ខឹម វាសនា ជិតអស់ស្បៀងហើយ…មេជំរំរត់ការសុំដឹកចូល
- សៀមរាប
ខេត្តសៀមរាប ៖ រហូតមកដល់ពេលនេះអ្នករស់នៅក្នុងចម្ការលោក ខឹម វាសនា មានចំនួនជាង១ពាន់នាក់ គិតទាំងចាស់-ក្មេង ។ ទោះបីដឹងថា ការជួបជុំនេះនៅតែបន្តមិនទាន់រំសាយក្តី…
ខេត្តសៀមរាប ៖ រហូតមកដល់ពេលនេះអ្នករស់នៅក្នុងចម្ការលោក ខឹម វាសនា មានចំនួនជាង១ពាន់នាក់ គិតទាំងចាស់-ក្មេង ។ ទោះបីដឹងថា ការជួបជុំនេះនៅតែបន្តមិនទាន់រំសាយក្តី ក៏វាហាក់ជិតដល់ពេលបែកសំបុកហើយ ដោយសារតែយុទ្ធសាស្ត្រ សមត្ថកិច្ចដែលប្រចាំការនៅមុខចម្ការនោះ គឺឱ្យតែមនុស្សចេញតែចូលវិញមិនបានទេ ។ ដោយសារតែបញ្ហានេះហើយទើបមានការបែកធ្លាយមកថា ស្បៀងអាហារប្រហែលជាកាន់តែខើចហើយ មិនយូរទេ ចម្ការនោះនឹងក្លាយជាចម្ការរហោស្ថានមួយមិនខាន ដែលអាចសល់តែជីលាមកប៉ុណ្ណោះ ។
តាមសេចក្តីរាយការណ៍នៅវេលាម៉ោង១៥និង២០នាទីថ្ងៃទី២៧ ខែកញ្ញា ឆ្នាំ២០២២ នៅសាលប្រជុំសាលាស្រុកបន្ទាយស្រី មានជួបប្រជុំពិភាក្សាសម្របសម្រួល និងរកដំណោះស្រាយជាមួយលោកនី ចាន់ពិនិត្យ ដៃស្តាំ ខឹម វាសនា តំណាង(LDP) ក្រោមអធិបតីលោក នាក់ ណេរ៉ុន អភិបាលរងនៃគណអភិបាលខេត្ត ដោយមានលោកស្នងការរងខេត្ត ។ លោក ភន់ សុខុម អភិបាលស្តីទីស្រុកបន្ទាយស្រី និងកងកម្លាំងក្រុមការងារចម្រុះ សរុបជាច្រើននាក់ ។
ក្នុងកិច្ចប្រជុំនោះ លោក នី ចាន់ពិនិត្យ តំណាងបក្សLDPបានឱ្យដឹងថា ប្រជាពលរដ្ឋ ដែលមកប្រមូលផ្តុំគ្នាក្នុងចម្ការ១២ហិកតា នៅសល់ចំនួនពិតប្រាកដសរុប១៣៣៨នាក់ ។ ដូច្នេះហើយលោកសុំដឹកបន្លែចូលរាល់ថ្ងៃសម្រាប់ផ្គត់ផ្គង់ចំនួនមនុស្សប្រហែល(២០០នាក់ទៅ៣០០នាក់) និងមានឆន្ទ:បន្តណែនាំដល់អ្នកនៅក្នុងចម្ការឱ្យបន្តការចាកចេញ ។
លោក នាក់ ណេរ៉ុន អភិបាលរងនៃគណៈអភិបាលខេត្ត តំណាងឯកឧត្តម ទៀ សីហា អភិបាលខេត្តសៀមរាប និងអាជ្ញាធរបញ្ជាក់ថា នឹងយកសំណូមពរពីលោក នី ចាន់ពិនិត្យ ដើម្បីយកទៅឆ្លងឯកឧត្តម ទៀ សីហា អភិបាលខេត្តសិន និងប្រាប់តាមក្រោយ ។លោកអភិបាលរងខេត្តបានបន្ថែមថា សមត្ថកិច្ចនឹងត្រូវចូលទៅរាប់មនុស្សជាក់ស្តែងនៅក្នុងចម្ការម្រេច១២ហិកតានៅថ្ងៃខាងមុខ ហើយលោកស្នើឱ្យលោក នី ចាន់ពិនិត្យ ជួយណែនាំឱ្យក្រុមសន្តិសុខ(LDP)មានការយោគយល់បញ្ចៀសការប៉ះពាល់ពាក្យសម្តីគ្នាជាមួយសមត្ថកិច្ច ។ លោកបានបញ្ជាក់ទៀតថា កិច្ចប្រជុំពិភាក្សានេះបានបញ្ចប់នៅវេលាម៉ោង៧យប់ថ្ងៃដដែល ។
បើតាមប្រភពពីសមត្ថកិច្ចបានប្រាប់ភ្នាក់ងារកោះសន្តិភាពឱ្យដឹងនៅវេលាម៉ោង១០និង១៥ នាទីព្រឹកថ្ងៃទី២៨ ខែកញ្ញា ឆ្នាំ២០២២ថា ប្រជាពលរដ្ឋ ដែលបានចាកចេញពីដីចម្ការ១២ហិកតា ចាប់ពីម៉ោង៦ព្រឹកដល់ម៉ោង៦ល្ងាចថ្ងៃទី២៧ ខែកញ្ញា ឆ្នាំ២០២២ អ្នកចេញសរុប ២៣នាក់ ស្រី្ត៥នាក់ ក្មេង២នាក់ ។ លោកបានបញ្ជាក់ថា បើតាមប្រភពពីប្រជាពលរដ្ឋសុំមិនបញ្ចេញឈ្មោះដែលបានចាកចេញពីក្នុងដីចម្ការ១២ហិកតា ប្រាប់សមត្ថកិច្ចថា នៅខាងក្នុងជិតអស់ស្បៀងអាហារហើយ ព្រោះសមត្ថកិច្ចឱ្យមនុស្សចេញបាន តែមិនឱ្យចូល ព្រមទាំងមិនឱ្យទិញសម្ភារៈប្រើប្រាស់ចូលទៅក្នុងវិញបានឡើយ ។ ប្រភពពីសមត្ថកិច្ចបានបញ្ជាក់ទៀតថា ចំពោះអ្នកដែលបន្តប្រមូលផ្តុំជួបជុំគ្នានៅក្នុងដីចម្ការម្រេច១២ហិកតា រហូតដល់ថ្ងៃទី២៧ ខែកញ្ញា ឆ្នាំ២០២២នេះ នៅសល់ប្រមាណ១៣៣៨នាក់ ។ នេះបើតាមរបាយការណ៍របស់លោក នី ចាន់ពិនិត្យ តំណាងគណបក្សសម្ព័ន្ធដើម្បីប្រជាធិបតេយ្យ LDP ដែលបានប្រជុំពិភាក្សាគ្នានៅសាលាស្រុកបន្ទាយស្រីជាមួយលោក នាក់ ណេរុន អភិបាលរងខេត្តសៀមរាប និងលោកអភិបាលស្តីទីស្រុកបន្ទាយស្រី ។
ប្រភពបានបន្ថែមថា សមត្ថកិច្ចយើងនៅតែបន្តសម្របសម្រួល និងត្រៀមលក្ខណៈ សម្រាប់ដឹកជញ្ជូនបងប្អូនប្រជាពលរដ្ឋទៅកាន់លំនៅឋានវិញ និងការត្រួតពិនិត្យសុខភាព និងផ្តល់ស្បៀងអាហារ ដោយឥតគិតថ្លៃ ។
ជាមួយគ្នានេះក៏នៅតែបន្តទទួលពាក្យបណ្តឹងស្រាវជ្រាវអំពីបទល្មើសនៅក្នុងការគ្រប់គ្រងការប្រមូលផ្តុំគ្នាដោយខុសច្បាប់នេះ ។ គណៈបញ្ជាការឯកភាពរដ្ឋបាលខេត្ត និងកងកម្លាំងសមត្ថកិច្ចពាក់ព័ន្ធត្រូវបន្តផែនការតាមដានក្តាប់សភាពការណ៍ និងអនុវត្តន៍វិធានការផ្សេងៗ ប្រកបដោយភាពទន់ភ្លន់ តែម៉ឺងម៉ាត់ និងត្រូវត្រៀមលក្ខណៈជាស្រេចសម្រាប់គ្រប់គ្រងសិ្ថតិអ្នកប្រមូលផ្តុំ និងជាពិសេសសកម្មជនគណបក្សដែលពុំទាន់សម្រេចចិត្ត ចាកចេញពីក្នុងចម្ការ ៕
ចែករំលែកព័តមាននេះ