ខេត្តរតនគិរី ៖ បុរស២នាក់ត្រូវកងរាជអាវុធហត្ថក្រុងបានលុងចាប់ខ្លួនបញ្ជូនទៅកាន់បញ្ជាការដ្ឋានជាមួយ និងសារធាតុញៀន រួមនិងមធ្យោបាយប្រើប្រាស់ និងសម្ភារសេពសារធាតុញៀនមួយចំនួនទៀត
ខេត្តរតនគិរី ៖ បុរស២នាក់ត្រូវកងរាជអាវុធហត្ថក្រុងបានលុងចាប់ខ្លួនបញ្ជូនទៅកាន់បញ្ជាការដ្ឋានជាមួយ និងសារធាតុញៀន រួមនិងមធ្យោបាយប្រើប្រាស់ និងសម្ភារសេពសារធាតុញៀនមួយចំនួនទៀត ។ ប្រតិបត្តិការរបស់អាវុធហត្ថក្រុងនាពេលនេះគឺដឹកនាំដោយវរសេនីយ៍ត្រី ហៃ វណ្ណរ៉ា មេបញ្ជាការមូលដ្ឋានអាវុធហត្ថក្រុងបានលុងដែលធ្វើឡើងក្រោមការសម្របសម្រួលដោយលោក រ៉ា ប៉ូរ៉ាន់ឌី ព្រះរាជអាជ្ញារងអមសាលាដំបូងខេត្ត និងការចង្អុលបង្ហាញពីឧត្តមសេនីយ៍ត្រី គឹម រស្មី មេបញ្ជាការកងរាជអាវុធហត្ថខេត្តផងនោះ ។
តាមរបាយការណ៍បានឱ្យដឹងថា ជនទាក់ទិន និងគ្រឿងញៀន២នាក់នោះត្រូវអាវុធហត្ថចាប់បង្ក្រាបក្នុងករណីចែកចាយគ្រឿងញៀនខុសច្បាប់នៅវេលាម៉ោង៣និង៣០នាទីថ្ងៃទី៤ មីនា ឆ្នាំ២០១៧ ត្រង់ចំណុចភូមិអូរកន្តិល សង្កាត់បឹងកន្សែង ក្រុងបានលុង ។ វត្ថុតាងដែលដកហូតបានរួមមាន ម្សៅក្រាមពណ៌សចំនួន៥កញ្ចប់ ថវិកា៥ម៉ឺនរៀល ទូរស័ព្ទដៃ២គ្រឿង សម្ភារសេពគ្រឿងញៀនមួយចំនួន និងម៉ូតូ៤គ្រឿង ។
ជនជាប់ទាក់ទិនគ្រឿងញៀនទាំងពីរនាក់នេះមានឈ្មោះ កែវ វ៉ាន់ណូ ភេទប្រុស អាយុ២៧ឆ្នាំ មុខរបរកាន់ភាស៊ីឡានក្រុង រស់នៅភូមិអូររមៀត សង្កាត់ឡាបានសៀក និងម្នាក់ទៀតឈ្មោះ ច្រើម ចម ភេទប្រុស អាយុ៣៥ឆ្នាំ មុខរបរធ្វើចំការ នៅភូមិអូរកន្ទិល សង្កាត់បឹងកន្សែង ។
អាវុធហត្ថក្រុងបានលុងនាពេលថ្មីៗនេះត្រូវគេឃើញថា បានបើកយុទ្ធនាការបង្ក្រាប និងស្រាវ ជ្រាវយ៉ាងយកចិត្តទុកដាក់លើបញ្ហាគ្រឿងញៀននេះ គឺក្រោយបន្ទាប់ពីមានការផ្សព្វផ្សាយយ៉ាងទូលំទូលាយស្តីពីការត្រួតពិនិត្យ និងផលប៉ះពាល់នៃការប្រើប្រាស់គ្រឿងញៀនតាមផែនការរបស់រាជរដ្ឋាភិបាលកម្ពុជា ហើយសកម្មភាពផ្សព្វផ្សាយនេះគឺត្រូវគេឃើញថា បានធ្វើឡើងយ៉ាងផុសផុលដែលបច្ចុប្បន្នគឺកំពុងតែនៅបន្តធ្វើការផ្សព្វផ្សាយនេះនៅឡើយ ៕
ចែករំលែកព័តមាននេះ