កូនប្រុស២រូបរបស់អធិរាជកែងឆេះជង្គង់ទិព្វអេ ភូថង កំពុងមានទីផ្សារធំនៅថៃ
- ភ្នំពេញ
រាជធានីភ្នំពេញ ៖ កូនប្រុសអធិរាជកែងឆេះជង្គង់ហោះអេ ភូថង ចំនួន២រូបគឺ ម៉ឺន មេឃា និង អេ
រាជធានីភ្នំពេញ ៖ កូនប្រុសអធិរាជកែងឆេះជង្គង់ហោះអេ ភូថង ចំនួន២រូបគឺ ម៉ឺន មេឃា និង អេ អាំម៉ារីនភូថង កំពុងទទួលបានការចាប់អារម្មណ៍យ៉ាងខ្លាំងពីសំណាក់សង្វៀនប្រដាល់ធំៗនៅប្រទេសថៃ បន្ទាប់ពីពួកគេបង្កព្យុះភ្លៀងនៅទីនោះមួយរយៈពេលចុងក្រោយនេះ។
អេ អាំម៉ារីន បានប្រកួតឈ្នះកីឡាករថៃពីរលើកជាប់គ្នានៅក្នុងទឹកដីថៃ ហើយកាលពីប៉ុន្មាន
ថ្ងៃមុននេះបងប្រុសបង្កើតរបស់គេគឺ ម៉ឺន មេឃា បានផ្តួលកីឡាករថៃឲ្យសន្លប់ក្នុងទឹកទី៣។
តាមការឲ្យដឹង អេ អាំម៉ារីន និង ម៉ឺន មេឃា ទទួលបានប្រាក់តម្លៃខ្លួនចន្លោះពី១៥០០ដុល្លារទៅ២០០០ដុល្លារអាមេរិកក្នុងមួយប្រកួត។ ពួកគេនឹងទទួលបានប្រាក់តម្លៃខ្លួនកាន់តែខ្ពស់នាពេលខាងមុខនៅពេលប្រកួតកាន់តែល្បី និងឈានដល់ទៅរកការប្រកួតជើងឯក ឬខ្សែក្រវាត់ ដូច្នេះអាចនិយាយបានថា នៅពេលមានសមត្ថភាពខ្ពស់ ប្រាក់រត់រក។ មិនចាំបាច់ខ្វល់ពីរឿងប្រាក់តម្លៃខ្លួននោះទេគឺខិតខំហ្វឹកហាត់ឲ្យតែខ្លាំង មិនខ្វះសង្វៀនប្រកួតនោះទេទាំងនៅប្រទេសថៃ និងប្រទេសផ្សេងៗទៀត។
ពេលនេះ សង្វៀនប្រដាល់ធំៗរបស់ថៃកំពុងរកកីឡាករដើម្បីឲ្យប្រកួតជាមួយ ម៉ឺន មេឃា និង អេ អាំម៉ារីន បន្តទៀត ហើយថៃមិនខ្វះទេកីឡាករប្រដាល់ដែលល្អ និងមានសមត្ថភាពកម្រិតខ្ពស់។ ដូច្នេះកូនប្រុសរបស់លោក អេ ភូថង ខិតខំតែហ្វឹកហាត់ដើម្បីប្រកួត។
មិនត្រឹមតែប៉ុណ្ណោះ អ្នកសារព័ត៌មានជាច្រើនបានសម្ភាសលោក អេ ភូថង និងកូនប្រុសពីសមត្ថភាព ប្រវត្តិ និងសមិទ្ធផលជាដើម ។ ពួកគេបាននិយាយថា ប្រហែលជាពីរប្រកួតទៀត អេ អាំម៉ារីន អាចនឹងប្រកួតដណ្តើមខ្សែក្រវាត់។ នៅពេលពួកគេឈានដល់ការប្រកួតដណ្តើមខ្សែក្រវាត់មានន័យថា ប៉ះសុទ្ធតែដៃគូខ្លាំងៗកម្រិតមួយថៃពិភពលោក។ ទាំងនេះហើយជាអ្វីដែលអ្នកគាំទ្រគុនខ្មែរចង់ឃើញកីឡាករកម្ពុជាសាងស្នាដៃលើឆាកអន្តរជាតិ ។ ការប្រកួតលើឆាកអន្តរជាតិបែបនេះមានគុណសម្បត្តិច្រើនណាស់ដូចជាបង្កើតស្នាដៃផ្ទាល់ខ្លួន ផ្សព្វផ្សាយប្រដាល់គុនខ្មែរ បង្កើនកេរ្តិ៍ឈ្មោះ និងទទួលបានប្រាក់ចំណូលខ្ពស់សម្រាប់ចិញ្ចឹមជីវភាពគ្រួសារ។
កន្លងមក អ្នកគាំទ្រគុនខ្មែរតែងតែឃើញកីឡាករថៃ និងកីឡាករមកពីប្រទេសផ្សេងៗមកប្រកួតនៅកម្ពុជា ហើយប្រមូលប្រាក់យកទៅស្រុករបស់ពួកគេ ប៉ុន្តែកីឡាករប្រដាល់កម្ពុជាតិចណាស់
ចេញទៅប្រកួតរកប្រាក់នៅក្រៅប្រទេស ។ ការចេញទៅប្រកួតនៅក្រៅប្រទេសមិនទទួលបានលទ្ធផលល្អថែមទៀត ដូច្នេះទីផ្សារប្រកួតនៅក្រៅប្រទេសកាន់តែចង្អៀតដោយសារសមត្ថភាពនៅមានកម្រិត។
យ៉ាងណាក៏ដោយ អេ អាំម៉ារីន និង ម៉ឺន មេឃា កំពុងទទួលបានលទ្ធផលល្អ ហើយពួកគេកំពុងពង្រីកទីផ្សារកាន់តែធំទូលាយនៅប្រទេសថៃ។ ជាមួយគ្នានេះ ក៏មានកីឡាករកម្ពុជាមួយចំនួនទៀតកំពុងចេញទៅប្រកួតនៅថៃដែរ ដូច្នេះជាកាលៈទេសៈល្អ និងជាអ្វីដែលអ្នកគាំទ្រគុនខ្មែរចង់ឃើញបំផុត ៕
ចែករំលែកព័តមាននេះ