ខេត្តកណ្ដាល ៖ ក្រុមគ្រួសាររបស់បុរសជាជនរងគ្រោះម្នាក់ដែលរងរបួសយ៉ាងធ្ងន់ធ្ងរ និងដេកសន្លប់បាត់ស្មារតីរហូតទៅដល់៣ថ្ងៃ និងកំពុងតែសម្រាកព្យាបាលនៅក្នុងមន្ទីពេទ្យនោះ
ខេត្តកណ្ដាល ៖ ក្រុមគ្រួសាររបស់បុរសជាជនរងគ្រោះម្នាក់ដែលរងរបួសយ៉ាងធ្ងន់ធ្ងរ និងដេកសន្លប់បាត់ស្មារតីរហូតទៅដល់៣ថ្ងៃ និងកំពុងតែសម្រាកព្យាបាលនៅក្នុងមន្ទីពេទ្យនោះ នៅក្នុងអំពើរហិង្សាមួយដែលបានកើតឡើងកាលពីថ្ងៃទី០២ ខែមីនា ឆ្នាំ២០១៧ នៅចំណុចភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល កន្លងមកនេះ។ បានធ្វើការទាមទារទៅដល់តុលារការខេត្តកណ្តាលឲ្យជួយរកយុត្តិធ៌មដល់ជនរងគ្រោះ ស្របពេលដែលជនរងគ្រោះកំពុងតែសម្រាកព្យាបាលនៅមន្ទីរពេទ្យ និងពុំទាន់មានការដោះស្រាយបញ្ចប់រឿងផង ក៏ស្រាប់តែឃើញបុរសជាជនដៃដល់ត្រូវបានលោក សាយ សម្ផស្សសិរី ចៅក្រមរបស់តុលាការខេត្តកណ្តាលធ្វើការដោះលែងទៅវិញនោះ។
បុរសម្នាក់ឈ្មោះ ឃាង សេងលី អាយុ ៤៤ឆ្នាំ ដែលត្រូវជាបងប្រុសបង្កើតរបស់ជនរងគ្រោះបានរៀបរាប់ប្រាប់ឱ្យដឹងថា ប្អូនប្រុសរបស់គាត់មានឈ្មោះ ឃាង ឆេងហុង ហៅពៅ អាយុ២៩ឆ្នាំ មុខរបរជាកសិករ មានទីលំនៅក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។ បុរសជាជនដៃដល់មានឈ្មោះ នៅ សំកល់ អាយុ៤៥ឆ្នាំ មុខរបរជាកសិករ និងមានទីលំនៅក្នុងភូមិ ឃុំកើតហេតុជាមួយគ្នា។ តាមប្រភពដដែលបានប្រាប់ឱ្យដឹងថា កាលពីវេលាម៉ោង០៩ និង៣០នាទីយប់ ថ្ងៃទី០២ ខែមីនា ឆ្នាំ២០១៧ កន្លងមកនេះ ប្អូនប្រុសរបស់គាត់ និងបុរសជាជនដៃដល់ រួមទាំងមនុស្សចំនួន ២នាក់ទៀត សរុបគ្នា៤នាក់ បាននាំគ្នាទៅធ្វើការផឹកស៊ីនៅក្នុងផ្ទះរបស់បុរសម្នាក់ឈ្មោះ សាន្ត រស់។ ហើយក៏មានការឈ្លោះប្រកែកគ្នា និងឈានទៅដល់ការវាយតប់គ្នាទៅវិញទៅមក បណ្តាលឲ្យបុរសជាប្អូនប្រុសរបស់គាត់ដួលធ្លាក់ពីលើគ្រែ និងសន្លប់បាត់ស្មារតីរងរបួសយ៉ាងធ្ងន់ធ្ងរតែម្តង ហើយក៏ត្រូវបានក្រុមគ្រួសារបញ្ជូនយកមកធ្វើការព្យាបាលនៅមន្ទីរពេទ្យព្រះកេតុមាលា រហូតដល់៣ថ្ងៃ ទើបបានដឹងខ្លួនវិញ។
ក្រោយពេលដែលក្រុមគ្រួសាររបស់គាត់បញ្ជូនប្អូនប្រុសរងគ្រោះមកធ្វើការព្យាបាលនៅមន្ទីរពេទ្យព្រះកេតុមាលារួចហើយ លុះព្រឹកឡើងទើបបានទៅដាក់ពាក្យបណ្តឹងសមត្ថកិច្ចនគរបាលមូលដ្ឋាន និងធ្វើការចាប់ឃាត់ខ្លួនបុរសជាជនដៃដល់ភ្លាមៗផងដែរ។ តាមប្រភពដដែលបានប្រាប់បន្តទៀតថា លុះមកដល់ថ្ងៃទី០៥ ខែមីនា ឆ្នាំ២០១៧នេះ ក៏ស្រាប់តែលេចមុខបុរសជាជនដៃដល់វិលត្រលប់មកនៅផ្ទះវិញធ្វើព្រងើយ។
ដោយទាំងមិនទាន់មានការដោះស្រាយគ្នាបញ្ចប់រឿងនៅឡើយ ហើយម្យ៉ាងវិញទៀតបុរសរងគ្រោះជាប្អូនរបស់គាត់ក៏កំពុងតែស្ថិតនៅឯមន្ទីរពេទ្យព្រះកេតុមាលា ដើម្បីធ្វើការព្យាបាលនៅឡើយនោះ។ ដោយហេតុនេះហើយ បានជាធ្វើឲ្យពួកគាត់មានការកើតទុកមិនសុខចិត្តចំពោះអាជ្ញាធរខេត្ត និងជាពិសេសគឺតុលាការខេត្តកណ្តាលតែម្តង មេត្តាជួយរកយុត្តិធ៌មដល់ក្រុមគ្រួសាររបស់គាត់ដែលជាក្រុមគ្រួសារកសិករ និងមានជីវភាពក្រីក្រនេះផង។
តាមប្រភពព័ត៌មានពីមន្ត្រីនគរបាលទទួលបន្ទុកផ្នែកព្រហ្មទណ្ឌម្នាក់បានប្រាប់តាមទូរស័ព្ទថា ពាក់ព័ន្ធទៅនឹងករណីហិង្សាដោយចេតនានេះដែរកម្លាំងរបស់លោកបានធ្វើការឃាត់ខ្លួនបុរសជាជនដៃដល់ និងបញ្ជូនទៅកាន់តុលាការខេត្តកណ្តាលរួចហើយ ដោយសុំណុំរឿងនេះមានលោក សាយ សម្ផស្សសេរី ចៅក្រមសាលាដំបូងខេត្តកណ្តាលជាអ្នកកាន់។
តាមប្រភពដែលបានប្រាប់បន្តទៀតថា ពាក់ព័ន្ធទៅនឹងការដោះលែងបុរសជាជនដៃដល់នេះដែរ គឺត្រូវបានលោកចៅក្រមអះអាងថា វាជារឿងទំនាស់ និងវាយគ្នាទៅវិញទៅមក ប្រសិនជាចង់ឲ្យលោកធ្វើការចាប់ខ្លួនទាល់តែចាប់ទាំងពីរនាក់តែម្តង ដោយសម្អាងលើពាក្យទាំងនេះ ទើបលោកធ្វើការដោះលែងជនដៃដល់ឲ្យមានសេរីភាពវិញនោះ។
ពាក់ព័ន្ធទៅនឹងការដោះលែងជនដៃដល់ដែលបង្ករបួសស្នាមដោយចេតនាក្នុងអំពើរហិង្សាខាងលើនេះដែរ ភ្នាក់ងារកោះសន្តិភាពរបស់យើងសុំលេខទូរស័ព្ទពីលោកចៅក្រមដែលកាន់សុំណុំរឿងនេះ ដើម្បីធ្វើការបំភ្លឺដែរ តែត្រូវបានលោកឆ្លើយថា មិនអាចផ្តល់ឲ្យអ្នកកាសែតបានទេ ព្រោះជាលេខមេៗថ្នាក់់លើ៕
ចែករំលែកព័តមាននេះ