រាជធានីភ្នំពេញ ៖ កំណើននៃវិស័យសំណង់ អគារខ្ពស់ៗ និងផ្សារទំនើបដែលបានរីកលូតលាស់ជាបន្តបន្ទាប់ បានធ្វើឲ្យវិនិយោគិនកម្ពុជា និងជប៉ុនចាប់ដៃសហការគ្នានាំចូលនិងដំឡើងជណ្ដើរយន្ត និងជណ្ដើរយន្តប្រអប់នៅតាមអគារខ្ពស់ៗ ខុនដូ សណ្ឋាគារ និងផ្សារទំនើប ដើម្បីសម្រួលដល់ក្រុមហ៊ុនសំណង់ដែលកំពុងសាងសង់នៅកម្ពុជា ជាពិសេសរាជធានីភ្នំពេញ ។
នៅក្នុងសន្និសីទសារព័ត៌មានមួយកាលពីថ្ងៃទី២ មីនា កន្លងទៅ នៅសណ្ឋាគារសូហ្វីតែលភ្នំពេញ ភូគីត្រា លោក Hiroshi Sato អគ្គនាយកក្រុមហ៊ុន Hitachi ផ្នែកប្រព័ន្ធអគារ បានឱ្យដឹងថា ដោយបានសិក្សាស្រាវជ្រាវទីផ្សារនៃតម្រូវការជណ្ដើរយន្ត និងជណ្ដើរយន្តប្រអប់ឃើញថា មានតម្រូវការច្រើន ព្រោះមួយរយៈចុងក្រោយនេះ កំណើនការវិនិយោគនៅកម្ពុជាបានស្ទុះងើបខ្លាំង ជាពិសេសវិស័យអចលនទ្រព្យ ដោយសំដៅលើសំណង់អគារខ្ពស់ៗ សណ្ឋាគារ ខុនដូ និងផ្សារទំនើបជាដើម ។
លោកមានប្រសាសន៍ថា ៖ « ដើម្បីសម្រួលដល់ការអភិវឌ្ឍអគារ ខុនដូ សណ្ឋាគារ ផ្សារទំនើបកាន់តែរហ័ស ទើបក្រុមហ៊ុនបានបើកដំណើរការនៅកម្ពុជាផ្ទាល់តែម្ដង ដោយបាននាំចូល និងដំឡើងជណ្ដើរយន្ត និងប្រអប់ម៉ាកHitachi ដោយជាងជំនាញៗ និងមានអ្នកត្រួតពិនិត្យបច្ចេកទេសត្រឹមត្រូវ » ។
លោកបន្តថា កាលពីឆ្នាំមុននេះ ក្រុមហ៊ុន Hitachi បានផ្ដល់ជូនជណ្ដើរយន្ត លឿនជាងគេលើពិភពលោកដោយមានល្បឿនរហូតដល់១ពាន់ម៉ែត្រ ក្នុង១នាទីលើទីផ្សារពិភពលោក និងទទួលបានការគាំទ្រយ៉ាងច្រើនពីសំណាក់ប្រទេសជាច្រើន ។ កាលពីថ្មីៗនេះដែរ ក្រុមហ៊ុន Hitachi ក៏បានបំពាក់ជណ្ដើរយន្តនៅមន្ទីរពេទ្យរ៉ូយ៉ាល់ ភ្នំពេញនៅកម្ពុជាផងដែរ តាមរយៈក្រុមហ៊ុន Hitachi ប្រទេសថៃ ។ ដូចនេះដើម្បីឱ្យកាន់តែមានភាពងាយស្រួលនោះ ទើបក្រុមហ៊ុនមកបើកនៅកម្ពុជាតែម្ដង ។
លោកបន្ថែមថា ការបើកក្រុមហ៊ុនថ្មី នាំចូលជណ្ដើរយន្ត និងប្រអប់នៅក្នុងប្រទេសកម្ពុជា មិនត្រឹមតែសម្រាប់ទីផ្សារកម្ពុជាប៉ុណ្ណោះទេ តែក៏នឹងពង្រីកទីផ្សារបន្ថែមទៀតទៅក្នុងតំបន់អាស៊ីទាំងមូលផងដែរ ព្រោះវត្តមានជណ្ដើរយន្ត និងជណ្ដើរប្រអប់ Hitachi នៅក្នុងតំបន់មានយូរមកហើយដែរ ។
លោក Sakchai Worrasangasilpa នាយកគ្រប់គ្រងទូទៅនៃក្រុមហ៊ុន Hitachi ប្រចាំកម្ពុជា ក៏បានឱ្យដឹងថា នៅក្នុងដំណើរការអាជីវកម្មជណ្ដើរយន្ត និងជណ្ដើរយន្តប្រអប់នៅកម្ពុជា ក្រៅពីការលក់ក្រុមហ៊ុន ក៏មានសេវាកម្មថែទាំ និងប្រឹក្សារជាមួយអតិថិជនផងដែរ។ ក្រៅពីនោះទៀត ក្រុមហ៊ុនក៏បានមានសេវាជួសជុល ត្រួតពិនិត្យជូនអតិថិជន ព្រោះថាក្រុមហ៊ុនចង់ធ្វើអ្វីជាមួយអតិថិជនជារៀងរហូត មិនមែនលក់ហើយចប់នោះទេ ។
លោកបន្តថា ការបើកក្រុមហ៊ុន Hitachi នៅកម្ពុជា ក៏នឹងផ្ដល់ប្រយោជន៍ដល់ប្រជាជនកម្ពុជា តាមរយៈការបណ្ដុះបណ្ដាលបច្ចេកទេសដំឡើង និងថែទាំជណ្ដើរយន្តផងដែរ។ លោកនិយាយថា ៖ « ចំពោះជណ្ដើរយន្តដែលនាំចូលនិងដំឡើងជូនអតិថិជននៅកម្ពុជា គឺបានផលិតឡើងនៅប្រទេសថៃ តែផលិតទៅតាមស្តង់ដាប្រទេសជប៉ុនសុទ្ធសាធ និងមានការត្រួតពិនិត្យពីអ្នកជំនាញមកពីប្រទេសជប៉ុនត្រឹមត្រូវផងដែរ។ ដូចនេះ ផលិតផល Hitachi ទាំងអស់សុទ្ធតែផលិតឡើងស្របតាមស្តង់ដាតែមួយ » ។
លោក ជា ហ៊ុយ ភាគទុនិកកម្ពុជានៃក្រុមហ៊ុន Hitachi ប្រចាំកម្ពុជា ក៏បានឱ្យដឹងថា លោកជឿជាក់លើគុណភាពរបស់ជប៉ុន ទើបលោកបានសម្រេចចិត្តវិនិយោគជាមួយជប៉ុន ដោយនាំយកជណ្ដើរយន្តនិងជណ្ដើរប្រអប់ម៉ាកHitachiនេះ មកកាន់ទីផ្សារកម្ពុជា ហើយសង្ឃឹមថា ដំណើរការក្រុមហ៊ុន Hitachi នឹងមានភាពល្អប្រសើរ និងមានការគាំទ្រពីអតិថិជននៅកម្ពុជា ដែលជាម្ចាស់អគារ ខុនដូ សណ្ឋាគារ មន្ទីរពេទ្យ ផ្សារទំនើបជាដើម ។
បើតាមសេចក្តីប្រកាសព័ត៌មានរបស់ក្រុមហ៊ុន Hitachi នៅកម្ពុជា ថាដើមទុនក្នុងការវិនិយោគលើការបើកក្រុមហ៊ុន Hitachi នៅកម្ពុជា ចំណាយទឹកប្រាក់ប្រមាណ១,២លានដុល្លារអាមេរិក ដោយក្នុងនោះ ទុន៤៧% ពីក្រុមហ៊ុនរោងចក្រ Hitachi, ៣០%ពីក្រុមហ៊ុនជណ្ដើរយន្តប្រអប់Hitachi ប្រទេសថៃ និង២៣% ពីក្រុមហ៊ុនកម្ពុជា CMED៕
ចែករំលែកព័តមាននេះ