រាជធានីភ្នំពេញ ៖ មូលនិធិអន្តរជាតិសម្រាប់អភិវឌ្ឍន៍កសិកម្មបានផ្ដល់ប្រាក់ចំនួន៣៦,៣០លានដុល្លារអាមេរិកដល់កម្ពុជា ដើម្បីគាំទ្រការអនុវត្ត «គម្រោងជំរុញទីផ្សារសម្រាប់កសិកម្មខ្នាតតូច» នៅកម្ពុជា ។ នេះបើយោងតាមសេចក្ដីប្រកាសព័ត៌មាន ។
តាមសេចក្តីប្រកាសព័ត៌មានដដែលឲ្យដឹងថា គម្រោងទឹកប្រាក់នេះ នឹងប្រើប្រាស់សម្រាប់អនុវត្តក្នុងរយៈពេល៦ឆ្នាំ ចាប់ពីឆ្នាំ២០១៧ ដល់២០២២ និងមានគោលដៅចូលរួមលើកកម្ពស់ជីវភាពកសិករខ្នាតតូចឱ្យទទួលបានផលចំណេញខ្ពស់ពីការធ្វើកសិកម្ម តាមរយៈការចូលធ្វើអន្តរាគមន៍ ជម្នះដោះស្រាយរាល់បញ្ហាប្រឈមក្នុងវិស័យកសិកម្មទាំងក្នុងដំណាក់កាលខ្សែសង្វាក់ផលិតកម្ម និងការធ្វើកសិពាណិជ្ជកម្ម ជាពិសេស ការជំរុញតភ្ជាប់ឱ្យដល់ទីផ្សារកសិកម្ម ។
ក្នុងជំហានដំបូង គម្រោងនេះនឹងផ្តោតលើផលិតភាពកសិកម្មចំនួន៥មុខ រួមមាន ៖ ស្រូវ បន្លែ មាន់ចិញ្ចឹមជាលក្ខណៈគ្រួសារ ដំឡូង និងសូត្រ ។ គម្រោងនឹងពិនិត្យលទ្ធភាពពង្រីកមុខទំនិញនៅជំហានបន្តបន្ទាប់ទៀត អាស្រ័យតាមតម្រូវការជាក់ស្តែង ។ គម្រោងខាងលើនេះនឹងផ្តល់ប្រយោជន៍ដោយផ្ទាល់ដល់កសិករក្រីក្រ៧ម៉ឺន៥ពាន់គ្រួសារក្នុងខេត្តចំនួន១៥ រួមមាន កំពត តាកែវ កណ្តាល ព្រៃវែង ត្បូងឃ្មុំ កំពង់ចាម កំពង់ធំ ក្រចេះ រតនគិរី ស្ទឹងត្រែង ព្រះវិហារ សៀមរាប បន្ទាយមានជ័យ បាត់ដំបង និងប៉ៃលិន ។
សេចក្តីប្រកាសព័ត៌មានដដែលបន្តថា គម្រោងនឹងត្រូវដឹកនាំអនុវត្តដោយក្រសួងពាណិជ្ជកម្ម និងមានការចូលរួមអនុវត្តដោយក្រសួងសេដ្ឋកិច្ច និងហិរញ្ញវត្ថុ ព្រមទាំងធនាគារអភិវឌ្ឍន៍ជនបទ ។
លោកបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានចុះកិច្ចព្រមព្រៀងទទួលជំនួយនេះ ជាមួយលោក Gilbert Fossoun Houngbo ប្រធានមូលនិធិអន្តរជាតិសម្រាប់អភិវឌ្ឍន៍កសិកម្ម នៅទីស្នាក់ការកណ្តាលរបស់មូលនិធិអន្តរជាតិ ដោយលោកទេសរដ្ឋមន្ត្រីលើកឡើងថា ឥណទានសម្បទានចំនួន៣៦,៣០លានដុល្លារអាមេរិកនេះ រាជរដ្ឋាភិបាលនឹងចូលរួមជាថវិកាបដិភាគចំនួនប្រមាណ៨,៦៥លានដុល្លារអាមេរិកផងដែរ ។ លោកទេសរដ្ឋមន្ត្រីថា ៖ «គម្រោងជំរុញទីផ្សារសម្រាប់កសិកម្មខ្នាតតូចនេះ នឹងអាចកៀរគរទុនវិនិយោគពីអ្នកទទួលផល និងដៃគូក្នុងវិស័យឯកជនប្រមាណ១៦,៧០លានដុល្លារអាមេរិកទៀត ដែលនឹងធ្វើឱ្យគម្រោងកើនឡើងសរុបប្រមាណ៦១,៦៥លានដុល្លារអាមេរិក » ។
លោកទេសរដ្ឋមន្ត្រីបន្ថែមថា ៖ « គម្រោងជំរុញទីផ្សារសម្រាប់កសិកម្មខ្នាតតូច ជាគម្រោងទី១ហើយដែលត្រូវបានរៀបចំឡើងប្រកបដោយនវានុវត្តភាពកម្រិតខ្ពស់ ដោយនឹងកៀរគរនូវការចូលរួមទុនវិនិយោគរបស់វិស័យឯកជន សម្រាប់យកមកដោះស្រាយបញ្ហាប្រឈមក្នុងវិស័យកសិកម្ម និងគាំទ្រការលើកកម្ពស់ជីវភាពប្រជាកសិករក្រីក្រ»៕
ចែករំលែកព័តមាននេះ