លោកអ្នកពិតជាបានជ្រាបរួចមកហើយថា ការធ្វើដំណើរតាមយន្តហោះ មានការកំណត់នៃការសុំសេវាផ្សេងៗ ហើយនឹងត្រូវផ្តល់ដំណឹងជាមុន ប៉ុន្តែយើងមិនដឹងថា មានសេវាអ្វីខ្លះដែលអាចសុំជាលក្ខណៈពិសេសក្នុងឋានៈជាអ្នកធ្វើដំណើរតាមយន្តហោះ ហើយអ្វីសំខាន់ គឺសេវាខាងលើទាំងនោះ ជាសេវាមិនគិតថ្លៃផងដែរ ។
១-សុំមើលបន្ទប់អ្នកបើកយន្តហោះ ៖
ស្តាប់មើលទៅមិនគួរឲ្យជឿ ប៉ុន្តែលោកអ្នកជ្រាបទេថា មានអាកាសយានិកមិនតិចនោះទេដែលអនុញ្ញាតឲ្យអ្នកធ្វើដំណើរជាកុមារ ឬមិនសំដៅលើកុមារអាចចូលទៅមើលបន្ទប់អាកាសយានិកបាន នៅពេលយន្តហោះចុះចតរៀបរយហើយ ។
២-សុំអាហារបន្ថែម ៖
ជើងយន្តហោះភាគច្រើនបានត្រៀមទុកនូវអាហារសម្រាប់អ្នកធ្វើដំណើរគ្រប់រូបរួចហើយ និងក្នុងករណីដែលយើងត្រូវការអាហារបន្ថែម គឺអាចសុំបាន ព្រោះជាធម្មតា មានអ្នកដំណើរខ្លះមិនទទួលយក ឬមិនញ៉ាំអាហារ ដូច្នេះអាចជាឱកាសល្អ បើសិនជាយើងត្រូវការអាហារបន្ថែម ប៉ុន្តែក៏អាស្រ័យលើពេលវេលាក្នុងការធ្វើដំណើរជាសំខាន់ផងដែរ ។
បើការធ្វើដំណើរនៅពេលយប់ អ្នកដំណើរភាគច្រើននឹងមិនទទួលយកអាហារទេ ធ្វើឲ្យមានអាហារគ្រប់គ្រាន់សម្រាប់ការសុំបន្ថែម ។ ក្រៅពីនេះ បើយើងមិនចង់ទទួលទានទឹកតែ ឬកាហ្វេដែលបុគ្គលិកធ្វើការលើយន្តហោះយកមកនោះ ក៏អាចសុំសូកូឡាក្តៅ ឬទឹកក្រូចបានដូចគ្នា ។
៣-សុំថ្នាំទូទៅ ឬឧបករណ៍រុំដំបៅ ៖
នៅលើយន្តហោះ នឹងមានថ្នាំសម្រាប់បន្ធូរអាការឈឺចុកចាប់មិនខ្លាំងក្លា ដូចជា ថ្នាំបន្ថយការឈឺចុកចាប់ ថ្នាំបញ្ចុះជាតិអាស៊ីតក្នុងក្រពះអាហារ ផ្លាស្ទិកបិតដំបៅ ឬបង់រុំរបួសទុកជាប្រចាំនៅលើយន្តហោះ ។
ក្រៅពីនេះ ភ្នាក់ងារបម្រើការលើយន្តហោះបានទទួលការហ្វឹកហាត់ក្នុងការព្យាបាលបឋមផងដែរសម្រាប់អាការឈឺចាប់តិចតួច ដូចជា ការស្អំដោយទឹកកក ឬការមើលថែដំបៅដោយសារការមុតជាដើម ។
៤-សុំគ្រូពេទ្យ ៖
បើអ្នកដំណើរមានអាការឈឺចុកចាប់ខ្លាំងក្នុងខណៈពេលធ្វើដំណើរ បុគ្គលិកយន្តហោះអាចសុំការជួយសង្គ្រោះពីអ្នកដំណើរជាគ្រូពេទ្យដទៃទៀត ដែលបានធ្វើដំណើរមកជាមួយគ្នាក្នុងយន្តហោះនោះ ។ ភាគច្រើន គ្រូពេទ្យដែលបានធ្វើដំណើរមកជាមួយនឹងជួយសង្គ្រោះ ហើយក៏ទទួលបានចម្ងាយនៃការជិះយន្ដហោះ «Mile» សន្សំពិសេសពីផ្នែកយន្តហោះផងដែរ ។
៥-សុំប្តូរកន្លែងអង្គុយ ៖
យើងអាចសុំប្តូរកន្លែងអង្គុយជាមួយអ្នកដំណើរផ្សេងទៀត ដើម្បីឲ្យបានកន្លែងអង្គុយជាមួយមិត្តភក្តិ ឬក្រុមគ្រួសារដែលធ្វើដំណើរមកជាមួយគ្នា ដោយសុំឲ្យបុគ្គលិកយន្តហោះជួយចាត់ចែងក្នុងការស្នើសុំនេះ ។
៦-សុំក្រដាសជូតសម្អាត ៖
ការសុំក្រដាសជូតសម្អាតសម្រាប់បរិវេណចំណុច មិនថាជាកន្លែងដាក់ដៃ ថាសអាហារ ធ្នើរដាក់នៅខាងមុខកៅអីអង្គុយ ឬកន្លែងចុចសញ្ញានៃបរិវេណអង្គុយ ដែលយើងត្រូវប្រើដោយដៃ ។
៧-សុំស្រាបៀរ ៖
ជើងហោះហើរភាគច្រើនមានទុកសម្រាប់សេវាកម្មឥតគិតថ្លៃ ទាំងជើងហោះហើរក្នុងប្រទេសថៃ និងបរទេស ដោយគ្រាន់តែត្រូវស្នើសុំប៉ុណ្ណោះ ។
៨-សុំរបស់ប្រើចាំបាច់ ៖
ដូចជា ក្រណាត់បិទភ្នែក បិទត្រចៀក សម្ភារលេងសម្រាប់ក្មេងមាន សៀវភៅរូបភាព ព្រមទាំងឧបករណ៍ផាត់ពណ៌ ដីសម្រាប់សូនរូប ស្ទិកកឺ រួមទាំងច្រាសដុសធ្មេញ ថ្នាំដុសធ្មេញ ស្រោមជើង មិនថាយើងជាអ្នកដំណើរលំដាប់ណាក្តី ។ លើសពីនេះទៀត កុមារអាយុក្រោម២ឆ្នាំដែលធ្វើដំណើរមកជាមួយ ដោយមិនបានទិញសំបុត្រនោះ យើងក៏អាចសុំអង្រឹងកូនក្មេងផងដែរ ។
៩-សុំទឹកដាក់ក្នុងដបទទេ ៖
អ្នកដំណើរខ្លះបានសៀតដបទឹកទទេមកជាមួយដែរ ព្រោះថា មិនអាចយកទឹកឡើងលើយន្តហោះបាន ក្នុងករណីនេះ បុគ្គលិកធ្វើការលើយន្តហោះរីករាយនឹងដាក់ទឹកទៅក្នុងដបទទេ ដែលអ្នកដំណើរយកមកជាប់ខ្លួននោះ ៕
ចែករំលែកព័តមាននេះ