រាជធានីភ្នំពេញ ៖ បើពុំមានអ្វីប្រែប្រួលទេ អគារពាណិជ្ជកម្មភ្លោះថៃ ប៊ុនរ៉ុង ដែលគ្រោងសាងសង់មានកម្ពស់រហូតដល់៥៦០ម៉ែត្រ និងខ្ពស់ជាងគេនៅតំបន់អាស៊ាន ហើយគ្រោងនឹងចំណាយទឹកប្រាក់សាងសង់២.១០០លានដុល្លារអាមេរិកនោះ នឹងចាប់ផ្តើមសាងសង់នៅខែសីហាខាងមុខនេះ ទៅតាមផែនការដែលបានគ្រោងទុក ។
លោកសាស្ត្រាចារ្យ ទួស សាភឿន អគ្គលេខាធិការរងគណៈស្ថាបត្យករកម្ពុជា និងជាថ្នាក់ដឹកនាំជាន់ខ្ពស់មួយរូបនៃក្រុមហ៊ុនថៃ ប៊ុនរ៉ុង បានបង្ហោះនៅក្នុងបណ្តាញទំនាក់ទំនងសង្គមរបស់ខ្លួនកាលពីសប្តាហ៍មុនថា អគារពាណិជ្ជកម្មនេះនឹងសាងសង់នៅខែសីហាខាងមុខ ប្រសិនជាគ្មានអ្វីប្រែប្រួលទេនោះ ។ លោកបន្តថា តាមគម្រោង អគារនេះនឹងសាងសង់រយៈពេលបីឆ្នាំ និងចំណាយថវិកាប្រមាណ៥ពាន់លានដុល្លារអាមេរិកសម្រាប់សាងសង់ និងដាក់អគារនេះឲ្យដំណើរការដោយរស់រវើក ។
« អគារពាណិជ្ជកម្មភ្លោះកប់ពពកនេះ គ្រោងដំឡើងកម្ពស់ពី៥០០ម៉ែត្រដល់៥៦០ម៉ែត្រ និងមានលើសពី១៣៣ជាន់ ។ គិតមកដល់ពេលនេះ ការធ្វើតេស្តដីបានបញ្ចប់ហើយ ចំណែកក្រុមហ៊ុនថៃ ប៊ុនរ៉ុង ក៏បានចុះកិច្ចព្រមព្រៀងជាមួយក្រុមហ៊ុនផ្គត់ផ្គង់សម្ភារសំណង់ ដើម្បីសាងសង់អគារនេះរួចរាល់ផងដែរ » ។ នេះបើយោងតាមលោកសាស្ត្រាចារ្យ ទួស សាភឿន បញ្ជាក់ ។
អគារពាណិជ្ជកម្មភ្លោះថៃ ប៊ុនរ៉ុង នេះ នឹងក្លាយជាបណ្តុំការិយាល័យ ផ្សារទំនើប អាផាតមិន ខុនដូ ភោជនីយដ្ឋាន សណ្ឋាគារលំដាប់ផ្កាយ៥ និងផ្កាយ៦ ដែលវានឹងជានិមិត្តរូបនៃរាជធានីភ្នំពេញ និងជាកិត្យានុភាពរបស់កម្ពុជា នាពេលអនាគត ។
លោកសាស្ត្រាចារ្យ ទួស សាភឿន ជឿជាក់ថា មជ្ឈមណ្ឌលពាណិជ្ជកម្មនេះនឹងទទួលបានជោគជ័យ ហើយវានឹងក្លាយជាមជ្ឈមណ្ឌលពាណិជ្ជកម្មដែលនឹងទាក់ទាញក្រុមហ៊ុនអន្តរជាតិធំៗមកដាក់ការិយាល័យកណ្តាលនៅទីក្រុងភ្នំពេញបន្ថែមទៀត ព្រោះរហូតមកទល់ពេលនេះ កម្ពុជាមិនទាន់មានអគារការិយាល័យលំដាប់ពិភពលោក ដែលអាចទាក់ទាញក្រុមហ៊ុនធំៗចូលមកដាក់ការិយាល័យកណ្តាលនៅឡើយទេ ។
លោកបន្តថា ក្រៅពីចំណាយថវិកាលើការសាងសង់ប្រមាណ២.១០០លានដុល្លារ ក្រុមហ៊ុនក៏បានត្រៀមថវិកាប្រមាណ៣ពាន់លានដុល្លារអាមេរិកបន្ថែមទៀតដើម្បីធ្វើឲ្យអគារនេះមានសកម្មភាពរស់រវើក និងទទួលបានជោគជ័យ ព្រោះប្រសិនជាសាងសង់ចប់ ប៉ុន្តែអគារនេះគ្មានសកម្មភាព គឺមិនបញ្ជាក់ពីភាពជោគជ័យរបស់គម្រោងនេះទេ។ រហូតមកទល់ពេលនេះ ក្រុមហ៊ុនមានថវិកាគ្រប់គ្រាន់ដើម្បីសាងសង់អគារនេះហើយ ។
តាមគម្រោង អគារពាណិជ្ជកម្មកប់ពពកនេះ នឹងត្រូវសាងសង់ និងគ្រប់គ្រងដោយក្រុមហ៊ុនសំណង់ Hsin Chong Construction Group Ltd និងសហការវិនិយោគរវាងក្រុមហ៊ុន Thai Boon Rong Group និងក្រុមហ៊ុនអភិវឌ្ឍអចលនទ្រព្យនៅទីក្រុងម៉ាកាវ Sun Kian Ip Group ។
លោក ប៉ា សុជាតិវង្ស អភិបាលរាជធានីភ្នំពេញ បានថ្លែងក្នុងពិធីសម្ពោធអគារតាំងពិព័រណ៍គម្រោងនេះ នៅទល់មុខស្ថានទូតចិន កាលពីពេលកន្លងមកថា គម្រោងនេះបានទទួលការគាំទ្រពីសម្តេចតេជោ ហ៊ុន សែន នាយករដ្ឋមន្ត្រីកម្ពុជា ។ លោកបន្តថា ការសាងសង់បញ្ចប់អគារនេះមិនគ្រប់គ្រាន់ទេ ដូច្នេះ ក្រុមហ៊ុនត្រូវធ្វើយ៉ាងណាឲ្យអគារនេះដំណើរការ និងមានសកម្មភាពរស់រវើក ទើបអាចបញ្ជាក់ពីភាពជោគជ័យរបស់គម្រោងនេះ ។
អគារពាណិជ្ជកម្មថៃ ប៊ុនរ៉ុង នឹងសាងសង់លើផ្ទៃដីទំហំ៦ហិកតា ស្ថិតក្នុងអតីតតំបន់ឌ្រីមលែនដ៍ សង្កាត់ចតុមុខ ខណ្ឌដូនពេញ រាជធានីភ្នំពេញ ។
អ្នកជំនាញវិស័យអចលនទ្រព្យបានសម្ដែងនូវការសាទរ និងគាំទ្រយ៉ាងខ្លាំង ប្រសិនបើគម្រោងមហិមានេះដំណើរការសាងសង់ដោយជោគជ័យ ដែលធ្វើឲ្យវិនិយោគិនអន្តរជាតិមានទំនុកចិត្តកាន់តែខ្លាំងថែមទៀតមកលើកម្ពុជា ។
លោកឧកញ៉ា ចេង ខេង ប្រធានក្រុមប្រឹក្សាភិបាលនៃក្រុមហ៊ុន Hutton CPL ថ្លែងថា ប្រសិនជាក្រុមហ៊ុនសាងសង់អគារនេះពិតប្រាកដ លោកជឿថា អគារនេះនឹងដំណើរការដោយជោគជ័យ ព្រោះមនុស្សជាច្រើនបានត្រៀមគាំទ្រនិងទិញអគារនេះ សូម្បីតែលោកក៏នឹងទិញអគារនេះផងដែរ ព្រោះវាជាអគារមួយដែលជាប់លំដាប់លេខ១នៅកម្ពុជា និងក្នុងតំបន់អាស៊ាន ព្រមទាំងអាចប្រកួតប្រជែងជាមួយអគារខ្ពស់ៗដទៃទៀតក្នុងទ្វីបអាស៊ី ។
លោកបន្តថា ៖ « បើយើងគ្មានលុយសាងសង់អគារតម្លៃរាប់ពាន់លានដុល្លារ ក៏ខ្ញុំអាចចំណាយថវិកាពី២០ទៅ៣០ម៉ឺនដុល្លារទិញអគារដើម្បីគាំទ្រគម្រោងអភិវឌ្ឍន៍នេះ ដែលជាមោទនភាពជាតិរបស់យើងផងដែរ ។ យើងគួរនាំគ្នាគាំទ្រគម្រោងអភិវឌ្ឍន៍នេះ គាំទ្រការអភិវឌ្ឍក្នុងវិស័យនេះ ព្រោះវានឹងក្លាយជាអគារមួយដែលជាអំណួតរបស់ជាតិ » ៕
ចែករំលែកព័តមាននេះ