រាជធានីភ្នំពេញ ៖ បច្ចុប្បន្ន នៅកម្ពុជាមានសហគ្រាសជាង៥០ម៉ឺនដែលកំពុងដំណើរអាជីវកម្ម ក្នុងនោះមានសហគ្រិនជាស្ត្រីជាង៣០ម៉ឺននាក់ ។ នេះបើយោងតាមប្រធានសមាគមសហគ្រិនស្ត្រីកម្ពុជា បានអះអាង ។
នៅក្នុងពិធីអបអរសាទរទិវាអន្តរជាតិនារី ៨មីនា ខួបលើកទី១០៦ ដែលបានប្រារព្ធធ្វើនៅសណ្ឋាគារសុខា កាលពីថ្ងៃទី៦ មីនា កន្លងមក លោកស្រី កែវ មុំ ប្រធានសមាគមសហគ្រិនស្ត្រីកម្ពុជា បានឲ្យដឹងថា សហគ្រិនជាស្ត្រីមានចំនួនច្រើន ប៉ុន្តែប្រាក់ចំណូលតិចជាងបុរស ដោយសារអាជីវកម្មរបស់ស្ត្រីមានលក្ខណៈខ្នាតតូច និងមធ្យម ហើយគ្មានភាពអង់អាចក្លាហានមករៀនសូត្របន្ថែមនៅសង្គមខាងក្រៅ ដែលធ្វើឲ្យអាជីវកម្មរបស់គាត់នៅតែខ្នាតតូច និងមធ្យមដដែល ។
លោកស្រីថ្លែងថា ៖ « មានបញ្ហាជាច្រើនដែលស្ត្រីជាសហគ្រិនមិនអាចរីកធំបានដូចទស្សនៈថា ស្ត្រីមិនអាចវិលចង្ក្រានជុំ និងគំនាបប្រពៃណីជាដើម » ។ ទោះបីយ៉ាងណា លោកស្រីថា ៖ « ការបង្កើតសមាគមស្ត្រីឡើងគឺដើម្បីលើកទឹកចិត្តដល់ស្ត្រីឲ្យមានភាពក្លាហានក្នុងការចូលរួមវគ្គបណ្តុះបណ្តាលជាច្រើន ដែលសហការជាមួយក្រុមហ៊ុននានា » ។
តំណាងផ្នែកទីផ្សារក្រុមហ៊ុនភ្នំពេញស៊ីធីសេនធ័រ លោកស្រី ចាន់ លក្ខិណា ថ្លែងថា នៅក្នុងប្រទេសកម្ពុជា ស្ត្រីជាផ្នែកមួយដែលមិនអាចខ្វះបាន ព្រោះថា ដោយសារកម្ពុជាមានការអភិវឌ្ឍ ដូច្នេះ ស្ត្រីត្រូវតែចូលរួមជាចាំបាច់ ។ ជាក់ស្តែង នៅក្នុងក្រុមហ៊ុនភ្នំពេញស៊ីធីសេនធ័រតែម្តង ដែលមានថ្នាក់ដឹកនាំជាស្ត្រី ។ លោកស្រីបន្ថែមថា បច្ចុប្បន្ន ក្នុងសង្គមខ្មែរកំពុងតែឈប់និយាយពាក្យថា «ស្ត្រីវិលចង្ក្រានមិនជុំ» ទៀតហើយ ។
លោកស្រី ជា សុខលាង ប្រធានគណៈកម្មការទទួលបន្ទុករៀបចំព្រឹត្តិការណ៍ និងឯកអគ្គរដ្ឋទូតប្រចាំប្រទេសសម្រាប់ WED មានប្រសាសន៍ថា ៖ « យើងមានសេចក្តីសោមនស្សរីករាយយ៉ាងក្រៃលែង ដែលទទួលបានការចូលរួមពីវាគ្មិនទាំងបីរបស់យើង ហើយយើងសង្ឃឹមថា អ្នកចូលរួមនឹងទទួលបាននូវបទពិសោធន៍ និងចំណេះដឹងល្អៗពីវាគ្មិនផងដែរ » ។
លោកស្រី Michelle Lau នាយកប្រតិបត្តិភ្នំពេញស៊ីធីសេនធ័រ (PPCC) ថ្លែងថា ៖ «កម្មវិធីថ្ងៃនេះ យើងជឿជាក់ថា បានផ្តល់ឱកាសសម្រាប់ស្ត្រីចែករំលែកបទពិសោធន៍ជោគជ័យរបស់ពួកគាត់ គឺជាវិធីដ៏សំខាន់មួយដើម្បីជួយបំផុសទឹកចិត្តដល់ស្ត្រីដទៃទៀតឲ្យមានសេចក្តីក្លាហាន និងតស៊ូរាល់ការលំបាកក្នុងកិច្ចការងាររបស់ខ្លួនដើម្បីឈានដល់ចំណុចជោគជ័យមួយ» ៕
ចែករំលែកព័តមាននេះ