រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានថ្លែងថា កម្ពុជាត្រូវធ្វើទំនើបកម្មវិស័យឧស្សាហកម្មជាកិច្ចការដ៏ចាំបាច់មួយ ដោយសារវិស័យនេះនឹងដើរតួនាទីសំខាន់ក្នុងយុទ្ធសាស្ត្រកំណើនថ្មី ។
សម្តេចតេជោ ហ៊ុន សែន បានអញ្ជើញចូលរួមក្នុងសន្និសីទចក្ខុវិស័យលើប្រធានបទ «ការឈានឡើងក្នុងខ្សែសង្វាក់បង្កើតតម្លៃសម្រាប់ឧស្សាហូបនីយកម្ម កំណើន និងការអភិវឌ្ឍកម្ពុជា» នាព្រឹកថ្ងៃទី២ មីនា ថា ការធ្វើទំនើបកម្មវិស័យឧស្សាហកម្ម ជាកម្លាំងចលករក្នុងការជួយទ្រទ្រង់ដល់កំណើនសេដ្ឋកិច្ចសម្រាប់រយៈពេលមធ្យម និងរយៈពេលវែង ជាវិស័យដែលមានសក្តានុពលសម្រាប់បង្កើតការងារដល់យុវជន និងជាជន្ទល់កំណើនសេដ្ឋកិច្ចថ្មី ដែលអាចឆក់ស្រូបយកការវិនិយោគបន្ថែមក្រៅពីវិស័យកសិកម្ម និងទេសចរណ៍ ។
សម្តេចបន្តថា ៖ « វិស័យឧស្សាហកម្មកម្ពុជា មានការរីកលូតលាស់យ៉ាងលឿន ដោយឧស្សាហកម្មមានចំណែក២៨,៩% នៃផលិតផលជាតិសរុបក្នុងឆ្នាំ២០១៦ គឺជាកំណើនខ្ពស់បើធៀបនឹងកំណើន១៣,៥% ធៀបនឹងឆ្នាំ១៩៩៤ ។ ការធ្វើទំនើបកម្មវិស័យឧស្សាហកម្មអាចសម្រេចទៅបាន ចាំបាច់ត្រូវមានការបន្ស៊ីគោលនយោបាយនានាជាមួយគ្នា ដោយការផ្សារភ្ជាប់គោលនយោបាយឧស្សាហកម្មជាមួយគោលនយោបាយតាមវិស័យផ្សេងៗទៀតដូចជា ពាណិជ្ជកម្ម វិនិយោគ អប់រំ ដឹកជញ្ជូន ឡូជីស្ទិក វិទ្យាសាស្ត្រ និងបច្ចេកវិទ្យាជាដើម » ។
សម្តេចតេជោ ហ៊ុន សែន នាយករដ្ឋមន្ត្រីបន្តថា តាមការព្យាករឆ្នាំនេះ សេដ្ឋកិច្ចកម្ពុជាអាចសម្រេចបានកំណើនក្នុងរង្វង់៧% ក្នុងនោះកំណើនវិស័យកសិកម្មរំពឹងថា នឹងល្អប្រសើរឡើងបន្តិច ដូចគ្នានឹងកំណើនវិស័យកាត់ដេរនឹងរើបប្រសើរឡើងជាងឆ្នាំ២០១៦ ។ ទោះជាយ៉ាងណា កម្ពុជាក៏ប្រឈមនឹងហានិភ័យពីខាងក្រៅមួយចំនួនផងដែរដូចជា ភាពមិនប្រាកដប្រជានឹងការដំឡើងអត្រាការប្រាក់គោលរបស់ធនាគារកណ្តាលអាមេរិក ការចាកចេញរបស់អង់គ្លេស និងអនាគតរបស់សហភាពអឺរ៉ុប ហានិភ័យនៃការធ្លាក់ចុះកំណើនសេដ្ឋកិច្ចប្រទេសចិន ភាពចម្រូងចម្រាសនៃការធ្វើពាណិជ្ជកម្មរវាងរដ្ឋបាលថ្មីសហរដ្ឋអាមេរិក ព្រមទាំងការកើនឡើងនូវតម្លៃប្រេងជាដើម ។
លោកឧកញ៉ា តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមនៅកម្ពុជា ថ្លែងថា ក្នុងវិស័យផលិតកម្មនៅកម្ពុជា មានភាពល្អប្រសើរឡើងលើការផលិតផលិតផលចំណីអាហារ ដោយបានកាត់បន្ថយការនាំចូលពី៨%កាលពីឆ្នាំ២០១៤ មកដល់១៦%នៅចន្លោះឆ្នាំ២០១៥-២០១៦ លើទឹកប្រាក់២.៣០០លានដុល្លារនៃការធ្វើពាណិជ្ជកម្មតាមច្រកព្រំដែនអន្តរជាតិប៉ោយប៉ែត ។ ទោះជាយ៉ាងណា កម្ពុជានៅតែមានការនាំចូលច្រើន ដោយសារកម្លាំងផលិតក្នុងស្រុកមានកម្រិត និងគុណភាពផលិតផលរបស់កម្ពុជាមានកម្រិតស្តង់ដាទាប ។
លោកបន្តថា ៖ « កម្ពុជាបានយកស្តង់ដាអាស៊ានមកប្រើប្រាស់ តែការអនុវត្តជាក់ស្តែងមិនបានតាមស្តង់ដាដែលបានដាក់ចេញនោះទេ ព្រោះបើកម្ពុជាយកស្តង់ដាដូចគេ អ្នកផលិតក្នុងស្រុកធ្វើមិនបានទេ ដោយសារថ្លៃដើមនៃការផលិតខ្ពស់ ព្រោះសិប្បកម្មផលិតនៅកម្ពុជាមានលក្ខណៈជាគ្រួសារ » ។
លោកបន្តទៀតថា ៖ « ដោយសារគុណភាពរបស់យើងនៅមានកម្រិត ទើបកម្ពុជាជួបឧបសគ្គក្នុងការនាំចេញ ដែលប្រទេសជិតខាងគេដាក់របាំងមិនមែនពន្ធគយ ។ ផ្ទុយទៅវិញ ផលិតផលរបស់គេនាំចូលមកកម្ពុជាមានភាពងាយស្រួល » ។
លោក អិុន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ី ថ្លែងថា គោលនយោបាយអភិវឌ្ឍន៍វិស័យឧស្សាហកម្ម រាជរដ្ឋាភិបាលកម្ពុជាបានដាក់ចេញកាលពីឆ្នាំ២០១៥ ដើម្បីទាក់ទាញរោងចក្រខ្នាតមធ្យម និងខ្នាតធំ ប៉ុន្តែដើម្បីទាក់ទាញរោងចក្រទាំងនោះបាន កម្ពុជាត្រូវបណ្តុះបណ្តាលធនធានមនុស្សដើម្បីឆ្លើយតបនឹងទីផ្សារការងារ ។ លោកបន្តថា បើសិនជាកម្ពុជាគ្មានគោលនយោបាយនេះ យើងផ្តោតតែលើរោងចក្រប្រើប្រាស់អតិពលកម្ម មានចំណូលទាប ។ ផ្ទុយទៅវិញ ប្រសិនជាយើងទាក់ទាញបានរោងចក្រខ្នាតមធ្យម មានកម្លាំងពលកម្មដែលទទួលបានការបណ្តុះបណ្តាលច្បាស់លាស់ យើងនឹងទទួលបានចំណូលច្រើន ។
លោកមានប្រសាសន៍ថា ៖ « កម្ពុជាត្រូវការរោងចក្រធុនមធ្យមច្រើន ព្រោះរោងចក្របែបនេះមិនងាយរើទៅទីណានោះទេ ។ ពួកគេដាក់ទុនធំ និងមានឆន្ទៈវិនិយោគរយៈពេលវែង ព្រមទាំងមូលដ្ឋានផលិតរបស់ពួកគេមិនផ្តោតតែក្នុងស្រុកទេ គឺសម្រាប់នាំចេញផងដែរ ។ វិស័យឧស្សាហកម្មកំពុងមានការរីកចម្រើន តែអ្វីសំខាន់ត្រូវផ្សារភ្ជាប់ជាមួយធនធានមនុស្សដើម្បីឆ្លើយតបនឹងតម្រូវការរបស់រោងចក្រទាំងនោះ » ។
លោក អិុន ចាន់នី បន្តថា រោងចក្រខ្នាតមធ្យមជួយដល់សេដ្ឋកិច្ចច្រើន និងរឹងមាំសម្រាប់រយៈពេលវែង ហើយយើងត្រូវការឧស្សាហកម្មបែបនេះច្រើន ស្របពេលកម្ពុជាមានគោលនយោបាយឧស្សាហកម្ម ស្ថិរភាពនយោបាយ ស្ថិរភាពសង្គម និងកំណើនសេដ្ឋកិច្ច នឹងធ្វើឲ្យកម្ពុជាទាក់ទាញវិនិយោគិនមកវិនិយោគកាន់តែច្រើនថែមទៀត ៕
ចែករំលែកព័តមាននេះ