រាជធានីភ្នំពេញ ៖ តម្លៃជ័រកៅស៊ូនៅកម្ពុជាចាប់ផ្តើមធ្លាក់ចុះបន្តិច បើធៀបនឹងដើមឆ្នាំនេះ ស្របពេលរដូវជ្រុះស្លឹកកំពុងចាប់ផ្តើម ។
លោក ជា សាយិន ប្រធានសហគមន៍កសិកម្មកៅស៊ូគ្រួសារស្រុកមេមត់ បានឲ្យដឹងនាព្រឹកថ្ងៃទី៦ មីនា ថា តម្លៃជ័រកៅស៊ូបានធ្លាក់ចុះបន្តិចបន្តួចក្នុងខែមីនានេះ ដោយកៅស៊ូបង្កកចានធ្លាក់ថ្លៃពី៣.០០០រៀលមកត្រឹម២.៩០០រៀលក្នុង១គីឡូក្រាម និងជ័រទឹកធ្លាក់ថ្លៃពី៧.០០០រៀលមកត្រឹម៦.៩០០រៀលក្នុង១គីឡូក្រាម ប៉ុន្តែបើលក់ឲ្យឈ្មួញគិតជាតោន គឺមានតម្លៃ១.៩០០ដុល្លារ ធ្លាក់ចុះពី២.១០០ដុល្លារក្នុង១តោន ធៀបនឹងដើមឆ្នាំនេះ ។
លោកបន្តថា ៖ « ការធ្លាក់ចុះតម្លៃកៅស៊ូនាពេលនេះ មិនទាន់ដឹងមូលហេតុពិតនៅឡើយទេ ប៉ុន្តែដោយសាររដូវកាលនេះជាពេលកៅស៊ូតេត(ជ្រុះស្លឹក) បានធ្វើឲ្យបរិមាណជ័រកៅស៊ូធ្លាក់ចុះ ដោយសារពេលកៅស៊ូតេត កសិករដាំកៅស៊ូមិនចៀរជ័រនោះទេ » ។
លោក ទ្រាប វែង អនុប្រធានសមាគមកៅស៊ូគ្រួសារមេមត់ទទួលស្គាល់ថា តម្លៃជ័រកៅស៊ូពិតជាធ្លាក់ចុះបន្តិចបន្តួចមែន បើធៀបនឹងដើមឆ្នាំនេះ គឺធ្លាក់ចុះពី៧.០០០រៀលមកត្រឹម៦.៥០០រៀលក្នុង១គីឡូក្រាម ហើយកៅស៊ូក្រែបធ្លាក់ថ្លៃពី២.១៦០ដុល្លារមកត្រឹម១.០៩០ដុល្លារក្នុង១តោន ។
លោកបន្តថា វាជារដូវកៅស៊ូជ្រុះស្លឹក ហើយកសិករមិនប្រមូលជ័រទេក្នុងរយៈពេលចន្លោះពី២០ទៅ៣០ថ្ងៃ ។ ចំណែក ការធ្លាក់ចុះតម្លៃកៅស៊ូអាចទាក់ទងនឹងរដូវកាលនេះផងដែរ ។ លោកបន្តថា ៖ « ទោះជាយ៉ាងណា កសិករដាំកៅស៊ូរីករាយឡើងវិញ ដោយសារតម្លៃកៅស៊ូចាប់ផ្តើមងើបឡើងពីដើមឆ្នាំនេះ » ។
លោកឧកញ៉ា ម៉ក់ គីមហុង ប្រធានសមាគមកៅស៊ូកម្ពុជា ថ្លែងថា គ្មានឈ្មួញប្រមូលទិញកៅស៊ូទេ ដោយសារតម្លៃកៅស៊ូចាប់ផ្តើមធ្លាក់ចុះ ហើយលោកមិនដឹងពីមូលហេតុនៃការថមថយតម្លៃពេលនេះទេ ។
ប្រតិភូរាជរដ្ឋាភិបាលទទួលបន្ទុកអគ្គ-នាយក នៃអគ្គនាយកដ្ឋានកៅស៊ូកម្ពុជា ថ្លែងថា តម្លៃកៅស៊ូកាលពីសប្តាហ៍មុន បានហក់ឡើងរហូតដល់ជាង២.៤០០ដុល្លារក្នុង១តោន ដោយសារការផ្គត់ផ្គង់ធ្លាក់ចុះ ហើយតម្រូវការកៅស៊ូនៅទីផ្សារអន្តរជាតិកើនឡើង ។
តាមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក វេង សាខុន ថ្លែងថា បច្ចុប្បន្ន ផ្ទៃដីដាំកៅស៊ូបានកើនឡើងរហូតដល់៤០២.១៤០ហិកតា និងគ្របដណ្តប់លើខេត្ត-ក្រុងជាច្រើននៅកម្ពុជា ៕
ចែករំលែកព័តមាននេះ