជាមួយជញ្ជីងសម្រាប់ថ្លឹងគ្រឿងញៀន និងសម្ភារពាក់ព័ន្ធ មួយចំនួនទៀតផងដែរ បន្ទាប់មកបាននាំទៅសាកសួរ និងកសាងសំណុំរឿងបញ្ជូនទៅសាលាដំបូងខេត្តកណ្ដាលចាត់ការតាមច្បាប់។
ការបង្ក្រាប និងចាប់ខ្លួនបានជាបន្តបន្ទាប់នោះ គឺធ្វើឡើងដោយការល្បាតពួនស្ទាក់បទល្មើស និងការទទួលព័ត៌មានពីប្រជាពលរដ្ឋ ដែលបានរាយការណ៍ប្រាប់ដោយពួកគាត់បានចូលរួមចំណែកយ៉ាងសកម្ម នៅក្នុងការអនុវត្តគោលនយោបាយភូមិឃុំមានសុវត្ថិភាព។ នគរបាលបានឲ្យដឹងថា លើកទៅ១ នៅវេលាម៉ោង៨និង២០នាទីយប់ ថ្ងៃទី៣ ខែមីនា ឆ្នាំ២០១៧ ឃាត់ខ្លួនបានម្នាក់ នៅតាមផ្លូវលំ ស្ថិតនៅក្នុងភូមិព្រៃបឹង ឃុំបែកចាន ស្រុកអង្គស្នួល ខេត្តកណ្តាល ឃាត់ខ្លួនបានជនសង្ស័យ ម្នាក់ រួមនឹងថ្នាំញៀន២កញ្ចប់ និងសម្ភារប្រើប្រាស់មួយចំនួនទៀត។
ជនដែលត្រូវចាប់ខ្លួននោះឈ្មោះ ប៊ុន រិទ្ធី ហៅឡូញ ភេទប្រុសអាយុ៣៤ឆ្នាំ ជនជាតិខ្មែរ មុខរបរកម្មករសំណង់ មានទីលំនៅក្នុងភូមិព្រៃបឹង ឃុំបែកចាន។ បន្ទាប់ពីចាប់ខ្លួនកម្លាំងបាននាំទៅសាកសួរ ហើយជនសង្ស័យបានសារភាពថា ចំពោះថ្នាំញៀនខ្លួន ទិញពីឈ្មោះ ស៊ុន វិបុល ភេទប្រុស អាយុ៣៩ឆ្នាំ ជនជាតិខ្មែរ ស្នាក់នៅក្នុងភូមិជាមួយគ្នា។ នគរបាលដដែលបានបន្តថា លើកទី២ នៅវេលាម៉ោង៦និង៣០នាទីល្ងាច ថ្ងៃទី៥ ខែមីនា កម្លាំងបានចុះទៅបង្ក្រាប និងចាប់ខ្លួនជនសង្ស័យបានចំនួន៣នាក់ទៀត នៅតាមផ្លូវលំ ស្ថិនៅក្នុងភូមិត្រពាំងពើក ឃុំពើក ស្រុកអង្គស្នួល ខេត្តកណ្តាល។
ជនសង្ស័ទាំង៣នាក់នោះ១-ឈ្មោះ សុង សូយ ភេទប្រុស៣៨ឆ្នាំ ជនជាតិខ្មែរ មុខរបរជាងជួសជុលទូរសព្ទ័ដៃ ស្នាក់នៅក្នុងភូមិខាងលើ ២-ឈ្មោះ ភឹម ជំនាញ ហៅ ពាញ ភេទប្រុស អាយុ៣១ឆ្នាំ មុខរបកម្មកររោងចក្រ ស្នាក់នៅក្នុងភូមិជាមួយគ្នា ៣-ឈ្មោះ ផន សុធានី ភេទប្រុសអាយុ២១ឆ្នាំ ជនជាតិខ្មែរ មុខរបរស្នាក់នៅក្នុងភូមិអង្គស្នួល ទី៣-ឃុំពើក ស្រុកអង្គស្នួល ខេត្តកណ្តាល។ ក្រោយចាប់ខ្លួនកម្លាំងដកហូតបានថ្នាំញៀនប្រភេទម៉ាទឹកកក៤កញ្ចប់ និងឧបករណ៍ប្រើប្រាស់ ព្រមទាំងថង់សម្រាប់ ច្រកថ្នាំមួយចំនួន និងជញ្ជីងសម្រាប់ថ្លឹងថ្នាំញៀន១គ្រឿង ជនសង្ស័យឈ្មោះ សុង សូយ បានសារភាពថា ខ្លួនបានបង់លុយទៅឲ្យឈ្មោះ ផន សុធានី ក្នុង១ខែចំនួន១លានរៀល ដើម្បីកុំឲ្យរាយការប្រាប់សមត្ថកិច្ចមិនតែប៉ុណ្ណោះ ឈ្មោះនេះបានទិញថ្នាំញៀនពីខ្លួនយកទៅប្រើប្រាស់រហូត។
ចំណែកថ្នាំញៀននោះខ្លួនបានទិញពីមុខសញ្ញាជួញដូរមិនស្គាល់ឈ្មោះម្នាក់ នៅម្តុំចោមចៅ ខណ្ឌពោធិសែនជ័យ រាជធានីភ្នំពេញ យកទៅលក់បន្ត។ ដោយឡែកជនសង្ស័យឈ្មោះ ផន សុធានី បានសារភាពថា ខ្លួនពិតជាទទួលលុយដាក់ខែពីឈ្មោះ សុង សូយ មែនហើយក៏បានទិញថ្នាំញៀនពីឈ្មោះនោះយកទៅប្រើប្រាស់ រយៈពេល១ឆ្នាំមក ហើយ ព្រមទាំងបានទិញថ្នាំញៀនជំពាក់ សុង សូយ នេះចំនួន៤០ម៉ឺនរៀល ហើយដែរ។
ប្រភពដដែលបានបន្តថា លើកទី៣នៅវេលាម៉ោង១០និង៤០នាទីព្រឹក ថ្ងៃទី៦ ខែមីនា កម្លាំងបានបន្តទៅចាប់ខ្លួនជនសង្ស័យម្នាក់ទៀត នៅតាមផ្លូវលំស្ថិតនៅក្នុងភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល។ ជនសង្ស័យរូបនោះឈ្មោះ សួរ នៅ ភេទប្រុស អាយុ៣០ឆ្នាំ ជនជាតិខ្មែរ មុខរបរបើកបររថយន្តស្នាក់នៅក្នុងភូមិខាងលើ និងបានដកហូតបានម៉ាទឹកកក១កញ្ចប់តូច ម៉ូតូ១គ្រឿងម៉ាកឃ្លីកពណ៌ក្រហម លាយខ្មៅ១គ្រឿង ពាក់ស្លាកលេខ ភ្នំពេញ1R-2032។ ជនសង្ស័យបានសារភាពថា ខ្លួនបានទិញថ្នាំ១កញ្ចប់នោះក្នុងតម្លៃ២ម៉ឺនរៀលដើម្បីប្រើប្រាស់។ លើកទី៤នៅវេលាម៉ោង៥និង៣០នាទី ល្ងាចថ្ងៃទី៦ដដែលនោះ កម្លាំងបានចុះទៅបង្ក្រាបបានមួយករណី ទៀត ឃាត់ខ្លួនបានម្នាក់នៅតាមផ្លូវលំ ខាងក្រោយផ្សារថ្នល់ទទឹង ស្ថិតនៅក្នុងភូមិព្រៃគោ ឃុំលំហាច ស្រុកអង្គស្នួល ខេត្តកណ្តាល។
ជនសង្ស័យឈ្មោះ ចាន់ សាវុធ ហៅពៅ ភេទប្រុស៣២ឆ្នាំ ជនជាតិខ្មែរ មុខរបរមិនពិត ស្នាក់នៅក្នុងភូមិត្រយឹង ឃុំពើក ស្រុកអង្គស្នួល ខេត្តកណ្តាល។ ដកហូតបានម៉ាទឹកកក១កញ្ចប់តូច លុយចំនួន២៨០០០រៀល ទូរស័ព្ទដៃ១គ្រឿងម៉ាកណូគាចុចពិល ហើយជននោះបានសារភាពថាថ្នាំញៀននេះ ខ្លួនបានទៅទិញពីអ្នកលក់នៅក្បែររោងចក្រឆ្នាំងក្នុង សង្កាត់បឹងកក់ ខណ្ឌទួលគោក រាជធានីភ្នំពេញ។ ប្រភពខាងលើបានបន្តថា លើកទី៥នៅវេលាម៉ោង៩និង៣០នាទី យប់ថ្ងៃទី៧ ខែមីនា ឆ្នាំ២០១៧ កម្លាំងបានចុះទៅបង្ក្រាប និងចាប់ខ្លួនជនសង្ស័យម្នាក់ទៀតនៅតាមផ្លូវលំ ស្ថិតនៅក្នុងភូមិព្រៃរកា ឃុំឆក់ឈើនាង ស្រុកអង្គស្នួល ខេត្តកណ្តាល។
ជននោះមានឈ្មោះ ភឺន មេសា ភេទប្រុស អាយុ២៤ឆ្នាំ ជនជាតិខ្មែរ មុខរបរបើកបររថយន្ត ស្នាក់នៅក្នុងភូមិកើតហេតុខាងលើ និងដកហូតបានម៉ាទឹកកក១កញ្ចប់មធ្យម រួមជាមួយឧបករណ៍ប្រើប្រាស់ និងថង់សម្រាប់ច្រកថ្នាំញៀនមួយចំនួនទៀត។ ក្រោយពេលចាប់ខ្លួនជននោះ បានសារភាពថា ចំពោះថ្នាំញៀននោះ ខ្លួនបានទិញពីមុខសញ្ញាមិនស្គាល់ឈ្មោះ ភេទប្រុស អាយុប្រហែល២៤ឆ្នាំ ជាអ្នកបើកបររថយន្តដឹកទំនិញ ភ្នំពេញ- ប៉ោយបែត ក្នុងតម្លៃ១០ម៉ឺនរៀលយកមកលក់បន្ត។ ពេលនេះជនសង្ស័យទាំងអស់ ត្រូវបានកសាងសំណុំរឿង បញ្ជូនទៅតុលាការហើយ៕
ចែករំលែកព័តមាននេះ