រាជធានីភ្នំពេញ ៖ អ្នកធ្វើដំណើរតាមជើងយន្ដហោះ ទោះបីមានបទពិសោធន៍ ឬមិនធ្លាប់ក្ដី នៅពេលមានគម្រោងធ្វើដំណើរកម្សាន្ដទៅក្រៅប្រទេស មុននឹងសម្រេចចិត្តជ្រើសរើសយកសេវាក្រុមហ៊ុនអាកាសចរណ៍
រាជធានីភ្នំពេញ ៖ អ្នកធ្វើដំណើរតាមជើងយន្ដហោះ ទោះបីមានបទពិសោធន៍ ឬមិនធ្លាប់ក្ដី នៅពេលមានគម្រោងធ្វើដំណើរកម្សាន្ដទៅក្រៅប្រទេស មុននឹងសម្រេចចិត្តជ្រើសរើសយកសេវាក្រុមហ៊ុនអាកាសចរណ៍ណាមួយនោះ ចំណុចអាទិភាពដំបូងតែងគិតដល់ គឺតម្លៃ គុណភាពនៃសេវាកម្ម ផាសុកភាពនៅលើយន្ដហោះ ទំនុកចិត្តពេលធ្វើដំណើរ និងភាពទំនើបកម្មនៃយន្ដហោះរបស់ក្រុមហ៊ុន ។
ទោះបីយ៉ាងណា ប្រសិនបើអ្នកត្រូវបានគេអញ្ជើញវិញ ការជ្រើសរើសទាំងនោះ វាមិនមានបញ្ហាចោទនោះទេ ព្រោះអ្វីៗត្រូវបានគេរៀបចំរួចជាស្រេច ប៉ុន្ដែបើការធ្វើដំណើរជាលក្ខណៈឯកជន ឬគ្រួសារ ដែលរាល់ការចំណាយត្រូវរ៉ាប់រងដោយខ្លួនឯងនោះ អ្នកដំណើរប្រាកដជាត្រូវគិតគូរបន្ដិច មុននឹងសម្រេចចិត្តជ្រើសរើសយកសេវាហោះហើររបស់ក្រុមហ៊ុនអាកាសចរណ៍ ដើម្បីទៅដល់គោលដៅប្រកបដោយសុវត្ថិភាពខ្ពស់ អស់ក្ដីបារម្ភពីក្រុមគ្រួសារ ។
ក្រុមហ៊ុនអាកាសចរណ៍Cathay Dragon ដែលជាចំណែកមួយនៃCathay Pacific Group បច្ចុប្បន្នក្រុមហ៊ុនមួយនេះត្រូវបានទទួលស្គាល់ពីគុណភាពនៃសេវាកម្ម និងត្រូវបានគេឲ្យឈ្មោះថា « ក្រុមហ៊ុនអាកាសចរណ៍ដែលល្អជាងគេបំផុតនៅក្នុងតំបន់ ឬ Best Regional Airline»តាំងពីឆ្នាំ២០១០មក ហើយក៏ទទួលបានពានរង្វាន់លំដាប់ពិភពលោកជា « ក្រុមហ៊ុនអាកាសចរណ៍ថ្នាក់តំបន់ដែលល្អជាងគេបំផុត ឬ World’s Best Regional Airline» ពី Skytrax ដែលជាស្ថាប័នផ្ដល់ចំណាត់ថ្នាក់ដល់ក្រុមហ៊ុនអាកាសចរណ៍នៅក្នុងឆ្នាំ២០១០, ២០១១, ២០១៣ និងឆ្នាំ២០១៥ ផងដែរ ។
ប្រសិនបើអ្នកជ្រើសរើសយកសេវាកម្មធ្វើដំណើរក្រៅប្រទេស តាមរយៈក្រុមហ៊ុនអាកាសចរណ៍ Cathay Dragon មិនត្រឹមតែផ្ដល់ឲ្យនូវបទពិសោធន៍ហោះហើរលើដែន អាកាសប៉ុណ្ណោះទេ ថែមទាំងទទួលបាននូវសេវាយកចិត្តទុកដាក់ និងបម្រើអាហារដ៏ឆ្ងាញ់ពិសានៅលើយន្ដហោះថែមទៀត ។ ទន្ទឹមនឹងនេះ លោកអ្នកអាចទទួលទានអាហារនៅបន្ទប់រង់ចាំលំដាប់ VIP សេវាម៉ាស្សាខ្នង និងជើង ដើម្បីបំបាត់ភាពនឿយហត់ ប្រសិនបើអ្នកដំណើរទិញសំបុត្រយន្ដហោះកៅអីថ្នាក់ធុរកិច្ច ឬហៅថា Business Class នោះ ។
លោក Josh Williams នាយកប្រចាំប្រទេសនៃក្រុមហ៊ុនអាកាសចរណ៍ Cathay Dragon បានថ្លែងថា ៖ « សម្រាប់អ្នកដំណើរដែលទទួលយកសេវាកម្មហោះហើរពីក្រុមហ៊ុន Cathay Dragon យើងមានផ្ដល់ជូនអាហារដ៏ឆ្ងាញ់ពិសានៅបន្ទប់រង់ចាំ (Lounge) មុនយន្ដហោះចេញដំណើរ ។ ចំណែកនៅព្រលានយន្ដហោះអន្តរជាតិភ្នំពេញវិញ យើងក៏មានបន្ទប់រង់ចាំមួយនៅជាន់លើសម្រាប់ទទួលភ្ញៀវផងដែរ ដែលនៅទីនោះ អ្នកដំណើរអាចទទួលទានអាហារឆ្ងាញ់ៗ ប្រកបដោយអនាម័យ និងផាសុកភាពបំផុត » ។
« មិនត្រឹមតែទទួលបានការសម្រាក និងបរិភោគអាហារប៉ុណ្ណោះទេ អ្នកដំណើរក៏អាចទទួលបានសេវាម៉ាស្សាជើង ឬខ្នង ដើម្បីបំបាត់ភាពហត់នឿយផងដែរ » ។ នេះបើតាមការបញ្ជាក់ពីលោក Josh Williams ។
យោងតាមរបាយការណ៍ក្រុមហ៊ុន Cathay Dragon បច្ចុប្បន្ន ក្រុមហ៊ុនមានជើងហោះហើររៀងរាល់ថ្ងៃពីភ្នំពេញទៅកាន់ទីក្រុងហុងកុង និងរាល់សប្ដាហ៍ពីខេត្តសៀមរាបទៅទីក្រុងហុងកុង ដោយអ្នកដំណើរគ្រាន់តែចំណាយពេលប្រមាណជាង២ម៉ោងប៉ុណ្ណោះ នឹងដល់គោលដៅ ។ ជាមួយគ្នានេះ អ្នកដំណើរអាចភ្ជាប់ជើងហោះហើរទៅកាន់ប្រទេសគោលដៅផ្សេងៗនៅជុំវិញពិភពលោក ។
ក្រុមហ៊ុនបានបញ្ជាក់ថា ការហោះហើរពីភ្នំពេញទៅហុងកុង អ្នកដំណើរអាចជ្រើសរើសជើងហោះហើរណាមួយក៏បានទៅតាមតម្រូវការនៅពេលព្រឹក និងពេលយប់ រៀងរាល់ថ្ងៃ ។ ចំណែកអ្នកដំណើរចេញពីព្រលានយន្ដហោះអន្តរជាតិខេត្តសៀមរាប ក៏មានលក្ខណៈងាយស្រួលដូចគ្នា ព្រោះក្រុមហ៊ុន Cathay Dragon មានប្រតិបត្តិការហោះហើរ១ជើងក្នុង១ថ្ងៃ ។
ជាមួយគ្នានេះ អ្នកដំណើរអាចភ្ជាប់ជើងហោះហើរពីហុងកុងទៅប្រទេសគោលដៅជាច្រើននៅជុំវិញពិភពលោក ដូចជា ប្រទេសចិនមានចំនួន២៦គោលដៅ ដោយហោះហើរទៅកាន់ទីក្រុងប៉េកាំងចំនួន៦៤ជើង និងទៅកាន់ទីក្រុងសៀងហៃចំនួន១០៤ជើង ។ កោះតៃវ៉ាន់ចំនួន៣គោលដៅ ដែលមានចំនួន១០៨ជើងប្រចាំសប្ដាហ៍ទៅកាន់តៃប៉ិ ។ ប្រទេសជប៉ុនចំនួន៧គោលដៅ ដែលមាន៥៥ជើងទៅកាន់ទីក្រុងតូក្យូ និងទៅកាន់ទីក្រុងអូសាកាចំនួន៣៩ជើង ។ ទន្ទឹមនឹងនេះ ក្រុមហ៊ុនអាកាសចរណ៍ Cathay Dragon ក៏មានប្រតិបត្តិការហោះហើរប្រចាំសប្ដាហ៍ទៅកាន់អាមេរិកខាងជើងចំនួន៨គោលដៅ ដែលមានចំនួន៣៣ជើងទៅកាន់ទីក្រុងញូវយ៉ក, ១០ជើងទៅកាន់ទីក្រុង Toronto និង២ជើងទៅកាន់ទីក្រុង Vancouver ផងដែរ ។
ចំពោះតម្លៃសំបុត្រត្រូវបានក្រុមហ៊ុនបញ្ជាក់ថា សម្រាប់កៅអីធម្មតា (Economy Class) ពីភ្នំពេញទៅហុងកុង តម្លៃចាប់ពី២៦០ដុល្លារ, ជប៉ុនតម្លៃ៣៣៩ដុល្លារ, ប៉េកាំងតម្លៃ៣៧៩ដុល្លារ, ហ្វ៊ីលីពីនតម្លៃ៣៥៥ដុល្លារ និងតៃប៉ិ តម្លៃ៤០៥ដុល្លារ ។ ចំណែកទីក្រុងបូស្ដុន តម្លៃចាប់ពី៨៧៧ដុល្លារឡើងទៅ និងទីក្រុងញូវយ៉ក តម្លៃចាប់ពី៧៧៧ដុល្លារឡើងទៅ។ តម្លៃនេះគឺបូកបញ្ចូលពន្ធរួចជាស្រេច ។
យោងតាមរបាយការណ៍ពីក្រុមហ៊ុនបញ្ជាក់ថា ក្នុងឆ្នាំ២០១៦កន្លងមក មានអ្នកធ្វើដំណើរប្រមាណជាង១លាននាក់ដែលធ្វើដំណើរតាមក្រុមហ៊ុន Cathay Dragon ទៅកាន់គោលដៅជាង២០០ប្រទេសនៅជុំវិញពិភពលោក ៕
ចែករំលែកព័តមាននេះ