ខេត្តបាត់ដំបង ៖ សេចក្ដីរាយការណ៍បានឲ្យដឹងថា លោក ឈា នី មេឃុំបឹងប្រាំ ស្រុកបវេល បានបញ្ជាឲ្យកូនក្មួយបើកត្រាក់ទ័ររបស់ខ្លួន២គ្រឿងទៅភ្ជួរ ឬឈូសបំផ្លាញដំណាំល្ងរបស់ពលរដ្ឋអស់ជាង១ហិកតា នៅ
ខេត្តបាត់ដំបង ៖ សេចក្ដីរាយការណ៍បានឲ្យដឹងថា លោក ឈា នី មេឃុំបឹងប្រាំ ស្រុកបវេល បានបញ្ជាឲ្យកូនក្មួយបើកត្រាក់ទ័ររបស់ខ្លួន២គ្រឿងទៅភ្ជួរ ឬឈូសបំផ្លាញដំណាំល្ងរបស់ពលរដ្ឋអស់ជាង១ហិកតា នៅម៉ោង៨ព្រឹក ថ្ងៃទី០៧ មីនា នេះ ស្ថិតនៅចំណុចភូមិបឹងក្រឡ ឃុំបឹងប្រាំ ស្រុកបវេល ដែលមានមន្ត្រីនគរបាលប៉ុស្ដិ៍កាន់កាំភ្លើងជួយការពារត្រាក់ទ័ររបស់លោកមេឃុំដ៏មហិមានោះផង។
សេចក្ដីរាយការណ៍បានឲ្យដឹងថា ម្ចាស់ដីនោះឈ្មោះ ញ៉ែម ហ៊ាង ភេទប្រុស អាយុ៥២ឆ្នាំ រស់នៅភូមិ-ឃុំកើតហេតុខាងលើ។
លោក ឈា នី មេឃុំបឹងប្រាំ បានបញ្ជាឲ្យកូនក្មួយបើកត្រាក់ទ័រ២គ្រឿងដែលជាកម្មសិទ្ធិរបស់ខ្លួនទៅឈូសបំផ្លាញដំណាំល្ងរបស់កសិករឈ្មោះ ហ៊ាង ដោយអះអាងថា ដីនោះជាដីរបស់យោធិនពិការ ដែលមានប្លង់កាន់កាប់ស្របច្បាប់។ ប៉ុន្តែធាតុពិតលោកមេឃុំរូបនេះ បានឃុំឃិតលួចធ្វើប្លង់យកដីរបស់ឈ្មោះ ហ៊ាង ទៅឲ្យយោធិនគំរប់តាមផែនការ ដើម្បីរាយការណ៍ភូតកុហកក្រសួងមហាផ្ទៃ និងរាជរដ្ឋាភិបាលតែប៉ុណ្ណោះ។
បើតាមការផ្ដល់ព័ត៌មានថា លោក ញ៉ែម ហ៊ាង បាននិយាយថាដីរបស់លោកមានចំនួន៧ហិចតា ដែលបានមកពីបែងចែកក្រោយ២ឆ្នាំ នៃសម័យសមាហរណកម្ម ដែលគាត់មានបង្កាន់ដៃកាន់កាប់ដីនោះត្រឹមត្រូវទទួលស្គាល់ដោយអាជ្ញាធរ និងរដ្ឋាភិបាលទៀតផង។ ប៉ុន្តែក្នុងអំឡុងរដ្ឋាភិបាលបង្កើតឲ្យមានក្រុមនិស្សិតចុះវាស់ដីធ្លីធ្វើប្លង់ឲ្យពលរដ្ឋ ស្រាប់តែលោកមេឃុំ ឈានី ចាប់ផ្ដើមរុកគួនពលរដ្ឋ ឃុំឃិតជាមួយមន្ត្រីខិលខូចលួចធ្វើប្លង់យកដីពលរដ្ឋតែម្ដង បង្កជាជម្លោះដោះស្រាយមិនចប់រហូតមកដល់ពេលនេះ។ ប៉ុន្តែបើយោងសេចក្ដីរាយការណ៍បានបញ្ជាក់ថា ការដែលលោកមេឃុំបឹងប្រាំ បញ្ជូនត្រាក់ទ័ររបស់ខ្លួន២គ្រឿងទៅឈួសកម្ទេចដំណាំពលរដ្ឋរបស់ខ្លួនដូចកំរោលចូលនេះ ក៏មានមន្ត្រីនគរបាលប៉ុស្ដិ៍៣នាក់ ជាជំនិតរបស់លោកមេឃុំ បានឈរយាមត្រាក់ទ័រនោះ ប្រឈមជាមួយម្ចាស់ដី និងពលរដ្ឋជាច្រើននាក់លើកគ្នាទៅជួយតវ៉ា។ បន្ទាប់ពីឈួសបំផ្លាញដំណាំល្ងអស់ប្រហែលជាង១ហិកតា នៅម៉ោង១១ថ្ងៃត្រង់ ស្រាប់តែគេឃើញលោកមេឃុំបញ្ជាឲ្យកូនចៅរបស់ខ្លួនដកត្រាក់ទ័រចេញពីដីចំការល្ងវិញយ៉ាងតក់ក្រហល់ ទំនងមានថ្នាក់លើអន្តរាគមន៍។
លោក ឈា នី មេឃុំបឹងប្រាំង ដែលជាអតីតទណ្ឌិតម្នាក់ធ្នាប់ជាប់គុកដោយសាររឿងដីធ្លី បានចាត់ទុកពលរដ្ឋរបស់ខ្លួមមួយចំនួនធំជាសត្រូវស្លាប់រស់ ដោយសារតែជម្លោះដីធ្លី។ នេះបើតាមមន្ត្រីមួយចំនួនបាននិយាយក្នុងពេលកើតហេតុ។ មន្ត្រីទាំងនោះក៏បានរិះគន់នូវទង្វើមិនសមរម្យរបស់លោកមេឃុំដែលសំបូរទៅដោយរឿងអាស្រូវដីធ្លីនេះរូបនេះយ៉ាងខ្លាំក្លាដែរ តែលោកមេឃុំមិនចេះដោះស្រាយ បែរជាបង្កតែជម្លោះមិនឈប់ជាមួយពលរដ្ឋរបស់ខ្លួន៕
ចែករំលែកព័តមាននេះ