រាជធានីភ្នំពេញ ៖ ទំនាក់ទំនងវិស័យពាណិជ្ជកម្ម និងវិនិយោគរវាងប្រទេសទាំងពីរកម្ពុជា-ថៃ ក្នុងឆ្នាំ២០១៦កន្លងមកមានទឹកប្រាក់ចំនួន៥,៦ពាន់លានដុល្លារ។ ទន្ទឹមនឹងនេះ ថ្នាក់ដឹកនាំនៃប្រទេសទាំងពីរបាន
រាជធានីភ្នំពេញ ៖ ទំនាក់ទំនងវិស័យពាណិជ្ជកម្ម និងវិនិយោគរវាងប្រទេសទាំងពីរកម្ពុជា-ថៃ ក្នុងឆ្នាំ២០១៦កន្លងមកមានទឹកប្រាក់ចំនួន៥,៦ពាន់លានដុល្លារ។ ទន្ទឹមនឹងនេះ ថ្នាក់ដឹកនាំនៃប្រទេសទាំងពីរបានឯកភាពនឹងជំរុញទំហំពាណិជ្ជកម្មទ្វេភាគីឱ្យកើនឡើង៣ដងនៅក្នុងឆ្នាំ២០២០ ឬ៣ឆ្នាំខាងមុខ ។
នៅក្នុងពិព័រណ៍ពាណិជ្ជកម្ម «ថប់ថៃប្រែន»ដែលបានរៀបចំនៅមជ្ឈមណ្ឌលសន្និបាត និងពិព័រណ៍កោះពេជ្រ កាលពីថ្ងៃទី១ មីនា កន្លងមក លោក ណាត់ថាវុឍ្ឍ ពោធិសារ៉ូ ឯកអគ្គរាជទូតថៃប្រចាំកម្ពុជា មានប្រសាសន៍ថា ការរៀបចំពិព័រណ៍ពាណិជ្ជកម្មថ្ងៃនេះ គឺបានចូលរួមចំណែកក្នុងការជួយបង្កើនទំហំពាណិជ្ជកម្មរវាងប្រទេសទាំងពីរថៃនិងកម្ពុជា ដោយផ្អែកលើមុខទំនិញថៃទទួលបានការពេញនិយមចូលចិត្តពីប្រជាជនកម្ពុជា ។
លោកឯកអគ្គរាជទូតបន្ដថា ៖ « ការគាំទ្រផលិតផលថៃ ជាកត្តាលើកទឹកចិត្តដល់វិនិយោគិនថៃចូលមកបង្កើតរោងចក្រដើម្បីផលិតទំនិញនៅក្នុងប្រទេសកម្ពុជា ជាបន្តបន្ទាប់មានដូចជា ក្រុមហ៊ុន CP, ក្រុមហ៊ុន Betagro និងក្រុមហ៊ុន SCG ដែលបានពង្រីកការវិនិយោគទុនរបស់ខ្លួន ដោយមកបង្កើតរោងចក្រនៅកម្ពុជា ដើម្បីជំនួសការនាំចូល និងបានរួមចំណែកដល់ការបង្កើតការងារ ប្រាក់ចំណូល និងការរីកចម្រើនគង់វង្សនៃសេដ្ឋកិច្ចកម្ពុជា » ។
លោកបណ្ឌិត សំ សិរីរតន៍ អនុរដ្ឋលេខាធិការ ក្រសួងពាណិជ្ជកម្ម មានប្រសាសន៍ថា ក្រៅពីទំនាក់ទំនងពាណិជ្ជកម្មទ្វេភាគីឲ្យរឹងមាំ ការរៀបចំពិព័រណ៍ពាណិជ្ជកម្មថៃ នៅមានបង្កប់អត្ថន័យផ្នែកវប្បធម៌ ប្រពៃណី និងការផ្សារភ្ជាប់សង្គមរវាងប្រជាជនទាំង២ប្រទេសឱ្យកាន់តែស្អិតរមួតថែមទៀត ។
លោកបណ្ឌិតថ្លែងថា ៖ « តាមរយៈការបង្កើតឲ្យមានព្រឹត្តិការណ៍ពាណិជ្ជកម្ម ជាពិសេស ពិព័រណ៍ពាណិជ្ជកម្មថៃនៅកម្ពុជាជារៀងរាល់ឆ្នាំ និងការចូលរួមរបស់កម្ពុជានៅក្នុងពិព័រណ៍ពាណិជ្ជកម្មថៃនៅទីក្រុងបាងកក និងនៅតាមបណ្តាខេត្តមួយចំនួននៃប្រទេសថៃក្នុងមួយឆ្នាំៗប្រមាណពី៧ទៅ១០ដង រួមទាំងការសហការគ្នាបង្កើតឱ្យមានកិច្ចប្រជុំ ឬសិក្ខាសាលាស្តីពីសកម្មភាពពាណិជ្ជកម្មជាប្រចាំនៅលើទឹកដីនៃប្រទេសទាំងពីរ ជាលទ្ធផលឃើញថា ទំនាក់ទំនងពាណិជ្ជកម្មទ្វេភាគីកម្ពុជា-ថៃ កាន់តែមានវឌ្ឍនាការ និងរីកចម្រើនគួរឱ្យកត់សម្គាល់ និងជាមោទនភាព » ។
លោកបន្ដថា ភាពរីកចម្រើននៃពាណិជ្ជកម្មទ្វេភាគីកម្ពុជា-ថៃ ដែលមានការកើនឡើងជារៀងរាល់ឆ្នាំនេះ គឺដោយសារតែទំនាក់ទំនង សេដ្ឋកិច្ច ពាណិជ្ជកម្មដ៏ល្អប្រសើររវាងប្រទេសទាំងពីរ ព្រមទាំងមានការចូលរួមយ៉ាងសកម្មពីផ្នែកឯកជន ជាពិសេស បណ្តាពាណិជ្ជករនៃប្រទេសទាំងពីរ ។
លោកបន្តថា ៖ « ខ្ញុំជឿជាក់ថា ទំនាក់ទំនងពាណិជ្ជកម្មកម្ពុជា-ថៃ នឹងត្រូវបានថែរក្សាយ៉ាងល្អប្រសើរបន្ថែមទៀតនាបណ្តាឆ្នាំខាងមុខ ដោយមានការចូលរួមយ៉ាងពេញលេញ និងដ៏សកម្មពីផ្នែកឯកជន និងរាជរដ្ឋាភិបាលនៃប្រទេសទាំងពីរ » ៕
ចែករំលែកព័តមាននេះ