រាជធានីភ្នំពេញ ៖ បើទោះបីជាអាជ្ញាធរអប្សរា ក៏ដូចជារាជរដ្ឋាភិបាលបានសម្រេចដំឡើងថ្លៃសំបុត្រចូលទស្សនាតំបន់អង្គរសម្រាប់ភ្ញៀវបរទេសក៏ដោយ ក៏ចំនួនសំបុត្រដែលលក់ជូនភ្ញៀវបរទេសនៅដើមឆ្នាំ២០១៧នេះ នៅ
រាជធានីភ្នំពេញ ៖ បើទោះបីជាអាជ្ញាធរអប្សរា ក៏ដូចជារាជរដ្ឋាភិបាលបានសម្រេចដំឡើងថ្លៃសំបុត្រចូលទស្សនាតំបន់អង្គរសម្រាប់ភ្ញៀវបរទេសក៏ដោយ ក៏ចំនួនសំបុត្រដែលលក់ជូនភ្ញៀវបរទេសនៅដើមឆ្នាំ២០១៧នេះ នៅតែមានកំណើនដដែល គ្មានអ្វីប្រែប្រួល ឬធ្លាក់ចុះនោះទេ ។ ជាក់ស្ដែង ចំនួនសំបុត្រដែលលក់ជូនភ្ញៀវបរទេសក្នុងខែកុម្ភៈ ឆ្នាំ២០១៧នេះ បើធៀបនឹងខែកុម្ភៈ ឆ្នាំ២០១៦ មានកំណើន២,៤១% ។
បើតាមទិន្នន័យរបស់គ្រឹះស្ថានអង្គរ ចេញផ្សាយកាលពីថ្ងៃទី១ មីនា ២០១៧ ឱ្យដឹងថា ចំនួនភ្ញៀវទេសចរបរទេសដែលបានទិញប័ណ្ណចូលទស្សនារមណីយដ្ឋានអង្គរ មាន២៥១.៧៥៤នាក់ក្នុងខែកុម្ភៈ ឆ្នាំ២០១៧ បើធៀបនឹងខែកុម្ភៈ ២០១៦ កើនឡើង២,៤១% បើទោះជាខែកុម្ភៈ ឆ្នាំ២០១៧ មានចំនួនថ្ងៃតិចជាងខែកុម្ភៈ ឆ្នាំ២០១៦ មួយថ្ងៃក៏ដោយ ។ ដោយឡែក ចំពោះចំណូលពីការលក់សំបុត្រជូនភ្ញៀវបរទេសចូលទស្សនាតំបន់អង្គរក្នុងខែកុម្ភៈ ឆ្នាំ២០១៧ មានចំនួន១១.៩៩១.៥៦៣ដុល្លារអាមេរិក ។
គួររំលឹកថា នៅក្នុងឆ្នាំនេះ គ្រឹះស្ថានអង្គរបានសម្រេចដំឡើងថ្លៃសំបុត្រចំពោះភ្ញៀវទេសចរបរទេស ដើម្បីយកថវិកាមួយភាគទៅជួយមន្ទីរពេទ្យគន្ធបុប្ផាសម្រាប់ជួយសង្គ្រោះកុមារកម្ពុជា ។ បើតាមរបាយការណ៍របស់គ្រឹះស្ថានអង្គរឱ្យដឹងថា នៅក្នុងខែកុម្ភៈ ឆ្នាំ២០១៧ ថវិកាដែលត្រូវផ្ដល់ជូនមន្ទីរពេទ្យគន្ធបុប្ផា មានចំនួន៥០៣.៥០៨ដុល្លារអាមេរិក មានន័យថា ចាប់ពីថ្ងៃប្រកាសដំឡើងសំបុត្រមក គឺភ្ញៀវទិញ១សំបុត្រ អាជ្ញាធរអប្សរាត្រូវបរិច្ចាគ២ដុល្លារជូនមន្ទីរពេទ្យគន្ធបុប្ផា ។
ដោយឡែក សម្រាប់រយៈពេល២ខែក្នុងឆ្នាំ ២០១៧ ភ្ញៀវទេសចរបរទេសទិញប័ណ្ណទស្សនារមណីយដ្ឋានតំបន់អង្គរ មានចំនួន៥៣៨.៧៩៥នាក់ បើធៀបនឹងឆ្នាំ២០១៦កន្លងទៅ មានកំណើនប្រមាណ៩,១០% ។ ចំពោះចំណូលវិញក្នុងរយៈពេល២ខែឆ្នាំ២០១៧ ទទួលបានចំនួន ២០.២៩៦.៣០៣ដុល្លារអាមេរិក មានកំណើនប្រមាណ៤១,៣៥%។
គួរបញ្ជាក់ថា រាជរដ្ឋាភិបាលបានខិតខំទាក់ទាញភ្ញៀវទេសចរបរទេសពីជុំវិញពិភពលោក មកទស្សនានៅក្នុងព្រះរាជាណាចក្រកម្ពុជា ជាពិសេស តំបន់វប្បធម៌ដ៏វ័យចំណាស់ គឺប្រាសាទជាច្រើននៅក្នុងខេត្តសៀមរាប ។ ក្នុងនោះដែរ ព្រលានយន្តហោះអន្តរជាតិសៀមរាប ក៏បានកែច្នៃ និងមានលទ្ធភាពអនុញ្ញាតឱ្យយន្តហោះធុនតូច និងមធ្យមពីបណ្ដាប្រទេសនានាចុះចតបានផងដែរ ។ ក្រសួងទេសចរណ៍ ក៏បានកំណត់ផែនការទាក់ទាញភ្ញៀវទេសចរបរទេសឱ្យបានច្រើននៅឆ្នាំខាងមុខនេះ និងរៀបចំព្រឹត្តិការណ៍ជាតិ និងអន្តរជាតិនានាដើម្បីទាក់ទាញកំណើនភ្ញៀវទេសចរអន្តរជាតិ ៕
ចែករំលែកព័តមាននេះ