រាជធានីភ្នំបេញ ៖ ចៅក្រមស៊ើបសរសាលាដំបូងរាជធានីភ្នំពេញ កាលពីថ្ងៃទី២៨ ខែកញ្ញា ឆ្នាំ២០២២ បានសម្រេចចេញដីកាឃុំខ្លួនជនសង្ស័យជាជនជាតិចិន២នាក់ដាក់ពន្ធនាគារជាបណ្តោះអាសន្ន ក្រោមការចោទប្រកាន់ពីបទ.លួចមានស្ថានទម្ងន់ទោស (គាស់ទូដែកហាងពេជ្រ) ប្រព្រឹត្តនៅក្នុងក្រុមហ៊ុនមួយកន្លែង ស្ថិតនៅកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ កាលពីថ្ងៃទី៥ ខែកញ្ញា ឆ្នាំ២០២២ តាមបញ្ញាត្តិមាត្រា ៣៥៣ និងមាត្រា៣៥៧ នៃក្រមព្រហ្មទណ្ឌ ។
ជនសង្ស័យម្នាក់ឈ្មោះLIU YANPING ភេទប្រុស អាយុ២៧ឆ្នាំ មុខរបរមិនពិតប្រាកដ មានស្រុកកំណើត ប្រទេសចិន ទីលំនៅបច្ចុប្បន្ន មិនពិតប្រាកដ និងម្នាក់ឈ្មោះ LI ZHANWU ភេទប្រុស អាយុ២៨ឆ្នាំ មុខរបរជាងជួសជុលរថយន្ត ស្រុកកំណើតប្រទេសចិន ទីលំនៅបច្ចុប្បន្នស្នាក់នៅ ខុនដូរម្តុំស៊ូល សង្កាត់ទន្លេបាសាក់ ខណ្ឌចំការមន រាជធានីភ្នំពេញ ។
បើទោះបីជាមានវត្ថុតាងជាប់ខ្លួនច្រើនយ៉ាងនេះក៏ដោយ តែជនជាតិចិនទាំង២ នាក់នេះ នៅតែមិនព្រមសារភាពទទួលកំហុសដាច់ខាត ដោយបដិសេធថា ខ្លួនមិនដឹងអ្វីទាំងអស់ ។ ចុងក្រោយ សមត្ថកិច្ចជំនាញនៃការិយាល័យប្រឆាំងបទល្មើសព្រហ្មទណ្ឌកងរាជអាវុធហត្ថរាជធានីភ្នំពេញ បានកសាងសុំណុំរឿងបញ្ជូនជនសង្ស័យជនជាតិចិនទាំង២នាក់ និងវត្ថុតាងទៅតុលាការ ដើម្បីផ្តន្ទាទោសតាមនីតិវិធីច្បាប់ ។
បើតាមផេកហ្វេសប៊ុកផ្លូវការរបស់កងរាជអាវុធហត្ថរាជធានីភ្នំពេញបានបានបង្ហោះជាសាធារណៈថា កាលពីវេលាម៉ោងប្រមាណ០១និង៥៤នាទីរំលងអធ្រាត្រឈានចូលថ្ងៃទី០៥ ខែកញ្ញា ឆ្នាំ២០២២ នៅចំណុចអគារលេខ B43-B46 ស្ថិតក្នុងកោះពេជ្រ ភូមិ១៤ សង្កាត់ទន្លេបាសាក់ ខណ្ឌចំការមន រាជធានីភ្នំពេញ មានករណីគាស់ទម្លុះទ្វារកញ្ចក់ ប្រដាប់ដោយដែកគាស់ និងប៉ុស្តិ៍ផ្សារ (ម៉ាស៊ីនកាត់ដែក) ចូលក្នុងក្រុមហ៊ុនលក់មាសពេជ្រ ជី ដាយមិន រួចធ្វើសកម្មភាពលួចគាស់ទូដែកយកប្រាក់ប្រមាណជាង២៣ម៉ឺនដុល្លារអាមេរិក និងគ្រឿងអលង្កាពេជ្រមួយចំនួនទៀត ហើយជនសង្ស័យបានគេចខ្លួនបាត់ ។
ក្រោយពេលស្រាវជ្រាវស៊ើបអង្កេតអស់៣សប្តាហ៍ អាវុធហត្ថរាជធានីភ្នំពេញក្នុងខណ្ឌចំការមនបានធ្វើការឃាត់ខ្លួនជនសង្ស័យចំនួន០២នាក់ ជាជនជាតិចិនដូចមានឈ្មោះខាងលើនេះ ។ ក្នុងនោះ សមត្ថកិច្ចអាវុធហត្ថក៏បានស្រាវជ្រាវរកឃើញជនសង្ស័យទាំង២នាក់ បានរក្សាទុកនូវ ខ្សែ.កលោហធាតុ ពណ៌.ស មានបន្តោងដាំត្បូង០១ខ្សែ និងក្រវិលលោហធាតុ ពណ៌ស មានដាំត្បូងមួយគូ, ចិញ្ចៀនលោហធាតុ ពណ៌លឿង មានដាំត្បូងជុំវិញ ០១វង់, ចិញ្ចៀនលោហធាតុ ពណ៌ស មានដាំត្បូង ០១វង់ និងបណ្តោងខ្សែក ពណ៌ស មានដាំត្បូងចំនួន0១ ដែលគ្រឿងអលង្កាទាំងនេះ សុទ្ធតែត្រូវបានចំណាំថា ជាវត្ថុដែល ចោរលួចយកទៅកាលពីថ្ងៃទី០៥ ខែកញ្ញា ឆ្នាំ២០២២ ក៏បានប្រគល់ជូនម្ចាស់ដើមវិញ) ។
ក្រៅពីនេះ សមត្ថកិច្ចអាវុធហត្ថ បានចាប់យក វត្ថុតាងពាក់ព័ន្ធបទល្មើសមួយចំនួនផ្សេងទៀត រួមមាន ៖ រថយន្ត០១ គ្រឿង ម៉ាក ហាយឡែនឌ័រ ពណ៌ស ស្លាកលេខ ភ្នំពេញ 2AG-9838, ម៉ាស៊ីនកាត់ដែក០១គ្រឿង ពណ៌ក្រហម (ប៉ុស្តិ៍ផ្សារដែក), ដែកគាស់ចំនួន០២ដើម, ម៉ូទ័រកាត់ចំនួន០១ និងសម្ភារមួយចំនួនទៀត ក្នុងនោះមានទូរស័ព្ទ០១គ្រឿងរបស់ជនសង្ស័យ គឺមានរូបថតគ្រឿងអលង្កាមួយកញ្ចប់ធំ របស់ជនរងគ្រោះ ដែលនៅរកមិនទាន់ឃើញផងដែរ ។
ចែករំលែកព័តមាននេះ